Vakalomavinakataki ni Moce mai vua na Turaga

Droini mai vei David Malan/Malan Creative

Ni se qai vula 10 na imatai ni luvei keirau o Caden, keirau a biuti koya kei watiqu, o David vei rau na noqu itubutubu me rau qaravi koya ena imatai ni gauna. Keirau a lako me keirau vakayakavi ka qai gole kina dua na vale ni iyaloyalo. Ni keirau sa taura na keirau popcorn ka dabe sobu, a qiri mai o tinaqu.

Sa sega ni cegu tiko na luvei keirau, ka sa cici tiko mai ena dua na lori ni valenibula!

Keirau draiva yani ki vale ena dua na taqaya ka cici yani ki loma me keirau raici Caden ena ligai tinaqu, ka matadredredre vei ira na dauveiqaravi. E vinaka tu, ia a tauvi koya e dua na mate.

Era sega ni kila rawa na vuniwai na vu ni nona tauvi mate se rua na mate veitaravi, ia era sa solia na wainimate me veivuke. Ni se qai imatai ni luvequ, au a kurabui sara ga. E vaka me vinaka o Caden, ia a kuretaka na noqu vakabauta na veika au sotava. Au sa lomaocaoca qai lomaleqa.

Ni oti e rua na yabaki a vakatura e dua na vuniwai ni mona me vakayacora e dua na electroencephalogram (EEG) vei Caden, e dua na vakatovotovo me kilai na cakacaka ni nona mona ni moce tiko. Ke vinaka na kena macala, sa rawa me muduka na nona tauri wainimate.

Au leqataka na vakatovotovo baleta ni sa sega ni moce o Caden ena dua na yabaki sa oti. Me na moce vakacava ena valenivolavola ni vuniwai osooso ka vakalivaliva taucoko na uluna?

Ena bogi ni bera na vakatovotovo, a solia o David vei Caden e dua na veivakalougatataki ni matabete. Ni sa tekivu na veivakalougatataki, au vakila na kaukauwa ni iserau ni Yalotabu. Au kila ni sa na VINAKA mai na veika kece. Oqo na imatai ni gauna me tekivu mai na imatai ni nona tauvi mate au vakila kina na vakacegu.

Ena siga ka tarava era a vakacobara na vuniwai na electrodes kina ului Caden. Keirau qai biuti koya ena teveli ni vakatovotovo ka bokoca na cina.

A moce ena vica ga na miniti. Oqo ena rairai sega beka ni vaka e dua na cakamana, ia sa sega tu ni dau moce vakataki koya me sivia e dua na yabaki.

E sega ni guilecavi keirau na Tamada Vakalomalagi. A tiko e kea na Yalona ena valenivolavola ni vuniwai oya, ka vakacegui Caden ka vakacegui au. A veisau na noqu rai me baleta na veivakatovolei kei na veivakalougatataki ni matabete ena siga o ya. Au vakadinadinataka vei kemuni ni ka dina na kaukauwa ni matabete.

Sa itabagone qase cake o Caden ena gauna oqo. E se bera ni tauvi koya e dua na mate me tekivu mai na gauna e se gonelailai kina. Sa sotava oti o koya eso tale na bolebole ia sa vorata e vuqa vei ira. Au kila ni dau wanonovi koya tikoga na Turaga ka vakamalumalumutaka na noqu rere (raica na Luke 8:50).