Ang mga Ngano sa FSY

Kita adunay “mga Y” (mga ngano) sa atong kinabuhi.

Atol sa Giya sa FSY nga Kalihokan sa kataposang adlaw sa NaCoLayan (Naic, Bacoor, Balayan) FSY 2025, ako adunay kahigayonan sa pagpakigbahin og espesyal nga pahinumdom: Ang YOUTH (KABATAN-ONAN) mao ang “Y” sa FSY.

Kon wala ang kabatan-onan, walay FSY. Kay ang FSY nagpasabot man nga Ang YOUTH (KABATAN-ONAN [Alang sa Kalig-on sa Kabatan-onan], kinsa man ang lig-onon kon wala sila didto?

Apan mas mahinungdanon pa niini—ang FSY wala lamang maanaa aron sa pagpalig-on sa kabatan-onan, apan sa pagtabang nila kon asa naggikan ang ilang tinuod nga kalig-on: Jesukristo. Siya ang kalig-on sa kabatan-onan. Ug Siya ang kalig-on sa matag usa nato, bisan kon kita mobiya na sa atong pagka-ten-edyer.

Gawas sa paglingaw-lingaw niining lima ka adlaw nga komperensiya, ang labing mahinungdanong tumong klaro: kami mipahinumdom sa tanan nga ang usa ka gamhanang paagi nga sila malig-on ni Jesukristo mao ang pinaagi sa pagbasa Giya sa FSY—nga opisyal nga giulohan og “Alang sa Kalig-on sa Kabatan-onan: Usa ka Giya alang sa Paghimo og mga Pagpili.”

Pinaagi kini sa pagkat-on sa Iyang mga pagtulun-an, pagtinguha sa Iyang giya, ug paghimo og mga pagpili uban Kaniya nga kita makakaplag sa atong tinuod nga kalig-on—ug sa atong tinuod nga mga kaugalingon.

Ang atong Manluluwas nakasabot sa matag kalisdanan, pagsulay, hagit, ug kahuyang nga atong naatubang, giatubang, ug atubangon.

Siya misinati niini. Ug sa kaulahian namatay alang niini. Apan ang Iyang ‘Y’—Iyang ngano—sa pag-anhi sa yuta, sa pag-antos, ug sa pagsakripisyo sa Iyang Kaugalingon, mao ang YOU [KAMO]. Kita.

Siya ang hinungdan nga kita makakaplag og paglaom, pagkaayo, ug kalig-on bisan unsa pa ang atong gisagubang.

Unsaon nato sa pagdangop ngadto Kaniya? Pinaagi sa pag-ampo, pinaagi sa pagtuon sa Iyang pulong, ug pinaagi sa pagsunod sa tambag sa Iyang pinili nga mga lider sa Iyang gipahiuli nga Simbahan. Kon buhaton nato kini nga mga butang, kita mas mapaduol ngadto Kaniya ug mobati sa Iyang kalig-on nga nagpatunhay kanato.

Sama sa gitudlo ni Elder Dieter F. Uchtdorf: “Ang UNSA mopahibalo, apan ang NGANO makapausab.”

Ang pagkasayod sa UNSA ang buhaton importante—apan ang pagkasayod kon NGANO mousab sa inyong kaisngkaisng.

Nangutana ko sa pipila ka tawo nga akong nahimamat atol sa 2025 NaCoLayan (Naic, Bacoor, Balayan) FSY ug ania ang ilang mga NGANO:

“Ang FSY dili mahitungod sa paglingaw-lingaw, bisan kon makalingaw gyod kaayo. Sa FSY akong nakat-onan kon unsaon pagkontrol sa akong pailob. Nakahimamat ko og mga tawo nga mabination ang mga kasingkasing nga mahimo kong makaugmad og lig-ong panaghigalaay ug mga handomanan nga akong ampingan sa kahangtoran.”
– Mark Daniel, 17, Naic Stake

“Ang mga kalihokan sa FSY makatabang nga mapalambo ang daghang nagkalainlain ug mapuslanon nga mga kahanas nga magamit sa kabatan-onan sa ilang pagserbisyo sa mga calling sa Simbahan. Gitudloan usab kami mahitungod sa kaimportante sa pag-ampo ug pagbasa sa kasulatan, mga pamatasan nga magdala og mga panalangin ug motabang namo sa pag-atubang sa mga hagit.”
– Lucy Rei Hiba-Jerusalem, 14, Bacoor Stake

“Pinaagi sa mga debosyonal, pagtuon sa kasulatan, ug mga klase, ang among pagtuo ug panabot napalawman, mas napaduol kami ngadto sa atong Manluluwas nga si Jesukristo. Human sa FSY, akong naamgohan nga importante ang pag- ugmad og relasyon uban niya—ang pagpaduol ngadto sa Dios mao ang pagtugot ni Jesukristo sa pag-usab nato gikan sa sulod pagawas. Kinahanglan usab natong palibotan ang atong kaugalingon og buotan nga mga tawo.”
– Rhianne Zaraia P Quintal, 14, Balayan District

“Nabunyagan ko usa ka semana sa wala pa magsugod ang komperensiya sa FSY. Isip bag-ong miyembro, ang kaisnatian sa FSY nakatabang nako nga mapalig-on ang akong pagtuo ni Jesukristo ug sa Langitnong Amahan, ug nakaangkon ko og dugang nga kahibalo mahitungod sa mga kasulatan. . .”
– Norberto Chio III, 18, Naic Stake

“Ang FSY nakatabang nako sa pagpabilin sa dalan sa pakigsaad, sa pagpalig-on sa akong pagtuo, ug sa pagsunod sa mga Sugo sa Ginoo. Kadto usa ka makalipay ug makapausab sa kinabuhi nga kasinatian ilabi na alang nako isip unang higayon nga nahimong magtatambag. Ang FSY mitudlo nako nga mas mapailobon, masinabtanon, ug mapasayloon. Nasayod ko nga kon atong dapiton ang espiritu nga mag- uban nato, motabang kini nato sa pagbuhat sa matarong nga mga butang sa kinabuhi. Dugang pa, nakapalig-on kini sa akong tinguha nga moserbisyo og full-time nga misyon. Kini nga programa mitudlo nako nga maghigugmaay sa usag usa, nga kitang tanan mga anak sa Dios, ug ganahan ko sa pagbati nga moserbisyo Kaniya.”
– Kirstine Faith Benavidez, 20, Naic Stake

“Ang FSY dili lamang alang sa kabatan-onan, kini ALANG SA KALIG-ON ‘KANAKO’ usab. Ang mga ehemplo sa kabatan-onan, ang ilang putli nga pagpamatuod ug hugot nga pagtuo nakapausab nako, bisan ang akong mga higala nga dili miyembro nakabantay nga lahi na ko sa dihang mibalik ko sa eskwelahan human sa pagtambong sa FSY. Mapasalamaton kaayo ko sa oportunidad sa pagserbisyo sa among kabatan-onan isip usa sa ilang mga magtatambag.”
– Nicco Calapati, 24, Balayan District

“Ang Komperensiya sa FSY makausab sa kinabuhi sa kabatan-onan ug sa mga lider usab. Niadtong 2023 mitambong ko sa akong una ug kataposang Komperensiya sa FSY isip partisipante, dili maayo ang akong pamati sa mental, emosyonal, ug sa espirituwal nga paagi, apan ang akong inahan mitambag nga kinahanglan ko nga moadto. Wala gyod ko kahibalo nga makausab kini sa akong kasingkasing. Nakahimamat ko og usa ka higala nga tinuoray nga nagpakabana ug naminaw nako, sa akong mga kasakit sa kasingkasing ug mga kagul-anan. Anaa siya sa dihang nagkinahanglan ko og higala nga maminaw nako nga walay pagpanghusga. Gibati nako ang gugma sa Dios human sa among panag-istoryahanay ug kana ang usa sa mga rason kon nganong gidawat nako ang calling isip Magtatambag sa FSY, gusto ko nga ang nagtubo nga henerasyon mobati sa gugma sa Dios, nga bisan unsa pa man ang mga kahimtang ug mga hagit nga ilang gisagubang ang Dios kanunay nga anaa alang nila ug mopadala siya og anghel (sama sa usa ka higala) nga motabang nila ug modasig nila.”
– Joemerly Hular, 20, Bacoor Stake

Magpadayon kita sa paghupot sa atong mga “Y”, ilabi na sa mga rason kon ngano nga nagsunod kita Kaniya.

Mapasalamaton kaayo ko niini nga kasinatian. Nindot ang akong gibati nga nasayod nga akong gihimo ang akong labing maayo—dili lang isip usa ka lider sa FSY, kondili isip Iyang mga kamot diha sa labing mahinungdanon nga hagit, labing mahinungdanon nga kawsa, ug labing mahinungdanon nga buhat dinhi sa yuta.

Samtang nagpadayon kita sa atong panaw, hinaot nga atong hinumdoman kanunay ang matahom nga imbitasyon gikan sa atong tema sa 2025 FSY:

“Tan-aw ngari kanako sa matag hunahuna; ayaw pagduhaduha, ayaw kahadlok” (Doktrina ug mga Pakigsaad 6:36).

Siya ang atong kalig-on. Siya ang atong tinuod nga “Y”.