Ang Buhat sa Dios Magdala og Katuyoan ug Kalinaw

Sa atong panahon ang Ginoo mipadayag:

“O kamo nga anaa sa pag-alagad sa Dios, tan-awa nga kamo moalagad kaniya sa tibuok ninyo nga kasingkasing, gahom, hunahuna ug kusog. …

“Busa, kon kamo adunay tinguha sa pag-alagad sa Ginoo kamo gitawag ngadto sa buhat” (Doktrina ug mga Pakigsaad 4:2–3).

Ang Dios nagtinguha nga kita moalagad kaniya sa atong tibuok kasingkasing, gahom, hunahuna, ug kusog ug nga kita mahigugma Kaniya uban sa samang gikusgon (tan-awa sa Doktrina ug mga Pakigsaad 59:5). Ang atong gugma alang sa Dios makahimo, makatugot, ug makapalambo sa atong mga tinguha sa pag-alagad. Kon sundon nato kadto nga mga tinguha, ang atong abilidad sa pag-alagad ug paghigugma Kaniya ug sa atong mga silingan malig-on. Ang gahom sa Dios dayon moabot, ug makakita kita sa Iyang kamot sa atong mga kinabuhi.

Samtang moalagad ako sa Dios—tungod kay gihigugma ko siya—mabati nako ang Iyang gugma ug kaseguroan nga Siya nahigugma sa Iyang tanang anak ug gusto nga kita mobalik aron mopuyo uban Kaniya pag-usab. Dili usab siya gusto nga kita mopauli nga mag-inusara. Gusto Siya nga dad-on nato ang atong mga pamilya ug ang uban ngadto sa ebanghelyo samtang moalagad kita inubanan sa gugma alang Kaniya ug sa Iyang mga anak.

Moapil kita sa buhat sa Dios sa mas epektibong paagi kon kita adunay tabang gikan Kaniya. Samtang buhaton nato ang atong bahin ug magtinguha og inspirasyon, ang Espiritu Santo makagiya nato sa buhat. Sa dihang gitawag sa Ginoo si Enoch nga mahimong usa ka propeta, Siya miingon, “Tan-awa ang akong Espiritu anaa kanimo, busa ang imong tanan nga mga pulong Ako mohatag og kaangayan; ug ang mga bukid mahanaw sa imong atubangan, ug ang mga sapa mobalhin sa ilang agianan; ug ikaw magpuyo ngari kanako, ug Ako nganha kanimo; busa lakaw uban kanako” (Moises 6: 34).

Dugang tabang ang moabot nato samtang modawat kita sa mga ordinansa sa templo ug mohimo ug motuman sa mga pakigsaad. Kon kita moadto aron sa pagtambong sa templo ngadto sa pagsimba sa balay sa Ginoo, makasabot kita nga ang mga ordinansa ug ang mga pakigsaad mokonektar nato ngadto sa Langitnong Amahan ug ni Jesukristo sa usa ka gamhanan ug sa suod nga paagi.

Si Presidente Nelson mitudlo nga kining relasyon sa pakigsaad “makahimo sa tanan sa kinabuhi nga sayon.” Dili kana makahimo sa kinabuhi nga sayon, apan ang pagbugkos sa atong mga kaugalingon ngadto sa Langitnong Amahan ug ni Jesukristo makahatag nato og akses sa Ilang kusog, nga makapadugang sa atong abilidad sa pag-apil sa Ilang buhat. Samtang kita mopadayon, makalakaw kita tupad Nila ug mobati sa Ilang gahom ug impluwensya sa atong mga kinabuhi.

Hinumdomi ang Ngano

Ang buhat sa Dios dili kanunay sayon. Kon ako adunay mga adlaw nga mobati ko nga nawad-an og paglaom o nahigawad, pahinumdoman nako ang akong kaugalingon sa “ngano” bahin sa paghimo sa Iyang buhat, nga mao nga ako nasayod nga ang Dios buhi ug nga si Jesus mao si Kristo. Ang Espiritu Santo nakasaksi ug nakakompirma niini ngari nako balik-balik. Dili gayod ako makalimod niana. Tungod kay gihigugma nako ang Langitnong Amahan ug ang Iyang Anak, nagtinguha ko nga mopahimuot Kanila pinaagi sa pag-apil Kanila sa Ilang mahinungdanon nga buhat.

Kon kamo mobati gyod nga dili angayan o nga kamo walay sakto nga kahanas nga alang niini nga buhat, apil sa team! Kadaghanan nato mobati niana matag karon ug unya. Niadto nga mga gutlo kinahanglan kita nga mahisama ni Nephi ug “gigiyahan sa Espiritu, kay wala ako masayod sa mga butang nga angay [natong] buhaton” (1 Nephi 4:6). Kon kita mopadayon inubanan sa hugot nga pagtuo ug mohimo kon unsay atong mahimo, ang Ginoo mogiya ug motabang nato ug mopadaghan sa atong mga paningkamot sama sa Iyang gibuhat sa lima ka pan ug duha ka isda (tan-awa sa Marcos 6:41–44). Bisan unsa ang atong dad-on ngadto sa Ginoo, Iyang gamiton sa pagpadayon sa Iyang buhat sa kaluwasan ug kahimayaan.

Laing rason kon ngano nga kita gidapit sa pag-apil sa buhat sa Dios sa kaluwasan ug sa kahimayaan mao nga Siya ug ang Iyang Anak, nga si Jesukristo, gusto nga kita mahimong balaan, gani sama Kanila. Samtang motabang kita kauban Nila, mas makat-on kita mahitungod unsaon nato nga mahimong sama Kanila.

Niini nga buhat nagdapit kita sa uban nga mahimong sama ni Jesukristo pinaagi sa pagdiskobre sa hingpit nga kalipay sa paghinulsol. Si Presidente Nelson miingon nga ang paghinulsol mao ang usa ka proseso “sa pagbuhat ug mahimong mas maayo matag adlaw.” Kahigayonan kini nga mag-usab, nga molambo sa espirituwal nga paagi, ug “mahimong mas sama ni Jesukristo!”

Makatabang kita sa uban nga mohimo sa ilang mga panimalay nga sama sa langit aron nga sa umaabot ang langit mabati nga sama sa panimalay ug sila makaandam alang sa kinabuhi nga moabot.

Adunay hingpit nga kalipay niini nga buhat! Si Presidente Nelson mitudlo nga “bisan unsa pay mahitabo—o wala mahitabo—sa atong kinabuhi,” makakaplag kita og hingpit nga kalipay kon kita motutok sa plano sa Langitnong Amahan ug sa atong Manluluwas, nga si Jesukristo. Ang plano sa Langitnong Amahan mahimong posible lamang pinaagi sa Iyang Anak. Si Jesukristo andam sa pagbuhat sa kabubut-on sa Iyang Amahan ug mosakripisyo sa tanan alang kanato. Kon dili, nawala na unta kita sa kahangtoran. Nasayod Siya nga mao ra kadto ang paagi alang nato nga makapauli aron mopuyo uban sa Langitnong Amahan ug sa pagkaplag og hingpit nga kalipay. Si Presidente Nelson mitudlo, “Ang kalipay moabot gikan ug tungod [ni Jesukristo]. Siya ang tinubdan sa tanang kalipay.”

Pagkatalagsaon nga panalangin ug oportunidad alang nato sa pagtabang niining importante nga buhat sa kaluwasan ug kahimayaan ug sa pagtabang sa uban nga luwas nga makapauli, diin dugay nang gihandom sa atong Amahan sa Langit ug ni Jesukristo.