Unsay Makahimo sa usa ka Ward o Branch nga Maghiusa?

Mga paghulagway pinaagi ni Dilleen Marsh

Panaghiusa pinaagi sa mga Kalihokan

Wala pay usa ka tuig human moapil sa Simbahan, si Ernesto Gabriel Manhique gitawag isip presidente sa bag-ong nahimo nga Homoine Branch sa Inhambane, Mozambique. Nianang higayona, ang branch duha pa lang ka tuig ug adunay mga 20 ka miyembro nga nanambong.

Si Presidente Manhique gusto nga ang gugma mao ang pundasyon sa branch. “Tungod sa akong mga kasinatian,” miingon siya, “Nakahukom ko nga mahimong usa ka lider nga mougmad og panaghigalaay sa mga miyembro ug mopakita sa akong gugma alang nila.”

Si Presidente Manhique miingon nga ang ilang mga miting sa konseho sa branch nagtutok sa pagtabang niadtong mihunong sa pagsimba tungod kay naglisod sila nga mobati nga gimahal ug adunay bili. Kini nga mga panaghisgotan misangpot sa usa ka kalihokan nga ilang gitawag og “mga family evening sa branch sa gabii sa Biyernes.”

“Giplano namo kini sama niini: Gihunahuna namo ang kaigsoonan nga wala mosimba sa miaging Dominggo o kinsa wala makasimba pipila ka Dominggo na,” miingon si Presidente Manhique. “Dayon mohangyo mi sa tawo kon makahimo ba mi og family evening sa branch sa ilang balay nianang semanaha.”

Ang branch magpundok didto sa balay sa miyembro ug modapit sa tibuok kasilinganan. Si Presidente Manhique mipasabot nga kini motabang sa tawo o sa pamilya nga mobati nga gimahal, gipakabililhon, ug gikinahanglan.

“Sa kasagaran, ang miyembro [kinsa mao ang nagpasiugda] mobalik nga kuyog ang mga silingan, kinsa nalingaw sa family evening sa branch ug mohukom nga mosimba,” miingon si Presidente Manhique. Ang Homoine Branch karon aduna nay sobra sa 250 ka miyembro. Kadaghanan motambong sa simbahan kanunay.

Samtang ang mga ward ug ang mga branch magplano ug mohimo og makanunayon, makabayaw nga mga kalihokan, ang ilang mga miyembro motubo ngadto sa panaghiusa ug gugma. Si Elder Gerrit W. Gong sa Korum sa Napulog Duha ka Apostoles miingon: “Sa daghang mga dapit sa Simbahan, ang pipila ka dugang nga mga kalihokan sa ward, siyempre planohon ug ipahigayon inubanan sa katuyoan sa ebanghelyo, mobugkos kanato pinaagi sa mas dakong pagbati sa pagkasakop ug panaghiusa.”

Panaghiusa pinaagi sa Pagpangalagad

Pipila ka tuig na ang milabay, ang Eagle Valley Ward sa Colorado, USA, nakasinati og daghang mga pagsulay sa hugot nga pagtuo. Daghang miyembro sa ward himatyon, ug ang ilang mga pamilya nagkinahanglan og kalig-on ug suporta. Ang ward unta masanapan sa mga pagbati sa kasubo apan nakakaplag hinuon sila og hingpit nga kalipay sa pagpangalagad.

“Ang pagserbisyo sa uban nakahatag kanamo og kalig-on ug suporta,” miingon si Karie Grayson, ang presidente sa Relief Society nianang higayona. Usa ka adlaw, samtang nagbisita sa panimalay sa usa ka masakiton nga sister, si Sister Grayson nakadawat og pagpadayag kon unsaon sa pagdasig niini nga sister pinaagi sa gugma sa iyang ward.

“Samtang ang akong kapangulohan ug ako naglingkod diha sa kwarto nga nakig-istorya kaniya, kami naghunahuna, ‘unsa pa ang among mahimo?’” miingon si Sister Grayson. “Usa ka ideya ang miabot kanako. Nasayod dayon ko nianang higayona kon unsa ang kinahanglan namong buhaton.”

Kini nga sister ganahan og mga bulak, mao nga ang ward milimpyo sa iyang tanaman sa bulak nga wala na maatiman. Kada Martes sa buntag, ang mga miyembro sa ward moabot aron atimanon ang tanaman.

Ang kadasig sa pagserbisyo milambo dili lang sa Eagle Valley Ward apan usab sa komunidad. Ang mga indibidwal ug mga kompaniya sa tibuok dapit mitabang sa paghatag og yuta, mga bulak, ug sistema sa patubig.

“Gibati nako nga ang unsay among gihimo gigiyahan sa Langitnong Amahan,” miingon si Sister Grayson “Daghang trabaho ang gikinahanglan, apan dihay daghang katawa nga kauban ang tanan. Makalingaw kaayo kadto.”

Samtang sila nagtrabaho ug nagserbisyo, ang pagbati sa Eagle Valley Ward nausab. Ang kaguol nawala samtang sila nakakita og hingpit nga kalipay sa pagserbisyo.

Si Bishop Greg Adair miingon, “Samtang kaming tanan miapil, ang ward nagsugod sa pagbati sama sa usa ka pamilya. Kining panahona mao ang pagsulay alang sa among ward, apan nagkahiusa kami ug mitabang sa usag usa.”

Si Sister Grayson miingon nga ang ward nagkahugpong pinaagi sa pagserbisyo dili tungod kay gikinahanglan nilang buhaton apan tungod kay gusto nila. Ug sa dihang ilang gibuhat, nakakaplag sila og pagkaayo sa ilang kaugalingon mga pakigbisog. “Dihay gamhanan nga pagbati sa ward,” miingon siya. “Kon inyong mausab ang mga kasingkasing sa mga indibidwal sa ward, mausab ninyo ang kasingkasing sa ward.”

Ang mga miyembro sa Eagle Valley Ward “andam nga mopas-an sa mga alantoson sa usag usa, nga kini mogaan; … ug sa paghupay niadtong nanginahanglan og kahupayan” (Mosiah 18:8–9).

“Ang pagserbisyo nga maghiusa makapasuod ninyo,” miingon si Bishop Adair. “Sayon kaayo nga ipangalagad tungod kay nakaila ang tanan sa usag usa. Si Kristo nagtudlo nato sa paghigugma sa Dios ug sa atong silingan, ug kon kita maningkamot sa pagbuhat bisan unsa nga calling nga gisugo kanato, kita mahugpong sa gugma.”

Sa dihang si Bishop Ernest White sa Holywood Road Ward sa Belfast, Northern Ireland, nagtan-aw sa iyang duha ka anak nga lalaki nga midagan sa maraton, nagdahom siya nga ang iyang anak nga si David, kinsa nagbansay sulod sa daghang bulan, makahuman pag-una sa lumba kay sa iyang wala kaayo ka andam nga anak nga si Peter. Si Bishop White nasurprisa sa dihang si David nag-uban kang Peter hangtod ngadto sa finish line.

“Nakalangan lang ko nimo. Padayon nga wala ko,” gisultihan ni Peter ang iyang igsoon.

“Dili ka nako biyaan,” tubag ni David.

Kini nga kasinatian nakapahunahuna ni Bishop White sa mga miyembro sa iyang ward. Daghan kanila edaran na nga mga sister, ug lisod alang nila nga mobiyahe ngadto sa labing duol nga templo sa Preston, England. Si Bishop White naghunahuna sa matag usa niini nga mga sister nga nag-ingon, “Adto lang mo sa templo nga wala ko. Makalangan lang ko ninyo. Ayaw ko og hulata.”

Bisan pa sa mga kalisod, si Bishop White ug ang ubang mga lider sa ward dili gusto nga biyaan lang kini nga mga sister. Nakahukom sila nga moorganisar og tinuig nga biyahe sa ward ngadto sa templo, magtabang sa matag miyembro sa ward nga nagtinguha nga motambong aron makatagamtam sa mga panalangin sa templo.

Si Bishop White nakahibalo nga bisan ang biyahe mahal ug lisod planohon, “makahatag kini og kasuod.”

Ang tinuig nga biyahe mihatag og kahigayonan nga makatampo ang tanan diha sa ward sa lainlaing paagi. Ang mga hamtong mitabang sa pag-eskedyul og mga appointment ug mihimo og mga sabot sa pagbiyahe. Ang kabatan-onan mitabang sa mas edaran nga mga miyembro nga mogamit sa teknolohiya sa pagsiksik sa family history ug pag-andam og mga kard sa pamilya. Ang ubay-ubay nga mga donasyon sa pipila ka miyembro nakatabang sa pagbayad sa bayranan sa akomodasyon alang sa tanan nga mga patron sa templo nga nagbiyahe.

“Ang mensahe nga malamposong namong gihatag sa among mga miyembro sa—matag usa—mao kon sila mapasaligon nga mosunod sa dalan sa pakigsaad ug mopadayon, walay usa nila ang mabiyaan,” miingon si Bishop White. “Gikinahanglan sila, ug gimahal sila, ug wala sila makalangan nato.”

Alang sa unang duha ka tinuig nga biyahe, ang mga miyembro sa ward miadto sa England sakay sa eroplano. Pero, niadtong 2024 pipila ka miyembro dili na makasaka sa hagdanan sa eroplano, mao nga ang ward nakahukom nga magdrayb na lang. Nagkinahanglan kini nga mosakay og barko tabok sa Irish Sea.

Sobra sa 30 ka miyembro ang mibiyahe aron motambong sa templo niadtong Agosto. Sulod sa usa ka semana, miapil sila sa mga ordinansa sa templo. Kini nga mga kasinatian nagpahinumdom sa mga miyembro nga ang matag usa nila kabahin sa usa ka mahigugmaong pamilya sa ward.

“Sa dihang misulod mi og dungan sa pultahan sa templo, dako kaayo kini og kahulogan kanamo,” miingon si Bishop White. “Sa dihang nagkita kami sa usag usa—kaming tanan diha sa lawak sa celestial—kana nakahatag og dili ordinaryong kalipay nga ingon og anaa sa langit.”

Bisan og ang pagdala sa tibuok Ward sa Holywood Road tabok sa Irish Sea aron sa pagbisita sa templo dili sayon, nakahatag kini og kaayohan sa mga miyembro ug sa ilang mga minahal. “Kana ang unsay gusto sa Manluluwas nga among buhaton,” miingon si Bishop White. “Dili Siya gusto nga adunay si bisan kinsa nga mabiyaan. Gusto Siya nga kaming tanan mopadayon nga maghiusa, mao kana ang among gipaningkamotan nga buhaton.”

Bisan og ang matag usa niining mga istorya nagpakita og lain-laing baroganan alang sa pagpalambo og panaghiusa, nagpakita kining tanan kon sa unsag paagi si Jesukristo nagtabang kanato nga magkahiusa uban sa atong mga ward ug mga branch. Siya mogiya sa mga miyembro sa Simbahan samtang sila magplano og mga kalihokan, mangalagad niadtong nanginahanglan, mosimba sa mga templo, ug mohimo og uban pang mga paningkamot nga magkahiusa. Ang gugma ug mga pagtulun-an sa Manluluwas makapahimong posible alang sa matag kongregasyon “aron sila mausa” (tan-awa sa Juan 17:23).