Սպասավորել բույրերի նկատմամբ ալերգիա ունեցողներին

Որոշ գաղափարներ ղեկավարների համար.

• Օգնեք անդամներին հասկանալ, որ քիմիական նյութերի հանդեպ զգայունությունը իսկական մտահոգություն է դրանցից տուժողների համար:

• Կանոնավոր կերպով տրամադրեք հայտարարություններ և հիշեցումներ այն մասին, թե մենք ինչպես կարող ենք կարեկից լինել ուրիշների հանդեպ, որոնք առնչվում են քիմիական զգայունության և մեկուսացում պահանջող այլ բժշկական խնդիրների հետ, և ինչպես կարող ենք օգնել բոլորին՝ միանալ Տիրոջը երկրպագելիս:

• Մտածեք ծխում կամ ցցում հաշմանդամության մասնագետ կանչելու մասին՝ օգնելու լուծել այս և այլ խնդիրներ:

• Մտածեք ղեկավարների և անդամների համար վերապատրաստման դասընթաց կազմակերպելու մասին՝ քիմիական զգայունության և այլ խնդիրների վերաբերյալ, որոնք կարող են ազդել Եկեղեցու ժողովներին մասնակցելու անձի ունակության վրա:

• Քիմիական զգայունություն ունեցող անհատներին հնարավորություն ընձեռեք ծխի ղեկավարների հետ կիսվել իրենց կարիքներով և մտահոգություններով:

• Հնարավորության դեպքում ամեն ինչ արեք՝ կիրառելու ուղեցույցներ հանդիպումների և միջոցառումների համար, որոնք թույլ են տալիս զգայուն կամ ալերգիկ մարդկանց հարմարավետությամբ մասնակցել:

• Փորձեք ժողովների առցանց հեռարձակում ապահովել նրանց համար, ովքեր չեն կարող ներկա գտնվել, և առաջարկեք ուղիներ, որպեսզի այդ անհատները ճաշակեն հաղորդությունը:

• Օգտագործեք միայն այն ապրանքները, որոնք հաստատված և տրամադրված են Եկեղեցու ժողովատների թիմի կողմից: Եթե ստանդարտ արտադրանքներից մեկը խնդիր է ստեղծում, աշխատեք տեղի շինությունների մենեջերի հետ՝ այլընտրանքներն ուսումնասիրելու համար: Եթե անդամներն իրենց հետ բերեն օդը թարմացնող կամ մաքրող միջոցներ, այդ ապրանքները կարող են ռեակցիաներ առաջացնել զգայուն անհատների մոտ:

• Միջոցառումներ պլանավորելիս հաշվի առեք քիմիական զգայունությունը:

• Հիշեք, որ քիմիական զգայունություն ունեցող որոշ մարդիկ կցանկանային ծառայել իրենց համար անվտանգ իրավիճակում:

Տասներկու Առաքյալների Քվորումից երեց Պատրիկ Քիրոնն ուսուցանել է. «Նրանց համար, ովքեր իրենց անմասն ու անտեսված են զգում, [մեր] ընդունելության ջերմությունը վճռորոշ կլինի: Ի վերջո, մենք կարող ենք հարցնել ինքներս մեզ, թե ըստ Փրկչի՝ ինչպիսին պետք է լինի մեր հաղորդության ժամը: Ինչպե՞ս Նա կցանկանար, որ Իր զավակներից յուրաքանչյուրին ողջունեին, ուշադիր լինեին, սնուցեին և սիրեին: Նա ի՞նչ կցանկանար, որ մենք զգայինք, երբ գալիս ենք նորոգվելու՝ Իրեն հիշելու և երկրպագելու միջոցով»:

Բարձրացնելով այս խնդրի մասին իրազեկվածությունը՝ քիմիական զգայունություն ունեցող մարդիկ կարող են իրենց լսելի, հարգված զգալ և լիարժեքորեն ներգրավված լինել իրենց ծխի կամ ճյուղի կյանքում: Երբ եպիսկոպոսությունները և ծխի խորհուրդները կարեկցաբար և աղոթքով աշխատում են այս տեսակի առողջական պայմաններից տուժած անհատների հետ, Երկնային Հոր ավելի շատ զավակներ զորանում են, քանի որ նրանց ավելի մեծ հնարավորություններ են տրվում ավելի մոտենալու Հիսուս Քրիստոսին: Երբ ծուխը հավաքվում է միասին՝ «միավորելով իրենց սրտերը միությամբ ու սիրով» (Մոսիա 18․21), սրտերը դա զգում են և բուժվում։