“Kajedeed Ainikien Kōjan̄jan̄ ko” Liaona, Juļae 2025.
Ainikien Armej ro Rekwojarjar ilo Raan Ko Āliktata
Kajedeed Ainikien Kōjan̄jan̄ ko
Jemaron̄ aolep pukot jekjek ko n̄an kōjerbal menin letok ko im tōļōn ko ad letok in Anij, ļōn̄aj ilo ijo jej jutak ie.
Kōmeļeļe jān David Malan/Malan Creative
Eto aō kōņaan kōjān̄jan̄ ilo Orchestra eo ilo Tampeļ Square, orchestra eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ij kojan̄jan̄ kake clarinet eo im ewōr aō degree ilo kōjān̄jan̄, ak ejjab meļeļein ke inaaj teru n̄an bōk koņaao.
Ilo m̧ool, ij jokwe ilo New Zealand.
Jetōb Kwojarjar ej kakeememej eō, ijowōtke, bwe in marōn̄ “po buruō” (Alma 29:3) āinwōt juon painieer ilo kōjan̄jan̄ n̄an Kabūn̄ in ilo New Zealand im eria ko jet. Kūr eo aō jinountata ke ekar 18 aō iiō ekar āinwōt juon ritōl kōjān̄jan̄ ilo kūlaaj eo an nin̄nin̄. Jān iien eo, iļak kar jeraam̧m̧an n̄an tōl im kōm̧m̧ani kōjan̄jan̄ ko an stake im ward, im barāinwōt kōjān̄ piano eo ilo Būraimere. Em̧ōj aō kōjan̄jan̄ ipeļaakin New Zealand im ilo Philippine im jipan̄ ilo piano n̄an kōjan̄jan̄ ilo juon iien kajutak juon district ilo Kabun̄ in ilo Shanghai, China. Em̧ōj aō al make iaō ilo Provo Missionary Training Center eo.
Kōjān̄jan̄ ekar dāpij eō ilo Kabun̄ in ilo aolepen iien eo ikar en̄taan kōn inepata im būrom̧ōj. N̄e ij en̄jake aō jab maron̄ kōm̧m̧an jabdewōt, ikar jeļā bwe imaron̄ ba aeet n̄an jipan̄ ilo kōjan̄jan̄. Kōjan̄jan̄ ejipan̄ eō loe laļin kōn mej ko mejen jetōb.
Imaron̄ in kar ejaaki kōjan̄jan̄ ko ippān kōrā eo pāāleō im jilu nejū ajri. Ippān doon, kōm ekar kōjan̄jan̄ ilo ward eo, kar kōm̧m̧ani kōjan̄jan̄ ko n̄an jipan̄ļo̧k missionary broadcast eo ilo Auckland New Zealand Mijen, im kar al ilo juon stake conference ekar kōm̧m̧an imejatoto. Ijeļā wāween an naan an Anij, ilo al ko an Kabun̄ in, karuwaineneik Jetōb Kwojarjar im marōn̄ un̄ur bōro ko ilo baam̧le ko im ward ko.
Ej em̧m̧an wōt ippa Orchestra eo ilo Tampeļ Square jān ettoļo̧k, bwe ijeļā bwe jej jeram̧m̧an n̄e jej kappukot iien ko rem̧m̧an n̄an jerbal im nebar Anij ijoko jabdewōt jej ped ie im ilo jabdewōt wāween ko jemarōn̄e (lale Sam Ko 150:6). Ij m̧ōņōņō bwe jemaron̄ kwaļo̧k naan in kam̧ool ko ad kōn menin letok ko im tōļōn ko ad, ekoba kōjan̄jan̄. Jej jeraam̧m̧an, im jej kōjearam̧m̧an ro jet, ilo ad kōjerbal menin letok kein im tōļōn kein ippān ajri ro nejin Anij “ļōn̄aj ijo jej jutak ie.”