Tōmak eo an Sister Muñoz

Kōmeļeļe jān David Malan/Malan Creative

Ilo 1967, kom̧ro Elder William Danner kar m̧ōttan mijenede ro 20 jinointata n̄an jerbal ilo Colombia. Ekar wōr wōt jidik amim tōprak m̧ae juon em̧m̧aan etan in Raúl, ekar ekkatak ippān bar jet mijenede, ekar kwaļok kajeemim n̄an Muñoz baam̧le. Jetōb ekar kanooj in kajoor ilo amim kar katakin baam̧le eo, kam̧ool kōn Rikanaan Josep Smith im Jepļaaktok eo.

“Ijeļā bwe likao rein rej kwaļo̧k m̧ool eo,” Raúl ekar ba. “Ijeļā bwe epād ippāer ejja priesthood eo ekar pād ippān Jisōs Kraist. Remaron̄ jikinuwe lōn̄ļo̧k kiiō im kōmour leddik eo nejūm̧ epilo, Margarita.”

Sister Muñoz ekar kalimjek eō im kajjitōk, “m̧ool ke?”

Ekar bōņtok būruo. Ijjan̄in kar mālijjon̄e naan in kam̧ool eo aō m̧oktaļo̧k āinwōt in. Ikar jeļā bwe juon menin kabwilōn̄lōn̄ enaaj aikuj tōmak ekajoor. Kom̧ro mijenede eo m̧ōtta kar jeļā tokālik bwe rilale mej ro rekar ba n̄an baam̧le eo bwe Margarita, eo ekar jab loļo̧kijeņ jiljino allōn̄ ko m̧oktaļo̧k ālkin jorāān, ejjāmin naaj kar bar loeļo̧kijeņ.

“Epād ippom̧ ejja priesthood eo āinwōt Jisōs Kraist,” Sister Muñoz ekar ba. “Leddik eo nejū epilo. Jen wallōn̄ļo̧k im kōmour e.”

Ijjan̄in kar ellolo tōmak eļap an kajoor. Kōrā in ekar āinwōt lieo pāleen Kiin̄ Lamonai, eo ekar ba n̄an Ammon “Ij tōmak bwe enaaj āinwōt ekkar n̄an kwaar ba” (Alma 19:9).

Elder Danner ekar kapiti Margarita, im liāpe ekkapit eo. N̄an aō bwilōn̄, naan ko rekar diwōj jān lo̧n̄iū rekar jab aō make: “Kwonaaj mour im bar loeļo̧kijeņ.” Ikar bar en̄jaake in bar ba jet kōjeraam̧m̧an ko, ekoba bwe ro uwaan baam̧le eo renaaj jipan̄ kalōk Kabun̄ in ilo Colombia. Ālkin wōt, ikar ļōmņak eļan̄n̄e ikar kōm̧m̧ani kallim̧ūr ko renaaj kūrm̧ool.

Raan eo tok juon, ļaddik jodikdik eo nejin baam̧le eo ekar ettōrtok n̄an ippemim ilo iaļ eo, ej elam̧ōjmōj, “Menin kabwilōn̄lōn̄! Menin Kabwilōn̄lōn̄! Sister eo aō emaron̄ loļo̧kjeņ!”

Kōm ekar peptaiji 13 armej ilo wiik eo.

Brother im Sister Muñoz rekar erom̧ membōr ro retiljek an Kabun̄ in. Im̧we eo aer, ekoba jerbal eo an Brother Muñoz āinwōt juon eo eutiej ilo custom ilo Colombia, ekar jipan̄ kajeeded gospel eo ijo. Juon nejin leddik ekar jerbale mijen eo an; brother eo an ekar juon bisop. Margarita eaar loļo̧kjen ilo aolepen mour eo an.

Jisōs Kraist ekar ba kōn ro ewōr aer tōmak ilo E, “Ilo Eta renaaj kōpeļļo̧k māj ko mejān ripilo” (Katak im Bujen Ko 84:69). Ijeļā bwe “Men otemjej remaron̄ kūrm̧ool n̄an er ro rej tōmak” ilo Rilo̧mo̧o̧r (Mark 9:23).