Sauma na Taro Levu: Na Cava o Nanuma me baleti Karisito?

Na raivotu e vakamacalataki ena Vunau kei na Veiyalayalati 76 e vakabibitaka na dina bibi me baleti Jisu Karisito:

• “Sa Kalou na Turaga, ka sa i koya ga na iVakabula” (tikina e 1).

• Sa “yalololoma ka lomani ira sa rerevaki koya, ka sa ka ni marau [Vua] me vakalagilagi ira era sa qaravi [Koya] ena yalo sa dina ka dodonu” (tikina e 5).

• “A lako mai ki vuravura me colata na ivalavala ca ni vuravura, ka me vakatabuya na vuravura, ka vakasavasavataka mai na veika tawadodonu kecega; ia ena vukuna era na vakabulai kina ko ira kecega sa solia na Tamada kina nona kaukauwa ka buli ira ko koya” (tikina e 41–42).

• Ka sa qai yaco kina o Jisu Karisito me “vakayacora na veisorovaki uasivi oqo ena vakadavei ni nona dra” (tikina e 69).

Rau vakadinadinataka ena doudou o Josefa kei Sidini na dina kei na bibi kei Jisu Karisito:

“E bula o Koya!

“Ni keirau a raici koya, ni sa tiko ena liga imatau ni Kalou; keirau sa rogoca tale ga na domo sa tukuna ni sai koya na Le Duabau ga nei Tamana—

E rau vakadinadinataka “ni sa vu mai vua na ka kece ga; ia sa iKoya sa lesi me bulia na vuravura; io ena vukuna ga era sa yaco kina na lewe ivuravura mera luve ni Kalou” (tikina 22-24

Ena vakabulai ira “na tamata kecega ko Jisu Karisito ka vakavo ga ko ira [na luve ni veivakarusai]” (Vunau kei na Veiyalayalati 76:44). Era sa sauma taucoko na taro “A cava dou sa nanuma me baleti Karisito?” ena nomudou cata na Yalo Tabu ka cakitaka ka beci Jisu Karisito kei na Nona kaukauwa ni oti na Nona vakatakilai vei ira (raica na tikina e 43). Nira vakayacora vakakina, era sa “vakoti koya kina kauveilatai ka vakamaduataki koya e matanalevu” (tikina e 35).

Era sauma vakacava o ira ena matanitu vakatilesitieli na taro “A cava dou sa nanuma me baleti Karisito?” Era digitaka me ra cata na kosipeli kei na “ivakadinadina i Jisu” (Vunau kei na Veiyalayalati 76:82, 101), ka ra cata na Nona ivakaro, nira sa “dau lasu, daucakaisausau, ka dauyalewa, ka dauveibutakoci” (tikina e 103).

Ia, era na rawata e dua na tucaketale kei na dua na ivakatagedegede lagilagi ka “uasivia na ka kecega e kilai rawa” (tikina e 89). Era sa muria tiko e dua mada ga na lawa ni matanitu vakatilesitieli (raica na Vunau kei na Veiyalayalati 88:36) gadrevi kina vei ira kece me “tekiduru na duru, ia na yame kecega ena vakatusa vei koya sa tiko ena idabedabe vakaturaga me sega ni mudu ka sega ni mudu” (Vunau kei na Veiyalayalati 76:110).

Era sauma vakacava o ira era tiko ena matanitu vakateresitieli na taro “A cava na nomudou nanuma me baleti Karisito?” E dina ni tiko e dua na nodra “ivakadinadina kei Jisu,” era sega ni “yaloqaqa” kina; “o koya era na sega kina ni rawata na isala ni matanitu ni noda Kalou” (tikina e 79). Era kalougata ni “mai sikovi ira ga na Luvena, ia era na sega ni raica na vakataucokotaki nei Tamana” (tikina 77).

O Jisu Karisito kei na Nona kosipeli tawamudu e bolei keda me da kakua walega ni kila ia meda cakava talega ka yaco meda vakakina. Me ciqomi na taucoko ni Tamada kei na Luvena, sa dodonu vua e dua me ciqoma na cakacaka vakalotu ni valetabu ka yalodina kina veiyalayalati oqori. E vakamatatataka na Parofita o Josefa Simici: “Kevaka e dua na tamata sa rawata na taucoko ni matabete ni Kalou, sa dodonu me taura ena sala vata ga a rawata kina o Jisu Karisito, o ya ena nona muria na ivakaro kecega ka talairawarawa kina cakacaka vakalotu kecega ni vale ni Turaga.” Era sega ni vinakata na tamata vakateresitieli me ra ciqoma na taucoko nei Tamada.

Era sauma vakacava o ira ena matanitu vakasilesitieli na taro “A cava na nomudou nanuma me baleti Karisito?” Era ciqoma “na ivakadinadina i Jisu”; era vakabauta “na yacana;” era sa “papitaisotaki me vaka na ivalavala ni nona bulu, nira sa bulu ena wai ena yacana” (tikina 51). Ena nodra talairawarawa kina ivakaro era na savai ka vakasavasavataki kina mai na nodra ivalavala ca kece sara, ka ciqoma na Yalo Tabu ena veitabaki ni liga mai vei koya sa lesi ka vauci kina kaukauwa oqo” (tikina 52). Era sa “vakamalumalumutaki ena vakabauta [na Turaga ko Jisu Karisito], ka ra sa vauci ena Yalo Tabu ni yalayala” (tikina 53). Eda sa yaco “me uasivi sara ena vukui Jisu na dauveivakaduavatataki ni veiyalayalati vou, ko koya sa vakayacora na veisorovaki e uasivi sara ena liviraki ni nona dra.”tikina 69

Sa tukuna na iVakabula ena Nona vosa, “Oi au na sala, kei na vu ni dina, kei na vu ni bula: sa sega ni torovi Tamaqu walega e dua na tamata, ena vukuqu ga” (Joni 14:6). E sega ni dua e ciqoma na lagilagi vakasilesitieli se na taucoko ni Tamada ka sega ni ciqoma na veika kece e solia na iVakabula mai na Nona Veisorovaki (raica na Vunau kei na Veiyalayalati 84:37–38): Nona loloma, kaukauwa, loloma veivueti, vinaka, dauveiqaravi, lewa dodonu, ivakaro, cakacaka vakalotu, kei na veiyalayalati.

Me vaka a vakamacalataka o Peresitedi Russell M. Nelson, “Na inaki tudei tu mai ni Lotu me vukei ira kece na lewenilotu me tubu nodra vakabauta noda Turaga o Jisu Karisito kei na Nona Veisorovaki, ka vukei mera cakava ka maroroya nodra veiyalayalati kei na Kalou, ka me qaqaco ka vauci nodra vuvale.”

O Peresitedi Russell M. Nelson e vakauqeti keda meda cakava na matanitu vakasilesitieli me noda lalawa tawamudu, ka qai “vakasamataka vakavinaka se era na biuti [keda] evei ena bula ka tarava na digidigi yadua [eda] cakava e vuravura.” Ni da sauma na veisureti oqo, eda na vakarau tu meda sauma na taro cecere “A cava dou sa nanuma me baleti Karisito?”

Na raivotu ni ivakatagedegede ni lagilagi e vakadeitaka vei keda sega walega ni dina na galala ni digidigi ia e bibi talega. E vakananuma talega vei keda, ena vuku i Jisu Karisito, eda sa “vueti mai na lutu” ka da “sa galala me sega ni mudu me digitaka na galala kei na bula tawamudu, ena vukuna na Dauveisorovaki ni tamata kecega, se me digitaka na tiko vakavesu kei na mate” (2 Nifai 2:26–27). Na cava meda digitaka? Na noda veisiga ni mataka ena bula oqo kei na noda icavacava tawamudu sa serau me vaka na noda vakabauti Jisu Karisito.