Kaburaki na Rorogo ni iVakatagi

Droini mai vei David Malan/Malan Creative

Au dau vinakata tu ga meu vakaitavi ena Mataivakatagi ena Lomanibai ni Valetabu, na mataivakatagi ni Lotu i Jisu Karisito ni Yalododonu Edaidai. Au dau vakatagitaka na clarinet ka dua na noqu diqiri ni ivakatagi, ia e sega ni donumaki au e dua na kena madigi.

Au vakaitikotiko e Niu Siladi.

Ia, e vakananuma vei au na Yalo Tabu, meu “lomavakacegu” (Alama 29:3) niu sa dua na ivuvu ni ivakatagi me baleta na Lotu e Niu Siladi kei na veivanua tale eso. Na imatai ni noqu veikacivi niu se qai yabaki 18 o ya na iliuliu ni sere ena isususu. Me tekivu mai na gauna o ya, au sa vakalougatataki meu liutaka ka vakarautaka na ivakatagi ni iteki kei na tabanalevu, ka vakakina na vakatagitaka na piano ena Lalai. Au sa wasea na ivakatagi e Niu Siladi kei na Yatu Filipaini ka vakarautaka na ivakatagi ni piano me baleta e dua na dolavi ni sere me baleta e dua na tikina ni Lotu mai Shanghai, Jaina. Au sa lagata e dua na sere domorua ena Koronivuli ni Veivakarautaki kina Kaulotu e Provo.

Na sere e vakavuna meu tiko dei ga ena Lotu ena gauna dredre ni veivala kei na nuiqawaqawa kei na lomabibi. Niu vakila niu sega ni rawa ni cakava e dua tale na ka, au kila ni rawa niu kaya io meu veivuke ena ivakatagi. Na ivakatagi e vukei au meu raica na vuravura ena mata vakayalo.

Au qai bulia na ivakatagi vata kei watiqu kei na tolu na luvequ. Keitou sa vakatagi vata ena tabanalevu, tauyavutaka e dua na cau ni ivakatagi me baleta e dua na kakaburaki ni daukaulotu ena Tabana ni Kaulotu na Auckland Niu Siladi, ka lagasere ena dua na koniferedi ni iteki ena initaneti. Au kila na sala e sureta kina na Yalo Tabu na vosa ni Kalou, ena sere ni Lotu, ka rawa ni tara na yalo ena noda matavuvale kei na tabanalevu.

Au tomana tikoga na noqu taleitaka na Mataivakatagi ena Lomanibai ni Valetabu mai na vanua vakayawa, ia au kila ni da sa vakalougatataki nida vakasaqara na madigi meda veiqaravi ka vakacaucautaka na Turaga ena vanua cava ga eda tiko kina kei na sala cava ga eda rawata (raica na Same 150:6). Au vakavinavinaka ni rawa nida wasea na noda ivakadinadina mai na noda isolisoli kei na taledi, oka kina na ivakatagi. Eda sa vakalougatataki, ka da vakalougatataki ira na tani, nida wasea na isolisoli kei na taledi oqori vei ira na luve ni Kalou ka “laveta cake ena vanua eda tu kina.”