“Rilo̧mo̧o̧r ej Iakwe im Ļōmņak kōn eo Juon,” Liaona, Juļae 2025.
Rilo̧mo̧o̧r ej Iakwe im Ļōmņak kōn Eo Juon
Em̧ōj kar kajjitōk ippād n̄an iakwe im jerbal in karejar n̄an doon āinwōt an kar Jisōs Kraist kōm̧m̧ane—juon ilo̧k juon.
Kōmeļeļe jān Alex Nabaum
Jidik iien ālkin peptaij eo aō ilo O̧kwoj 1984, ikar ron̄ kōn juon m̧akūtkūt ekalimomo ewōr ie al ko im barbecue ejjab ettoļo̧k jān ijo ikar jokwe ie ilo Kwekwe, Zimbabwe. N̄a im ro m̧ōtta kar kijoroor in etal, bōtaab ekar kōm̧m̧an ilo raan in Jabōt. Ro m̧ōtta rekar jab membōr in Kabun̄ in.
Ikar ba n̄an er, “Inaaj etal im jar ak inaaj ko ālkin wōt kweilo̧k in kwojkwoj eo im iwoj ippāmi.”
Ro m̧ōtta, rejeļā m̧ōjņo̧ eo aō, rekar ba, “N̄e kwōkōm̧m̧ane men ņe kwonaaj jako jān an limo. Iien eo kwonaaj itok, enaaj jem̧ļo̧k barbecue eo.”
Eaar wōr aō kālet n̄an kōm̧m̧an. Ij etal im jar ke ij etal n̄an barbecue eo? Ikar kālet barbecue eo bōtaab ikar jeļā ilo Jibbon̄in Jabōt eo ke ekar jab bōk jikin. Ilo iien eo, ekar ejjeļo̧k iien n̄an etal im jar, kōn menin ikar pād wōt ilo ruum̧ eo aō ikar rent e.
Ilo rālepen eo, ikar ron̄ juon ainikien: “Eddie Dupe ej ke jokwe ijin?”
Kar branch būreejtōn eo aō, John Newbold, ippān kōrā eo pāleen, Jean. Ikar kōņaan kitilekeek ium̧win men eo kineeō! Bōtaab m̧okta jān aō maron̄ kōm̧man jabdewōt, rekar jutak tūrin katiin eo ej kōjepel ruum̧ eo aō jān aolepen m̧ween.
“O, Eddie,” rekar ba, “jekar būrom̧ōj bwe jekar jab lo eok ilo m̧ōnjar eo rainin.”
Kōm kar kōnono jidik, im ālkin aer etal, naan ko aer rejouj, “Eddie, jej būrom̧ōj bwe jekar jab lo eok,” Ij kam̧m̧oolol kōn John im Jean Newbold. Jān raan eo, ikar jeraam̧m̧an kōnke rekar jipan̄ eō loe, ilo wāween eo aorōk n̄an eō, an Rilo̧mo̧o̧r iakwe im inepata kōn eo juon.
Juon ilo̧k Juon
Jisōs ekar itok āinwōt juon eo em̧ōj an jerkakpeje n̄an riNipai ro ālkin wōt An kar pād ippān Jemān. E ekar itok n̄an kaenōm̧m̧an armej ro. E ekar karuwaineneik er kōn iakwe:
“Kom̧in jutak im wōnm̧aantak n̄an Ippa, bwe kom̧in maron̄ karum̧ļo̧k peimi ilo katū, im barāinwōt kom̧in maron̄ en̄jake jenkwan dila ko ilo peiū im ilo neō, bwe kom̧in maron̄ jeļā bwe N̄a ij Anij an Israel im Anij an aolepān laļ im kar m̧ane Eō kōn jero̧wiwi ko an laļ.
“… Im men in raar kōm̧m̧ane, wōnm̧aanļo̧k juon ilo̧k juon m̧ae aolep raar wōnm̧aanļo̧k, im kar lo kōn mejaer im en̄jake kōn peier, im kar jeļā ilo m̧ool im kar kam̧ool e, bwe ekar E eo, eo kar jeje jān rikanaan ro, bwe E en kar itok” (3 Nipai 11:14–15; naan ko kar kobaiktok).
Tokālik, Rilo̧mo̧o̧r ekar karuwaineneik er n̄an boktok aolep ro rekar nan̄inmej, metak, ak “m̧ōjņo̧ ilo jabdewōt wāween otemjeļo̧k … im Eaar kōmour er otemjej ke raar bōk m̧aanļo̧k er n̄an E” (3 Nipai 17:7, 9; naan ko kar kobaiktok). Innām E ekar “bōk ro re dik nejier, juon ilo̧k juon, im kōjerm̧m̧an er, im jar n̄an Jemān kōn er” (3 Nipai 17:21; naan ko kar kakkobaba).
N̄an ļōmņak kake bwe 2,500 armej rekar pād ijo ekōm̧m̧an menin aō ettā (lale 3 Nipai 17:25). Ļotak im rūttoļo̧k ilo Africa, ekkā aō pijaikiļo̧k an Rilo̧mo̧or jutak ilo meram in aļ, kōttar n̄an kemour, kaenōm̧m̧an, kōkajoor, im kwaļo̧k iakwe n̄an aolep ro rej itok n̄an E. Āinwōt rikaļoor ro An, em̧ōj kar kajjitōk ippād n̄an iakwe im jerbal in karejar n̄an doon āinwōt an kar Jisōs Kraist kōm̧m̧ane—juon illak juon.
Etal kōn Tōmak
Būreejtōnji eo an Doulul eo an Kōrā ro ak an em̧m̧aan ro ilo ward ak branch eo am̧, kōn mālim eo an bisop ak branch būreejtōn eo, kar karōk eok ippān kajjojo armej ro im baam̧le ko n̄an jerbal in karejar ippāer. Jet iaaer komaron̄ jab lukkuun jeļa kajjeer. Komaron̄ ikūm̧kum̧ kōn loļo̧k er, ko̧o̧ļe er, ak barāinwōt jejeļo̧k. Kwomaron̄ inepata bwe reban kōņaan kadeļo̧n̄ eok ilo m̧oko m̧weer. Bōtaab ritōl ro am̧ raar jar im ļōmņak kake ta meļeļein ijjitōn̄ in emaron̄ n̄an eok im kōjeraam̧m̧an ko emaron̄ boktok n̄an eok im baam̧le in jerbal in karejar ko am̧. Kōn menin, etal kōn tōmak.
Jet iiō ko remootļo̧k, ikar etal ippān stake būreejtōn eo ilo southeastern United States n̄an loļo̧k jet baam̧le ko m̧okta jān juon iien kweilo̧k eļap an stake. Ilo amim kar tōprakļo̧k ilo juon em̧, juon em̧m̧aan ej ekkōņak nuknuk ko rem̧ōr ekar kepaak kom̧ro.
“Ta eo kom̧ij kōņaan?” eaar ikkūrtok. “Ijjab kōņaan bwe armej ren itok n̄an m̧wem̧ō!”
Ikar inepata ke tam̧mwin em̧m̧aan eo ekar oktak im kaleln̄o̧n̄n̄o̧n̄. Ikar kōņaan jibwe stake būreejtōn eo im ko n̄an wa eo! Bōtaab stake būreejtōn eo ekar jab inepata. “Joļo̧k amim bōd,” ekar ba. “Kōmij ļōmņak bisop eo am̧ ekar ba n̄an eok ke kemim ej itok.”
Ke rekar kōnono, ekar kajoor aō en̄jaake Jetōb. Ikar aiin aō peran, kepaakļo̧k em̧m̧aan eo, im ba, “Brother eo aō ejitōnbōro, Būreejtōn Thomas S. Monson [ekar rikanaan ilo iien eo] ekar letok n̄an eō ijjitōn̄ in n̄an itok. Kōmij itok n̄an lotok eok. Ij boktok iakwe eo an rikanaan eo n̄an eok.”
Ikar kalimjek mejān em̧m̧aan eo im kar loe bwe rekar obrak kōn dānnin kemjaļaaļ. Ekar jino an kwaļo̧k apan̄ ko an ippām. Kōrā eo pāleen ekar en̄taan kōn aer in kōmālij. Ejako jerbal eo an. Ekar ejjeļo̧k kijen m̧ōn̄ā n̄an naajdrik ajri ro nejin. Stake būreejtōn eo ekar kalikkar n̄an em̧m̧aan eo bwe Kabun̄ in enaaj jipan̄ e im baam̧le eo an. Ekar juon loļo̧k eo em̧m̧an.
Jet wiik ko tokālik, ikar kajjitōk ippān stake būreejtōn eo eļan̄n̄e ekar wōr naan kāāl. Ekar ba n̄an eō bwe brother eo an bisop eo im ward ko̧o̧njeļ eo rekar jipan̄ em̧m̧aan eo im bwe e im kōrā eo pāleen, eo ekar jab membōr in Kabun̄ in, rekar jinoe bwebwenato ippān mijenede ro.
Jerbal in karejar ej ijjinoe n̄an pukotļo̧k ro jet kōn tōmak im iakwe. Ilo ad etal kōn tōmak, lōke Irooj, jemaron̄ kapputok maden̄ļo̧k jān E kōn karōk ko An im un ko n̄an ad iaiieo ippān kajjojo ajri ro Nejin. E enaaj jipan̄ kōj jeļā ta eo n̄an ba im kōm̧m̧ane im tōl kōj ilo wāween eo n̄an “ineek eddo ko an ro jet, bwe ren maron̄ mera,” “jan̄ ippān ro rej jan̄; … im kaenōm̧m̧an ro rej pād ilo aikuj in aenōm̧m̧an” (Mosaia 18:8–9). Ilo ad kōm̧m̧ane, jenaaj jeļā eo jon̄an an Rilo̧mo̧o̧r lukkuun iakwe eo juon.
Ewi Ļap In Am̧ Naaj lan̄lōn̄
N̄an rainin, ij ennaan wōt ippān John im Jean Newbold. Aolepen iiō kein, ij en̄jake lan̄lōn̄ kōn iakwe eo rekar letok n̄an eō. Im rej en̄jake lan̄lōn̄ ilo aer loe aō eddōkļo̧k ilo gospel in. En̄in ej ta eo ej waļo̧k n̄e jej jerbal in karejar—kōj im ro jej jerbal n̄an er jej epaakeļo̧k doon im ekkeijelļo̧k wōt ippān Rilo̧mo̧o̧r.
Rilo̧mo̧o̧r ekar katakin “aorōk in jetōb ko ekanooj ļap ilo mejān Anij. …
“Bwe eļan̄n̄e āindein bwe kom̧in jerbal lo aolepen raan ko am ilo jan̄ kōn ukweļo̧k n̄an armej rein, im boktok, juon wōt armej n̄an Eō, ewi jon̄an nej lan̄lōn̄ eo am ippān ilo aelōn̄ eo an Jema!” (Katak im Bujen Ko 18:10, 15; naan ko kar kobaiktok).
Eļan̄n̄e jerbal in karejar ejjab juon men eaorōk n̄an eok, Būreejtōn Russell M. Nelson ekar katakin bwe “kōj aolep maron̄ in kōm̧man em̧manļo̧k im maron̄ em̧m̧anļo̧k jān kar m̧okta.” Ij kūr kom̧ n̄an oktak im jinoe juon jino ekāāl. Ij kallim̧ūr bwe ilo am̧ boub ilo jerbal in karejar, kwonaaj lo uwaak ko n̄an apan̄ ko kwoj jelm̧aik kiio.
Kallim̧ur eo an Rilo̧mo̧o̧r eo ej m̧ool: “Bwe jabdewōt eo e kōņaan lo̧mo̧o̧ren mour eo an mour enaaj jako jān e: im jabdewōt eo mour enaaj jako jān e kōn N̄a enaaj lo e” (Matu 16:25).
Kōn jipan̄ eo an Rilo̧mo̧or, kwomaron̄ erom̧ kain brother im sister in jerbal in karejar eo E ej aikuji eok n̄an kōm̧m̧an oktak ilo mour ko an ajri ro nejin Jemedwōj Ilan̄—aorōk aolep kajjojo.