Kar Kiki Aenōm̧m̧an ilo Irooj

Kōmeļeļe jān David Malan/Malan Creative

Ke m̧aanje in ajri nejūmim, Caden, ekar 10 an allōn̄, kom̧ro ļeo ippa, David, kar leļo̧k bwe jinō im jema ren lale im ekar kein kajuon aer kōm̧m̧ane. Kom̧ro ekar diwōjļo̧k im kejota innām tokālik etal n̄an juon m̧ōn alooj pija. Ālkin wōt am̧ro wia popcorn eo kijemro im jijet, jinō ekar ko̧o̧ļtok.

Nin̄nin̄ eo nejūmim ejaje menono, im juon waan ambulance ekar etal!

Kom̧ro ekar ettōr n̄an m̧weo ilo ikūm̧kūm̧ im kakōtkōtļo̧k lowaan m̧weeo im lo Caden ej pād ilo pein jinō, ettō̄n̄dikdikļo̧k n̄an paramedic ro. Ekar em̧m̧an an pād, bōtaab ekar dibūbbūb.

Taktō ro rekar jab maron̄ kwaļo̧k ta eo ekar kōm̧m̧an menin an dibūbbūb ak ruo kattōn dibūbbūb, ak rekar letok uno ko n̄an jipan̄. Āinwōt juon eo ej kab wōr nejin, ikar likkuun inepata. Ekar EM̧M̧AN an Caden pād, ak en̄jake in ekar kam̧ōjņo̧ik tōmak eo aō. Ikar jino obrak kōn eddodo im inepata.

Ruo iiō tokālik juon taktō in kōmlij ekar elmakote bwe ren kōm̧m̧ane juon teej n̄an etale kōmlij eo an Caden, juon teej eo enaaj kar jon̄e m̧akutkut ko ilo kōmlij eo an n̄e ej kiki. Eļan̄n̄e tōprakin teej eo enaaj em̧m̧an, emaron̄ bōjrak jān an bōk uno in dibūbbūb.

Ikar inepata kōn teej eo kōnke Caden ejako an kiki in raan ilo iiō eo ļo̧k. Elmen am̧ro naaj kakiki e ilo juon opiij an taktō eboub ippān to in teej ko ilo aolepen bōran.

Bon̄ōn eo m̧okta jān iien teej eo, David ekar leļo̧k juon kōjeraam̧m̧an an priesthood n̄an Caden. Ke ekar jino kōjeraam̧m̧an eo, ikar en̄jake an kajoor in Jetōb pād. Ikar jeļā bwe aolep men renaaj kar em̧m̧an. Ij kab bar en̄jake aenōm̧m̧an jān iien eo jinointata in an kar dibūbbūb.

Raan eo tok juon taktō ro rekar kōļaake to in teej ko ilo bōran Caden. Innām rekar kōbabuki ioon tābōļ in teej eo im kune ļait ko.

Ekar m̧ōkaj an kiki. Menin maron̄ kar jab kile bwe ej juon kabwilō̄n̄lōn̄, ak ejjan̄in kar kiki in raan ippān make ilōn̄inļo̧k juon iiō.

Jemedwōj Ilan̄ ejjan̄in kar meļo̧kļo̧k kōm. Jetōb eo An ekar pād ilo opij eo an taktō ro, kaenōm̧m̧an Caden im kōkajoor eō. En̄jake eo aō kōn māllijōn̄ im kōjeraam̧m̧an ko an priesthood ekar oktak ilo raan eo. Ikar jeļā bwe kajoor in priesthood eo ej m̧ool.

Caden ej kiiō juon rūm̧m̧an ded. Ejjan̄in bar dibūbbūb jān ke ekar juon nin̄nin̄. Em̧ōj an kar jeļm̧ae apan̄ ko jet bōtaab em̧ōj an eļļā jān eiten aoleper. Ijeļā bwe Irooj ejjab bōjrak an lale e im joļo̧k aō mijak (lale Luk 8:50).