“Kappukot Lan̄lō̄n̄ Ilo Iaļ in Jibadek eo Am̧ ilo Gospel in,” Liaona, Juļae 2025.
Kappukot Lan̄lō̄n̄ Ilo Iaļ in Jibadek eo Am̧ ilo Gospel in
Tōprak eo eļaptata jān ad kwaļo̧k iakwe eo ad n̄an Irooj jān ad kejparok kien ko An ej kōjeraam̧m̧an ko me rej boktok m̧ōņōņō im lan̄lōn̄.
Pija in membōr ro an Kabun̄ in ilo Thailand rej lan̄lōn̄ jān Christina Smith.
Ilo iien eo ikar jerbal āinwōt juon mijen ritōl ilo Japan jet iiō ko remootļo̧k, ikar etal n̄an juon kweilo̧k ilo jem̧ļo̧kin wiik eo ilo juon bukwōn edik ilo juon iaan kona ko jabōntata ilo mijen eo am. District būreejtōn in ekar karōke bwe in kōm̧m̧ane juon intōrpiu ippān juon em̧m̧aan eo ekar kobatok ilo Kabun̄ in juon iiō m̧oktaļo̧k im ekar kappukot n̄an bōke juon an pepa in mālim n̄an deļo̧n̄e tampeļ. Em̧m̧aan in ekar kōjatdikdik n̄an bōk menin letok kwojarjar eo an make ilo ak ipaakeļo̧k an tōpar juon iiō in an peptaij.
Ilo iien ekōnono eo am̧ro, membōr in ekāāl ekar kōmeļeļeik eo jon̄an an ļap an kam̧oolol kōn jon̄an kōjeram̧m̧an ko reļļap ekar bōki ilo iiō eo jān ke ekar peptaij. Ekar em̧m̧an ippān kobatok ilo kweilo̧k eo an kwojkwoj eo aolep wiik im kweilo̧k ko jet. Ekar jino an ļap an bōk koņaan ilo m̧akūtkūt ko an branch eo an. N̄an n̄a, ekar wōr ippān juon peran ilo bujen eo ekar waļo̧k kōn wōt an meļeļe un eo an aorōk ilo gospel in, eo ekar kiiō juon m̧ōttan eo aorōk ilo mour eo an. E ekar juon eo rikaļooran Kraist eo em̧ōj an oktak eo ekar en̄jake juon oktak eļap ilo būruōn. (lale Mosaia 5:2).
Aolepen ekōnono eo am̧ro ekar ettōr wōt ilo jon̄o̧k eo eļap kōjatdikdik ie. Kom̧ro ekar kōmeļeļe kōn kain̄i ko im bujen ko me renaaj kar m̧ōttan an etal n̄an tampeļ. Ekar uwaak ilo an erre ilo kajjojo iaan kajjitōk ko rej ekkeijel n̄an bōk juon pepa in mālim n̄an deļo̧n̄e tampeļ.
Ālkin intōrpiu eo, ij kemeemej aō kar ba n̄an district būreejtōn eo kōn jon̄an aō kam̧oolol bwe ikar ioone juon em̧m̧aan eļap an em̧m̧an. Ikar ba n̄ane kōn eo jon̄an an utiej būruo bwe mijinede ro im membōr ro rekar loe, im kar naajdrik ilo jetōb, juon eo eļap an kajoor im lōke.
Ikar bwilōn̄ ke district būreejtōn eo ekar kwaļo̧k n̄an eō ke em̧m̧aan in ekar jinoe bōk katak ko ippān mijenede ro im jinoe kobatok ilo jar juon iiō emootļo̧k, ekar ejjeļo̧k jikin an jokwe im ilo eļap jekjek ko elap an ben—ekepaak ejjeļo̧k kōjatdikdik. Kiin district būreejtōn eo ekar kōmeļeļeik wāween an ekkatak kōn gospel eo an brother in im oktak eo an ilo allōn̄ ko rekar tōļļo̧k n̄an oktak eo an ekabwilōn̄lōn̄, likūt ilo iaļ eo ekitbuuj un̄n̄are peid make ilo jetōb im ilo ānbwin im leļo̧k n̄an e juon un im lan̄lōn̄.
Gospel in ekar leļo̧k n̄an e pija eo alikkar kōn unin mour eo an. Mool ko an gospel in realikkar im reaorōk rekar boktok uaak ko reaorōk kōn mour in, ijjinoe kōn jeļāļo̧kijeņ eo bwe “Anij ej Jemed Ilan̄, im jej ajri ro Nejin. … Anij ejeļā kōj kajjojo im ej iakwe kōj.” Ilo karōk eo An, “Jemedwōj Ilan̄ ekar … letok elōn̄ menin letok ko im tōl ko n̄an jipan̄ kōj bar ro̧o̧l n̄an im̧aan Mejān.”
Kōjeraam̧m̧an rōt in rekar n̄an e, eo ej ped ilo ejjeļo̧k kalijōkļo̧k n̄an aolepen ajri ro nejin Anij kōn gospel eo an Jisōs Kraist.
Unin Mour In
Kōnke Jisōs Kraist ekar kōjepļaaktok gospel eo An kōn Rikanaan Josep Smith, “ewōr ad jeļā kōn unin mour in, kōn wōn kōj,” Būreejtōn M. Russell Ballard ekar katakin (1928–2023). Ilo naan in kam̧ool eo an āliktata n̄an Kabun̄ in, Būreejtōn M. Russell Ballard, kar Ripinej Jenkwan Būreejtōn eo jān Doulul eo an Jon̄oulruo Rijilōk ro, ekar ba:
Jej jeļā wōn in Anij; jej jeļā wōn eo Rilo̧mo̧o̧r, kōnke ewōr ippād Josep, eo eaar etal n̄an bukun wōjke ko āinwōt juon ļaddik, kappukōt jeo̧rļo̧k in jerawiwi ko an. …
“Ij bwilōn̄, im ij tōmak bwe kom barāinwōt, kōn jon̄an ad jeram̧m̧an n̄an jelā kōn ta unleplep eo ad ilo mour, jej ta ijin, ta eo jej aikuj kajjeon̄ kōmmane im kadedeļo̧k ilo mour kein ad kajjojo raan.”
N̄an membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata, jeļā eo ekūtbuuj juon meļeļe kōn “karōk eo eweppān” an Anij kōn mour indeeo. Bar jeļā kake āinwōt “karōk in m̧ōņōņō eo eļap,” “karōk in lo̧mo̧o̧r,” im “karōk in tūriam̧okake” (Alma 42:8, 11, 15), ej “bōk menin ittiņo̧ an mour im men ko ejjeļo̧k ad jeļā kaki kōn ilju im jakļaj.” Men eo auōk n̄an karōk eo ej “katak ko an Kraist,” eo ej unleplep in mour in.
Kōnke eped ipped gospel eo, jejeļā bwe jej ajri ro nejin Anij, kar jilkintok n̄an laļin n̄an māllijon̄e, kōmetal e, im kōpooje n̄an “bōkm̧aantak er jān jerkakpeje eo an ro remej, kōn anjo̧ im aiboojoj eo an Lamb eo” (Katak im Bujen Ko 76:39). Jejeļā kake kiien ko im kar karōki “ekkar n̄an [ad] jeļā em̧m̧an jān nana” (2 Nipai 2:5). Jejeļā bwe jej ped ilo laļin n̄an iakwe im jerbal. Im jejeļā bwe Rilo̧mo̧o̧r kar kūr kōj n̄an anjo̧ jān laļin im n̄an jipan̄ ro jet kōm̧m̧ane āinwōt in (lale Jon 16:33; Katak im Bujen Ko 64:2) n̄an kōpopo n̄an itok eo An Kein Karuo.
Ilo ad mije E, ta eo Josep Smith ekar ņa etan “ainikien kōkajoor eo an Gospel in an ad Irooj Jisōs Kraist” enaaj kōkajoorļo̧k kōj ilo iien ko reppen im boktok eļap meļeļe n̄an mour ko ad im n̄an mour ko an ro jet.
Every Knee Shall Bow[Aolep Bukwe Naaj Bukwelōlō], jān Dan Wilson
Pokake, Kōjeraam̧m̧an, Lan̄lōn̄
Anij em̧ōj an letok n̄an kōj anemkwoj eo n̄an kāālet bwe jen maron̄ eddoik kāālet ko ad (lale Katak im Bujen Ko 101:78; 2 Nipai 2:16). Āinwōt m̧ōttan “jum̧ae ilo men otemjej” (2 Nipai 2:11), Setan emālim n̄an kapoik kōj n̄an kōjerbal anemkwoj eo ad n̄an kāālet ilo bōd.
Bōtaab Irooj Jisōs Kraist, “jeļā kōn ko̧kkure eo enaaj itok ioon ro rej pād ioon laļ,” ilo raan kein ad, kar kūr Rikanaan Josep Smith, “kōnono n̄an e jān lan̄, im kar leļo̧k n̄an e kien ko” (Katak im Bujen Ko 1:17). Ekkarōk in im Irooj ekar kwaļo̧k kien ko An im maron̄ eo n̄an rikanaan ro An ej wōnm̧aanļok wōt ilo raan kein ad ippān Rikanaan Russell M. Nelson—im kōn ejja un eo wōt. Anij ej kōņaan tōl kōj n̄an m̧ōņōņō ilo mour in im n̄an aiboojoj in selestial ilo mour eo tok juon.
Pokake kien ko an Anij ej aikuj itok jān ad ajeļo̧k kōj im ad iakwe n̄an E. Irooj Jisōs Kraist Make ekar kwaļo̧k bwe n̄an iakwe Anij “ej kien eo m̧okta im eļap” (lale Matu 22:37–38). Ekar letok meļeļe eo em̧wilaļļok ke E ekar kwaļo̧k, “Eļan̄n̄e kom̧ij yokwe Eō, kōjparok kien ko aō” (Jon 14:15).
Ewōr juon jinōkjej jān ad iakwe Irooj im kōjparoke kien ko An. Ilo epepen in E ekar kōmeļeļeik “juon kakien, eo ejjāmin oktak ilo aelōn̄ in lan̄ … , eo aolep kōjeraam̧m̧an ko rej pedped wōt ioon—
“Im n̄e jej bōk jabdewōt kōjeraam̧m̧an jān Anij, e ej jān pokake kien eo me ioon e ej pedped” (Katak im Bujen Ko 130:20–21).
Kōn menin, tōprak eo eļaptata jān ad kwaļo̧k iakwe eo ad n̄an Irooj jān ad kejparok kien ko An ej kōjeraam̧m̧an ko me rej boktok m̧ōņōņō im lan̄lōn̄.
Kalimjōk mour in kōn mejen gospel in em̧ōj an jepļaaktok im revelesōn ko raan kein rej letok n̄an kōj meļeļe. Kōn juon erreiļo̧k eo alikkar kōn kōm̧anm̧anid ekwojarjar im jibadbad eo ad “men ko renaaj kōm̧m̧an bwe mour eo [ad] ioon laļin en lukkuun em̧m̧an emaron̄ in lukkuun ejja men ko renaaj kōm̧m̧an bwe mour [ko ad] indeeo im indeeo en lukkuun maron̄ em̧m̧an!”
Kōjjem̧lo̧k
Ij bōjrak ijo ikar ijjinoe ie, keememejļo̧k en̄jake eo aō iiō ko remootļo̧k ippān juon ri oktaktok ilo Japan. Kōn tiljek eo an im an mijinede ro im membōr ro, ekar loe gospel eo an Jisōs Kraist em̧ōj an jepļaaktok. Ilo an kar loe gospel in, ekar barāinwōt loe un eo an, eo ekar kōdepakpakļo̧k visōn eo an. Ekar barāinwōt loe karōk in m̧ōņōņō eo eļap. Pokake bujen ko an karōk in gospel eo ekar boktok e elōn̄ kōjeraam̧m̧an ko im lan̄lōn̄, ļōn̄aj e ilo ānbwin im jetōb.
Iaļ eo an ekar tōl e n̄an erom̧ juon membōr ilo Kabun̄ eo an Jisōs Kraist ekar kōm̧m̧an bwe en erom̧ juon rikam̧ool an Jisōs Kraist. Elder Patrick Kearon jān Doulul eo an Jon̄oulruo Rijilōk ro ekar kōmeļeļeik lan̄lōn̄ in āinwōt in:
Kōn wōt karōk in iakwe eo an Jemedwōj Ilan̄ n̄an kajjojo ro Nejin, im kōn mour in lo̧mo̧o̧r im mijen eo an ad Rilo̧mo̧o̧r, Jisōs Kraist, jemaron̄—im aikuj—armej ro relem̧ōņōņōtata ioon laļ in! Jekdo̧o̧n n̄e ļan̄ ko an mour in ilo lalin emakijkij an kainepata im jojoontok kōj, jemaron̄ ejaake juon wāween m̧ōņōņō im aenōm̧m̧an itulowa kōn kōjātdikdik eo ad ilo Kraist im ad meļeļe jepād ia ilo karōk in m̧ōņōņō eo elem̧ōņōņō.”
Ij lewaj aō kam̧m̧oolol kōn im naan in kam̧ool kōn, gospel eo emōj an jepļaaktok an Jisōs Kraist, ekoba karōk in m̧ōņōņō eo eļap em̧ōj kalbwini ie. Ij karuwaineneik eo n̄an bōk m̧ōttan le ko an gospel im n̄an en̄jake lan̄lōn̄ ilo mour in ilo am̧ wōnm̧aanļo̧k ilo iaļan jibadek eo am̧ n̄an mour indeeo.