“Gipanalipdan Ko,” Liahona, Hunyo 2025.
Mga Tingog sa mga Santos sa Ulahing mga Adlaw
Gipanalipdan Ko
Misulay ko sa pagbaliwala sa aghat, apan wala madugay nakat-on ko og bililhon nga leksiyon mahitungod sa pagsunod sa Espiritu Santo.
Paghulagway pinaagi ni Agnieszka Więckowska
Usa ka gabii samtang nagdrayb ko padulong sa salosalo sa adlaw nga natawhan sa usa ka higala, miliko ko sa usa ka hilit, ngitngit nga duha ka lane nga dalan. Sa kalit, duna koy tirible nga pagbati. Ang hunahuna miabot nako nga kinahanglan kong mobalik sa agi. Gibaliwala nako nga gikulbaan lang ko.
Pero ang aghat, miabot pag-usab kaduha ka higayon. “Langitnong Amahan,” miingon ko og kusog, walay dapit nga kabalikan. Kon kinahanglan man nakong buhaton, palihog pakit-a ko.”
Diha-diha, nakakita ko og karsada nga wala nako mamatikdi kaniadto atol sa akong daghang higayon nga pagdryab niini nga dalan. Mao, mibalik dayon ko sa akong agi ug mipauli.
Ang akong mga higala nasagmuyo sa dihang gisultihan nako sila nga dili ko makaanha sa salo-salo. Naghunahuna nga kinahanglan kong mobalik tungod kay dili ko gusto nga mag-inusara, misugyot sila nga pakuyogon nako ang akong bana sa pagdrayb pabalik. Miuyon ang akong bana. Gihatod ko niya sa salo-salo ug mibiya pauli.
Unya, ang akong bana mitawag nako. Mora siya og naalarma. Miingon siya nga sa iyang pagdrayb pauli, ang mga opisyal sa pulis mipahunong niya aron mangutana kon nakakita ba siya og bisan unsa nga makapaduda. Miingon sila nga usa ka trak ang gipugos sa pagpaliko sa mga sakop sa gang nga mikulata ug mitulis sa drayber. Ang pulis nagsuspetsa nga ang gang mipuntariya sa trak tungod kay walay laing mga sakyanan ang naa sa duol nianang higayon.
Nakuratan ako! Sa sayo pa, ako ra ang nag-inusara nga sakyanan nianang mao nga dalan. Nakaamgo ko nga ang akong aghat gikan sa Espiritu Santo ug nga napanalipdan ko sa mga gahom sa langit. Samtang namalandong ko sa unsay nahitabo, ang ubang mga insidente sa akong kinabuhi misulod sa akong hunahuna. Nakaamgo ko nga ang unsay akong gihunahuna nga naatlan lang sa tinuod mga aghat gikan sa Espiritu Santo.
Mitudlo si Presidente Russell M. Nelson, “Sa umaabot nga mga adlaw, dili na posible ang espirituhanong pagsugakod kon wala ang paggiya, pagdumala, paghupay, ug makanunayon nga impluwensiya sa Espiritu Santo.”
Kanang adlawa, nga nakabaton sa impluwensya sa Espiritu Santo wala lang nakaluwas nako sa espirituwal nga paagi; nakapanalipod usab kini nako sa pisikal nga paagi. Nasayod ko nga ang Dios nakahibalo kanato ug nga kon maminaw kita Kaniya, Siya mogiya sa atong mga lakang.