សេចក្តីជំនឿរបស់បងស្រី មូញ៉ូស

ដោយ ហ្គែរី អិម ចនសុន រដ្ឋតិចសាស់ ស.រ.អា.

« អព្ភូតហេតុ ! អព្ភូតហេតុ ! » ក្មេងប្រុសរូបនោះស្រែកនៅពេលគាត់រត់តាមផ្លូវ ។

រូបភាពរបស់ក្មេងប្រុសជំទង់ម្នាក់ដែលចូលទៅជិតអ្នកផ្សព្វផ្សាយសាសនាពីរនាក់

នៅឆ្នាំ១៩៦៧ អែលឌើរ វីលៀម ដានណឺ និងខ្ញុំបានធ្វើជាអ្នកផ្សព្វផ្សាយសាសនាពីរនាក់ក្នុងចំណោមពួកអ្នកផ្សព្វផ្សាយសាសនា ២០ នាក់ដំបូងគេទៅបម្រើនៅប្រទេសកូឡុំប៊ី ។ យើងទទួលបានជោគជ័យតិចតួចរហូតដល់មានបុរសម្នាក់ឈ្មោះ រ៉ាអ៊ូល ដែលពួកអ្នកផ្សព្វផ្សាយសាសនាផ្សេងទៀតបានបង្រៀន ដែលបានណែនាំពួកយើងឲ្យស្គាល់គ្រួសារ មូញ៉ូស ។ ព្រះវិញ្ញាណបរិសុទ្ធបានគង់នៅជាខ្លាំងនៅពេលយើងបង្រៀនគ្រួសារនេះ ដោយថ្លែងទីបន្ទាល់អំពីព្យាការី យ៉ូសែប ស៊្មីធ និងការស្តារឡើងវិញ ។

រ៉ាអ៊ូលបានមានប្រសាសន៍ថា « ខ្ញុំដឹងថា យុវជនទាំងនេះកំពុងនិយាយការពិត ។ ពួកគេមានបព្វជិតភាពដូចដែលព្រះយេស៊ូវគ្រីស្ទបានមានដែរ ។ ពួកគេអាចឡើងទៅជាន់លើឥឡូវនេះ និងព្យាបាលកូនស្រីពិការភ្នែករបស់អ្នក ម៉ាហ្គារីតា » ។

បងស្រី មូញ៉ូស សម្លឹងមើលមកខ្ញុំ ហើយសួរថា « តើវាជាការពិតទេ ? »

ខ្ញុំអួលដើមកនិយាយមិនចេញ ។ ទីបន្ទាល់របស់ខ្ញុំមិនដែលត្រូវបានធ្វើការសាកល្បងដូចនេះពីមុនមកទេ ។ ខ្ញុំបានដឹងថា អព្ភូតហេតុបែបនេះនឹងតម្រូវឲ្យមានសេចក្តីជំនឿខ្លាំង ។ ដៃគូរបស់ខ្ញុំ និងខ្ញុំក្រោយមកទៀតបានដឹងថា អ្នកជំនាញខាងភ្នែកបានប្រាប់ក្រុមគ្រួសារថា ម៉ាហ្គារីតាដែលមិនបានមើលឃើញអស់រយៈពេលប្រាំមួយខែកន្លងទៅក្រោយពីគ្រោះថ្នាក់ នឹងមិនអាចមើលឃើញជារៀងរហូត ។

បងស្រី មូញ៉ូស មានប្រសាសន៍ថា « អ្នកមានបព្វជិតភាពដូចព្រះយេស៊ូវគ្រីស្ទ ។ កូនស្រីរបស់ខ្ញុំពិការភ្នែក ។ តោះ ទៅព្យាបាលនាង » ។

ខ្ញុំមិនដែលធ្លាប់ឃើញសេចក្តីជំនឿដ៏អស្ចារ្យបែបនេះពីមុនមកទេ ។ នាងប្រៀបដូចជាភរិយារបស់ស្តេចឡាម៉ូណៃ ដែលបានប្រាប់អាម៉ូនថា « យើងជឿថា វានឹងដូចជាពាក្យរបស់លោកនិយាយមែន » ( អាលម៉ា ១៩:៩ ) ។

អែលឌើរ ដានណឺ បានចាក់ប្រេងលើក្បាលម៉ាហ្គារីតា ហើយខ្ញុំបានផ្សារភ្ជាប់ការចាក់ប្រេងនោះ ។ ខ្ញុំមានការភ្ញាក់ផ្អើលយ៉ាងខ្លាំង ពាក្យដែលចេញពីមាត់របស់ខ្ញុំមិនមែនជាពាក្យរបស់ខ្ញុំនោះទេ ៖ « អ្នកនឹងបានសះស្បើយ និងទទួលបានការមើលឃើញរបស់អ្នកវិញ » ។ ខ្ញុំក៏មានអារម្មណ៍ថាត្រូវប្រកាសពីពរជ័យផ្សេងទៀត ដោយបន្ថែមថាសមាជិកគ្រួសារនេះនឹងជួយស្ថាបនាសាសនាចក្រនៅក្នុងប្រទេសកូឡុំប៊ីនេះផងដែរ ។ បន្ទាប់មក ខ្ញុំបានឆ្ងល់ថាតើខ្ញុំបានធ្វើការសន្យាដែលនឹងមិនត្រូវបានបំពេញយ៉ាងដូចម្តេច ។

ថ្ងៃបន្ទាប់ កូនប្រុសជំទង់របស់គ្រួសារនោះបានរត់មករកយើងនៅលើផ្លូវ ដោយស្រែកថា « អព្ភូតហេតុ ! អព្ភូតហេតុ ! ប្អូនស្រីរបស់ខ្ញុំអាចមើលឃើញហើយ ! »

យើងបានធ្វើបុណ្យជ្រមុជទឹកឲ្យមនុស្ស ១៣ នាក់នៅសប្តាហ៍នោះ ។

បងប្រុស និងបងស្រី មូញ៉ូស បានក្លាយជាសមាជិកដ៏ស្មោះត្រង់របស់សាសនាចក្រ ។ ឥទ្ធិពលរបស់ពួកគាត់ រួមទាំងការងាររបស់បងប្រុស មូញ៉ូស ជាប្រធានគយនៅក្នុងប្រទេសកូឡុំប៊ី បានជួយផ្សព្វផ្សាយដំណឹងល្អនៅទីនោះ ។ កូនស្រីម្នាក់បានបម្រើបេសកកម្ម បងប្រុសរបស់នាងបានបម្រើជាប៊ីស្សព ។ ម៉ាហ្គារីតានៅតែអាចមើលឃើញពេញមួយជីវិតរបស់នាង ។

ព្រះយេស៊ូវគ្រីស្ទបានមានបន្ទូលអំពីអ្នកដែលមានសេចក្តីជំនឿលើទ្រង់ « ដោយនូវព្រះនាមរបស់យើង នោះពួកគេនឹងបើកភ្នែកមនុស្សខ្វាក់ » ( គោលលទ្ធិ និងសេចក្ដីសញ្ញា ៨៤:៦៩ ) ។ ខ្ញុំដឹងថា « ការទាំងអស់នឹងសម្រេចបាន ដល់អ្នកណាដែលជឿ » នៅលើព្រះយេស៊ូវគ្រីស្ទ ( ម៉ាកុស ៩:២៣ ) ។