“Kweilo̧k an ro Ripālele: Ejaake Mōņōņō eo Em̧ool ilo M̧are,” Liaona, Juļae 2025.
Kweilo̧k an ro Ripālele: Ejaake Mōņōņō eo Em̧ool ilo M̧are
Ripālele ro, āinwōt mijenede ro, remaron̄ kōjerbal ko̧o̧njeļ an kampānien n̄an kōkm̧anm̧anļo̧k jemjerā eo aer.
Āinwōt juon rijikuuļ in college eo em̧m̧an ded ej ekkatak katak ko kōn aenōm̧m̧an im pok ko, ekar ļap aō ikdeelel ilo jabdewōt jerbal eo me emaron̄ kōjerbale n̄an kōkm̧anm̧anļo̧k pok ko. Juon iien ekōnono ekar ukōt mour e aō ke juon m̧ōtta ekar kwaļo̧k tok n̄an eō juon bun̄tōn me ijjan̄in kar ron̄ kake m̧okta: kweilo̧k an ro ripālele.
Ke ekar kwaļo̧k kōn mijen eo an, eo m̧ōtta ekar ba n̄an eō bwe ko̧o̧njeļ eo an kampānien ej juon jekjek eo ej bōk jikin aolep iien ijo mijenede kampānien rej ekōnono kōn ekōjkan aer jerbal ippān doon im ekōjkan aer em̧m̧anlo̧k. Eo m̧ōtta ekar lo an jerbal in jipan̄ āinwōt juon mijinede jon̄an ekar karōk bwe enaaj kōjerbale ilo mour in m̧are eo an juon raan. Ļōmņak in ekar rum̧ļak ilo būruō. Ikar riit kake ko̧o̧njeļ an kampānien ilo Kwaļok Gospel eo Aō im ekōnono kake ippān mijenede ro em̧ōj aer mijen kōn en̄jaake ko aer kake. Ikar lo wāween an ko̧o̧njeļ ko an kampānien, ejjeļo̧k oktak jān ko̧o̧njeļ ko an baam̧le, maron̄ kar kōjerbale n̄an ekōnono kake im bōbrae elōn̄ pok in kakkure ko jej jelm̧aik ilo jemjerā ko ad rainin.
Kom̧ro ļeo pāleeō, James, kar jinoe kōm̧m̧ani ko̧o̧njeļ ko an ripālele m̧okta jān am̧ro kar m̧are. Ij keememej wōt kweilo̧k eo am̧ro jinointata. James ekar peļļo̧k būruon, jouj, meļeļe, im kōņaan bōk ļōmņak ko aō ilo m̧ool jon̄an ikar en̄jake peran ilo maron̄ eo aō n̄an kalōk juon m̧are elem̧ōņōņō.
Kiiō ilo mour eo am̧ro ippān doon, kom̧ro ej wōnm̧aanļo̧k ilo iminene in kweilo̧k an ripālele aolep wiik. Ilo an jemjerā eo am̧ro jab weeppān, kōmij jim̧ōr errā bwe elōn̄ iien ko kōm kōm̧m̧ani rekar jipan̄ kōm lo m̧ōņōņō em̧wilaļļo̧k im tōprak ilo mour in pālele eo am̧ro eļapļo̧k jān am̧ro kar ļōmņak en kar tōprak.
Lo Oktak ko āinwōt juon Iien Em̧m̧an
Anij ekar kōm̧anm̧an juon laļ eo me E ekar ajeeje elōn̄ kattōn im kōm̧m̧ani oktak ko ie, im “lo bwe em̧m̧an” (Jenesis 1:10, 12, 18, 21, 25). Oktak eo aiboojoj ej juon im̧we me ej kwaļo̧k oktak ko ilo en̄jake im ļōmņak ko ippān aolepen ajri ro nejin Anij. Men̄e emaron̄ kamijak n̄an ļōmņak bwe ripālele ro eļap aer m̧ool ilo m̧are ko aer ewōr aer ļōmņak ko reoktak jān doon kōn unin kōnono ko reaurōk, jejjab aikuj mijak. Ippān Rilo̧mo̧o̧r eo āinwōt juon ad waanjon̄o̧k, jemaron̄ kāālet n̄an kepaak oktak kein jekjek ko ilo iakwe, kapeel, im kōketak me rej tōl n̄an uaak ko redipio im jemjerā ko relem̧ōņōņōļo̧k.
N̄e jej m̧ad ippān doon ilo jekjek in eutiejļo̧k im ekwojarjarļo̧k, jej meļeļe bwe ejjeļo̧k menin aikuj n̄an jim̧ōr ire ak jab kea kōn ļōmņak ko an doon, jerbal in ippān doon in ejjab Kōn kōmālmel, oktak ko renaaj jino loi āinwōt iien ko rem̧m̧an n̄an ekkeijel ijjeļo̧kin aer kein kabbōjrak ko. Iakweelel naaj bōk jikin kōn jerbal ippān doon, lōke, im iakwe.
Ko̧o̧njeļ an kampānien, ewōr ie iakwe eo an Kraist, emaron̄ ukōt pok n̄an juon kōjeraam̧m̧an ilo jemjerā eo am̧ make. Erkein ej emen kein jipan̄ ko n̄an jipan̄ eok ijjinoe.
Kōm̧m̧ane Ami Make Kweilo̧k an ro Ripālele
1. M̧ool
Ļōmņak in jerbale ippān doon n̄an kōkm̧anm̧anļo̧k jemjerā eo am̧ ilo am̧ kōm̧m̧an kweilo̧k an ro ripālele aolep iien, men̄e ej n̄an kōmālmel wōt ilo jon̄an iien eo em̧ōj karōke. Jerbal eo eban em̧m̧an an jerbal eļan̄n̄e ejjeļo̧k dipio in bōk koņaam jān ripālele ro jimor.
2. Ejaake juon unin tōl
Jemjerā eo am̧ ewōr ie kajoor ko rejenolo̧k, m̧ōjņo̧ ko, im aikuj ko. Ilo am̧ ļōmņak kake menin, lale unin kōnono ko me remaron̄ en̄jaki ke rej aorōk n̄an kōnono kaki kweiklo̧k an ro ripālele, ko āinwōt amiro epaake doon, wāween nejnej ko, jikejuuļ, ak jāān ko.
Ilo am̧ kōm̧m̧an jikin unin kōnono kein aolep iien ilo agenda eo am̧, kwonaaj kōm̧m̧an jikin ļōmņak ko im en̄jaake ko me ren kar waļo̧k wōt ilo iien illu im bōlen remaron̄ jab waļo̧k.
3. Jikejuuļi juon iien ekkar im pojak
Ļōmņak in kōjenolo̧ke juon jejjōt in iien n̄an kweilo̧ an ro ripālele eo ami. Kāālet ta eo enaaj em̧m̧an an jerbal n̄an eok innem m̧ool n̄an ped ijo, pojak n̄an ron̄jak kōn būruon meļeļe, n̄an kwaļo̧k ilo ejjeļok eņojak, im jouj. Komaron̄ barāinwōt kōņaan kakoņe men ko kwar jeiki jān iien ko̧o̧njeļ an kampānien eo am̧. Men ko jekar jeiki jān wiik eo m̧okta rejipan̄ kōj ilo ad kōpopo n̄an session ko tok jet.
Jeje noot ko enaaj bar jipan̄ eok keememej —ilo naan ko an Būreejtōn Spencer W. Kimball (1895–1985)—“am̧ anjo̧ jān menin kapo ko, am̧ mour jān am̧ kar wōtlo̧k, am̧ eddōkļo̧k n̄e aolep men im marok, [im] am̧ lan̄lōn̄ n̄e kwoj [tōprak].” kom̧ro James ej kam̧oolol eļap bwe kom̧ro ekar kakoņi ļo̧o̧k ko in ekepaak 800 session in ko̧o̧njeļ an kampānien ko kom̧ro kar kōm̧m̧ani ilo iiō ko. Ej juon menin lan̄lōn̄ n̄an erreilikļo̧k im loe eo jon̄an am̧ro eddōkļo̧k.
4. Niknik
Kweilo̧k an ro ripālele emaron̄ kajookok ak kamijak jinoin, bōtaab enaaj pidodoļo̧k ilo am̧ kōm̧mane wōt. Ilo am̧ kōm̧m̧ane aolep iien, kwe im eo pāleem enaaj bauri jorrāān dikdik ko m̧okta jān aer erom jorrāān ko reļļap.
Ejjeļo̧k kar kōtmene, juon iaan iien akweel ko rekōmmetak kom̧ro James ekar ioone ekar ilo iien kweilo̧k an ro ripālele. Lokjak eo ekar m̧ōkaj im ilo ejjeļo̧k kōtmene eļļā lōn̄ļo̧k itulikin am̧ro bōk an doon meļeļe, im kom̧ro ekar jim̧ōr metak ilo jekjek eo. Bōtaab lokjak eo ekabūrom̧ōjm̧ōj me ekar ijjinoe ilo iien ko̧o̧njeļ an kampānien ekar barāinwōt kajim̧we ilo iien ko̧o̧njeļ an kampānien. Kōm ekar jeļā bwe enkar bar wōr am̧ro iien ilo wiik eo tok juon im bar eo tok juon.
Kōn menin ālkin juon wiik in kejokļo̧kijeņ im kamed būruōd, kōm̧ro ekar bar kajjion̄, im āliktata jerbal kōn oktak ko am̧ro jān doon. Ekar kajoor aō en̄jake “aenōm̧m̧an eo an juon make im juon ļapļo̧k in kajoor in jetōb eo ej im̧we jerbal eo ej alikkar” kar kallim̧uri kōj kake n̄e jenaaj kajim̧we lokjak ko ilo wāween eo an Irooj. Aolep lokjak ko jej kajim̧we kōn kapeel im iakwe enaaj un kōj m̧aanļo̧k im karuwaineneiktok eļapļo̧k im̧we jān Jetōb Kwojarjar ilo jemjerā ko ad.
Emaron̄ wōr iien ko me kwoj en̄jake ke ejjeļo̧k menin lokjak ilo jemjerā eo am̧, kōn menin kwomaron̄ po n̄an kejool iien ko̧o̧njeļ an kampānien. Kom̧ro ļeo ippa kar kāālet n̄an jab kōm̧m̧ane menin. Ej iien ko kaņe n̄e ko̧o̧njeļ an kampānien emaron̄ juon iien elem̧ōņōņō—n̄e jej ekōnono kōn ta eo ejim̧we jej kōm̧m̧ane, ettōn̄ ippān doon, kwaļo̧k ļōmņak ko rem̧wilaļ, im kōm̧man kein kakeememej.
Kallim̧ur Eo
Jemedwōj Ilan̄ ekar kōm̧anm̧an kōj ilo ad jenolo̧k jān doon innām karōke kōj n̄an jemjerā ko. E ej kōtmene ad jerbale oktak ko ad, ejjab ilo iakweelel (lale 3 Nipai 11:29) ak kōn iakwe erreo an Jisōs Kraist, kōnke E ejeļā ke enaaj kepaak kōj n̄an doon im kepaak kōj n̄an E (lale Matu 5:9; Moronai 7:48).
Būreejtōn Russell M. Nelson ekar letok n̄an kōj kūr ippān juon kallim̧ūr: “Jen kwaļo̧k bwe ewōr juon wāween eaeņōm̧m̧an im kautiej n̄an ņa mejļan unin kōnono rekapokpok im juon iaļ in kōmeramļo̧k n̄an jerbali jab errā ko ad. Ilo am̧ kwaļo̧k iakwe erreo eo me rikaļoor ro rem̧ool an Jisōs Kraist rej kwaļo̧k, enaaj kanooj ļap an Irooj kōļapļo̧k kijejeto ko am̧.”
Jemaron̄ wōnm̧aanļo̧k ilo iaļan bujen eo, obrak kōn peran ilo kallim̧ur eo jān rikanaan eo ad ejitōnbōro. Jemaron̄ barāinwōt kajim̧we lokjak ko ad kōn kapeel im tūriam̧o, “kōm̧m̧an bwe [būruōd] ren kuk ippān doon ilo bōrokuk im ilo iakwe n̄an doon” (Mosaia 18:21).