Ուրախություն գտեք ավետարանի ձեր ճամփորդությունում

Քանի որ Հիսուս Քրիստոսը վերականգնեց Իր ավետարանը Մարգարե Ջոզեֆ Սմիթի միջոցով, «մենք հասկանում ենք կյանքի նպատակը, այն, թե ով ենք մենք»,- հայտարարել է նախագահ Մ. Ռասսել Բալլարդը (1928–2023)։ Եկեղեցուն տված իր վերջին վկայության ժամանակ նախագահ Բալլարդը, որն այն ժամանակ Տասներկու Առաքյալների Քվորումի գործող նախագահն էր, ասել է․

«Մենք գիտենք, թե ով է Աստված. մենք գիտենք, թե ով է Փրկիչը, որովհետև մենք ունենք Ջոզեֆին, որը մանուկ հասակում գնաց ծառերի այդ պուրակը՝ ներում փնտրելով իր մեղքերից: …

Ես հիանում եմ, և վստահ եմ, որ ձեզնից շատերը նույնպես հիանում են, թե որքան օրհնված ենք մենք, որ գիտենք մեր կյանքի նպատակի մասին, թե ինչու ենք մենք այստեղ և ինչ պետք է փորձենք անել և իրականացնել մեր առօրյա կյանքում»:

Հիսուս Քրիստոսի Վերջին Օրերի Սրբերի Եկեղեցու անդամների համար այդ գիտելիքը ներառում է Աստծո փրկության «կատարյալ ծրագրի» ըմբռնումը: Նաև հայտնի լինելով որպես «երջանկության մեծ ծրագիր», «փրկագնման ծրագիր» և «ողորմության ծրագիր» (Ալմա 42․8, 11, 15)՝ այն «կյանքից հանում է առեղծվածը, իսկ մեր ապագայից՝ անորոշությունը»։ Այդ ծրագրում էական նշանակություն ունի «Քրիստոսի վարդապետությունը», որն առանցքային դեր ունի կյանքի նպատակի համար:

Քանի որ մենք ունենք ավետարանը, մենք գիտենք, որ Աստծո զավակներ ենք, ուղարկված երկիր՝ փորձվելու, հղկվելու և պատրաստվելու «առաջ [բերվել] մեռելների հարությամբ, Գառի հաղթանակի և փառքի միջոցով» (Վարդապետություն և Ուխտեր 76․39)։ Մենք գիտենք պատվիրանները և «բավականին ուսուցանված են[ք], որ բարին տարբերեն[ք] չարից» (2 Նեփի 2.5): Մենք գիտենք, որ եկել ենք երկիր՝ սիրելու և ծառայելու: Եվ մենք գիտենք, որ Փրկիչը կանչել է մեզ հաղթելու աշխարհին և օգնելու ուրիշներին անել նույնը (տես Հովհաննես 16․33, Վարդապետություն և Ուխտեր 64․2)՝ ի նախապատրաստություն Իր Երկրորդ Գալուստին։

Երբ մենք կենտրոնանանք Նրա վրա, այն, ինչ Ջոզեֆ Սմիթն անվանեց «մեր Տեր Հիսուս Քրիստոսի Ավետարանի ուրախ ձայնը», կուժեղացնի մեզ դժվար օրերին և իմաստ ու նպատակ կբերի մեր և ուրիշների կյանքում:

Ամեն ծունկ պիտի խոնարհվի, Դեն Վիլսոն, պատճենումն արգելված է

Հնազանդություն, օրհնություններ, ուրախություն

Աստված մեզ բարոյական կամքի ազատություն է տվել, որպեսզի մենք կարողանանք հաշվետու լինել մեր ընտրությունների համար (տես Վարդապետություն և Ուխտեր 101․78, 2 Նեփի 2․16)։ Որպես մի մաս այն բանի, որ «հակադրություն լինի բոլոր բաներում» (2 Նեփի 2.11), սատանային թույլատրվում է գայթակղել մեզ՝ սխալ օգտագործելու մեր ազատ կամքը:

Բայց Տեր Հիսուս Քրիստոսը «իմանալով այն աղետի մասին, որը պիտի գա երկրի բնակիչների վրա» մեր օրերում, կանչեց Մարգարե Ջոզեֆ Սմիթին, «երկնքից խոսեց նրա հետ, և նրան պատվիրաններ տվեց» (Վարդապետություն և Ուխտեր 1․17)։ Նույն օրինաչափությունը, որով Տերը հայտնում է Իր պատվիրաններն ու կամքը Իր մարգարեներին, այսօր էլ շարունակվում է նախագահ Ռասսել Մ. Նելսոնի միջոցով, և նույն պատճառով: Աստված ցանկանում է առաջնորդել մեզ դեպի երջանկություն այս կյանքում և դեպի սելեստիալ փառք հաջորդ կյանքում:

Աստծո պատվիրաններին հնազանդվելը պետք է բխի Նրա հանդեպ մեր նվիրվածությունից և սիրուց: Տեր Հիսուս Քրիստոսն անձամբ հայտարարեց, որ Աստծուն սիրելը հանդիսանում է «առաջին ու ամենամեծ պատվիրանը» (տես Մատթեոս 22․37–38)։ Այնուհետև Նա հայտարարեց. «Եթե ինձ սիրում եք, պահե՛ք իմ պատվիրանները» (Հովհաննես 14․15)։

Տիրոջը սիրելու և Նրա պատվիրանները պահելու արդյունքում պարգև է տրվում: Այս տնտեսությունում Նա նկարագրել է «օրենք, երկնքում անդարձորեն հրամանագրված … , որի վրա հիմնված են բոլոր օրհնությունները,-

Եվ եթե մենք ինչ-որ օրհնություն ենք ստանում Աստծուց, դա այն օրենքին հնազանդվելով է, որի վրա հիմնված է այն» (Վարդապետություն և Ուխտեր 130․20–21)։

Այսպիսով, Տիրոջ պատվիրանները պահելու միջոցով Նրա հանդեպ մեր սերը ցուցաբերելու վերջնական արդյունքը օրհնություններն են, որոնք բերում են երջանկություն և ուրախություն:

Վերականգնված ավետարանի և ժամանակակից հայտնության ոսպնյակի միջոցով կյանքին նայելը մեզ տալիս է հստակ պատկերացում։ Մեր աստվածային ծագման և ճակատագրի հստակ հեռանկարով մենք գիտենք, որ «հենց այն բաները, որոնք լավագույնս կփոխեն [մեր] մահկանացու կյանքը, ճիշտ նույն բաներն են, որոնք [մեր] կյանքը լավագույնը կդարձնեն ողջ հավերժության մեջ»:

Եվ վերջում ես կրկին ցանկանում եմ անդրադառնալ տարիներ առաջ իմ ունեցած փորձառությանը՝ Ճապոնիայում վերջերս դարձի եկած մարդու վերաբերյալ։ Իր, միսիոներների ու անդամների ջանասիրության արդյունքում նա գտավ Հիսուս Քրիստոսի վերականգնված ավետարանը: Գտնելով ավետարանը՝ նա նաև բացահայտեց իր նպատակը, որն ընդլայնեց նրա տեսլականը: Նա նաև գտավ երջանկության մեծ ծրագիրը: Ծրագրում ներառված ավետարանական ուխտերին հնազանդվելը օրհնություններ և ուրախություն բերեց նրան՝ բարձրացնելով աշխարհիկ և հոգևոր առումներով:

Նրա ճամփորդությունը, որը տանում էր դեպի անդամակցություն Հիսուս Քրիստոսի Եկեղեցում, թույլ տվեց նրան դառնալ Հիսուս Քրիստոսի վկան: Տասներկու Առաքյալների Քվորումից երեց Պատրիկ Քիրոնը նկարագրել է այդ ամենին հետևող ուրախությունը.

«Իր յուրաքանչյուր զավակի համար նախատեսված մեր Երկնային Հոր սիրառատ ծրագրի և մեր Փրկիչ Հիսուս Քրիստոսի փրկագնող կյանքի և առաքելության շնորհիվ մենք կարող ենք և պետք է լինենք ամենաուրախ մարդիկ երկրի վրա: Նույնիսկ, երբ կյանքի փոթորիկները հարվածում են մեզ այս անհանգիստ աշխարհում, մենք կարող ենք զարգացնել ուրախության և ներքին խաղաղության աճող ու մնայուն զգացում՝ Քրիստոսի հանդեպ մեր հույսի և երջանկության գեղեցիկ ծրագրում՝ մեր սեփական տեղը հասկանալու շնորհիվ»:

Ես իմ երախտագիտությունն եմ հայտնում և վկայում Հիսուս Քրիստոսի վերականգնված ավետարանի համար, որը ներառում է երջանկության մեծ ծրագիրը և հանդիսանում վերջինիս անբաժանելի մասը։ Ես հրավիրում եմ ձեզ ճաշակել ավետարանի պտուղներից և ավելի շատ ուրախություն զգալ այս կյանքում, մինչ ճամփորդում եք դեպի հավերժական կյանք: