2025
Qaravi Ira e Sega ni Vinaka vei Ira na iBoi
Julai 2025

“Qaravi Ira e Sega ni Vinaka Vei Ira na iBoi,“ Liaona, Julai 2025.

Qaravi Ira e Sega ni Vinaka Vei Ira na iBoi

Mai vei Trevor Hinckley

Manidia ni Veitaqomaki, Bulabula, kei na iYaubula ni Lotu

Na icili e gadrevi kina na maqosa kei na yalololoma vei ira kece era vakaitavi kina.

ivakaraitaki ni dua na marama e ceguva tiko e levu na iboi kaukaua

Droini mai vei Elia Sampo

Sa veisureti na noda iVakabula vei “ira kecega me ra lako mai vua ka vakaivotavota ena nona vinaka ka sa sega ni bureitaka vua e dua sa lako mai vua” (2 Nifai 26:33). E dua na sala bibi eda lako mai kina vua na iVakabula o ya ena noda lako i lotu ka vakaitavi ena itaviqaravi ni lotu. Ena so na gauna, e levu na vuna e rawa ni bolebole kina na lako i lotu. E rawa ni dredre sara vua e dua e vakaleqai tu vakayago, ca vua eso na ka, se so tale na ituvaki vakavuniwai.

Nida tisaipeli i Jisu Karisito, eda vinakata mera vakila na tamata kecega nira sa kidavaki ka rawa nira lako i lotu kei na itaviqaravi. Me kena ivakaraitaki, eda na vakaraitaka na noda veinanumi vei ira na tamata e dau ca vei ira eso na kakana ena noda vakarautaka na sakaramede ena digidigi sega kina na gluten. Oqo e vakarautaka e dua na sala vei ira na tamata yadua oqo mera vakaivotavota ena sakaramede ka vakavouya na veiyalayalati tabu vata kei na Turaga.

Eso na lewenilotu e dau dredre mera lako i lotu se so tale na soqoni raraba ena vuku ni sega ni vinaka vei ira na iboi ni wainimate me vaka na sede kei na ivakaboi. O ira na tamata e tauvi ira na ceguoca, cata na iboi, se so tale na wainimate dau kauaitaka vakalevu na iboi wainimate, ka rawa ni lako vakaca vei ira. Me vaka ga na lako vakaca ni kakana, e sega ni rawa nio kila ni dau lako vakaca vua na iboi ni wainimate ena nomu raici ira walega. Ena yaco kina, ni sega ni dau laurai na ituvaki oqo, ia e tara vakalevu na nona rawa ni cakava na tamata o ya na veika eso ni bula.

iVakatakilakila

E duidui na ivakatakilakila ni mate, e rawa ni okati kina na lomaocaoca, via moce, mosi ni ulu, oca, nuiqawaqawa, leqa ni icegu, mosi ni sere kei na itilotilo, kei na vuqa tale.

Na ivakatakilakila e dau yaco mai na kena e malumu kina kaukauwa sara. E dua beka na tamata ena tauvi koya na mosi ni ulu ka na seyavu ni oti ga e vica na auwa, e dua tale ena bibi sara me yacova yani e vica na siga se me cicivaki sara kina i valenibula.

Na sega ni veiriti kei na wainimate e rawa ni vakaleqa na nona bula e dua na tamata ka basika kina na yalo me tu duadua. E vakamacalataka e dua na lewenilotu e dau vakila na ivakatakilakila bibi: “Na itaviqaravi ni veisiga, me vaka na volivoli, sikovi ira na itokani, tiko ena soqoni ni Lotu, se kana e rawa ni yaco me dua na bolebole veivakayalolailaitaki. Oqo ena vakavuna na yalo ni rarawa, vulagi, kei na galili. Me kena ikuri, eda dau vakila nida tauri cala eda vakalewai mai vei ira era tu wavoliti keda era sega ni kila na noda tauvimate ka ra nanuma nida nanumi keda ga ka vakacalai baleta nida ‘sega ni taleitaka na iboi.’”

E dua na tama kei luvena tagane a tauvi rau na ceguoca ca sara vakalevu ka vakavuna na iboi wainimate. A vakavakarau tiko na luvena tagane me vosa ena soqoni ni sakaramede ni bera ni biubiu i kaulotu. Ena macawa ni bera na nona vosa, a tukuna o bisopi vei ira na lewe ni tabanalevu ni dau dredre sara nona cegu na cauravou oqo ni boica na iboi kaukauwa ni ivakaboi ka kerei ira na lewenilotu me ra nanuma tiko oqori ni ra lako mai ki lotu ena macawa ka tarava. A yaco oqo me Sigatabu vinaka duadua erau a bau tiko kina e lotu na tama kei na luvena tagane.

iCili

Ena dua na soqoni ni Lotu, e dua na tamata e dau cata na iboi ni wainimate ena rawa ni digitaka me dabe vakayawa mai vei ira na tamata. Vei ira tale eso, ena rawa ni gadrevi vakalevu cake na veivuke, me vaka na kena vakasavasavataki na mata ni icegu, kauta mai e dua na ivakasavasava ni cagi ki lotu, se sarava na soqoni ni sakaramede ena initaneti.

Se cava ga na kena bibi na kena dau lako vakaca vua e dua na tamata na iboi ni wainimate, sa ka bibi me nanumi tiko ni oqo e dua na kauwai dina. Na icili e gadrevi kina na maqosa kei na yalololoma vei ira kece era vakaitavi kina. Era dau vakayagataka na tamata na ivakaboi ni yago kei na sede tale eso baleta e levu na ka, me vakataka na bula savasava se bulabula ni tamata yadua. Ena gadrevi na veidokai kei na veiciqomi me wali kina na nodra gagadre kece era vakaitavi kina.

Kevaka e dau lako vakaca vei iko na iboi ni so na wainimate, yalovinaka veivosaki kei na dua na lewe ni nomu matabisopi. E dina ni na sega beka ni rawa na icili ena ituvaki kece sara, ena veivuke mera kila na iliuliu ni tabanalevu na veika o gadreva. E rawa ni cakacaka vata kei iko na matabose ni tabanalevu me tovolea na nodra vinaka taucoko me rawa ni sotavi kina na lako vakaca vei iko na iboi ni wainimate. Na iwalewale dodonu ena duidui vakatau ena ituvaki ka dodonu me veiraurau ena dua na kila ka ka sega ni rawa ni walia na noda gagadre kece sara na ituvaki kece sara.

ivakaraitaki ni ivoli e vakavuna na iboi kaukauwa

Eso na vakasama me baleti ira na iliuliu:

  • Vukei ira na lewenilotu mera kila ni veivakaleqai ni iboi ni wainimate e dua na kauwai dina sara vei ira era vakaleqai tu kina.

  • Vakarautaka na itukutuku kei na ivakananumi e veigauna me baleta na sala e rawa nida yalololoma kina vei ira tale eso dau vakaleqai ira na iboi ni wainimate kei na ituvaki vakavuniwai tale eso kei na sala e rawa nida vukei ira kina na tamata kecega mera mai duavata ena sokalou vua na Turaga.

  • Vakasamataka mo kaciva e dua na kenadau ni vakaleqai ni yago ena tabanalevu se iteki me veivuke ena kena wali na veika oqo kei na veika tale eso.

  • Vakasamataka mo tauyavutaka e dua na soqoni ni veituberi me baleti ira na iliuliu kei na lewenilotu ena veivakaleqai ni wainimate kei na ituvaki tale eso ka na rawa ni vakaleqa na nona mai vakaitavi e dua ena soqoni ni Lotu.

Eso na vakasama me baleta na nodra kauwaitaki:

  • Vakarautaka na madigi vei ira na tamata era dau vakaleqai ena iboi ni wainimate mera wasea na nodra gagadre kei na kauwai vei ira na iliuliu ni tabanalevu.

  • Kevaka e rawa, cakava na nomu vinaka taucoko mo vakayagataka na idusidusi ni soqoni kei na itaviqaravi ka rawa kina vei ira na tamata era vakaleqai tu mera tiko vakacegu.

  • Vakasamataka mo vakarautaka na nodra dau vakayagataka na soqoni ena initaneti vei ira era sega ni rawa ni tiko rawa ka solia na sala mera vakaivotavota kina na tamata oqo ena sakaramede.

  • Vakayagataka ga na ka e vakadonui ka vakarautaka na timi ni iyauqaqa ni valenilotu ni Lotu. Kevaka e dua na iyaya tudei e vakavuna tiko e dua na leqa, cakacaka vata kei manidia ni iyauqaqa me vakadikeva na veika tale eso. Kevaka era kauta mai na lewenilotu na nodra ivakaboi ni cagi se na iyaya ni sasamaki, na iyaya oqori ena rawa ni vakatubu leqa vei ira era cata na iboi ni wainimate.

  • Vakasamataka na vakatubuleqa ni wainimate ni tuvanaki ni itaviqaravi.

  • Nanuma tiko ni so na tamata era dau cata na iboi ni wainimate era na vinakata mera veiqaravi ena dua na vanua e taqomaki vinaka vei ira.

E vakavulica o Elder Patrick Kearon ena Kuoramu ni iApositolo Le Tinikarua: “Vei ira era nanuma ni ra sa biu tu se tu ena iyalayala, ena bibi sara na raragi ni [noda] veikidavaki. Kena ilutua, e rawa nida taorgi keda ena nona nanuma na noda iVakabula se me vakacava na noda auwa ni sakaramede. Me vakaivei na ka e vinakata ena nodra kidavaki, kauwaitaki, vakamamautaki, ka lomani na Luvena? Me vakacava beka na ivakarau ni yaloda e vinakata o Koya ena noda lako mai meda vakavoui ena noda mai vakananuma ka sokalou Vua?”

Ni kilai raraba na leqa oqo, era na rogoci, rokovi, ka vakaitavi vakavinaka cake ena nodra tabanalevu se tabana o ira era dau cata na iboi ni wainimate. Nira cakacaka ena yalololoma kei na masumasu na matabisopi kei na matabose ni tabanalevu vata kei ira na tamata era vakaleqai tu ena mataqali bula vakaoqo, era na vaqaqacotaki e vuqa na luvena na Tamada Vakalomalagi ni sa soli vei ira na madigi cecere cake mera toro voleka yani vei Jisu Karisito. Ni sa soqoni vata mai e dua na tabanalevu, “sa vauci vata na yalodra ena duavata kei na loloma” (Mosaia 18:21), era sa tarai ka vakabulai na yalodra.