Gikinahanglan Ko sa Dios didto sa Austria

Paghulagway pinaagi ni Agnieszka Więckowska

Human makauli gikan sa akong misyon sa Spain, mibati ko nga andam na alang sa akong sunod nga lakang sa kinabuhi. Gusto ko nga makasinati sa Simbahan sa mas dako nga paagi, lapas sa mga utlanan sa akong panimalay sa Vienna, Austria, diin ang mga miyembro mahalaron apan medyo diyutay ra.

Gibati nako nga kinahanglan kong makig-uban sa sama nakog panghunahuna nga mga batan-on sa Brigham Young University sa Provo, Utah, USA, ug nangandoy ko nga makahimamat og batan-ong babaye didto nga akong minyoan ug uban niya makasugod ko og pamilya. Nakapasar ko sa eksamin sa pinulongan nga Iningles ug sa dili madugay madawat na. Ang akong mga ginikanan mitanyag nga motabang sa pagbayad sa akong mga galastohan.

Pero, duna koy kanunay nga gihunahuna nga nakasamok nako. Wala ko makapangutana sa Ginoo. “Nganong kinahanglan pa man kong mangutana?” Mirason ko. Dili ba ako “matinguhaon moapil sa maayo nga katuyoan,” nga dili na kinahanglan nga sugoon sa tanang butang? (tan-awa sa Doktrina ug mga Pakigsaad 58:26–27). Sa unsag paagi nga ang langit posibleng mosupak?

Apan ang Espiritu Santo nagsige og aghat nako, “Kinahanglan kang mag-ampo sa dili pa mohukom.” Hingpit nga naglaom nga ang Ginoo motugot, naghunahuna ko, “OK.”

Usa ka tubag ang daling miabot ug lig-on—usa sa labing klaro nga mga tubag nga sukad akong nadawat. Nadungog nako sa akong kasingkasing, “Gikinahanglan ka nako dinhi sa Austria sa pagtukod sa gingharian.”

Gipadaplin nako ang eskedyul sa klase sa BYU ug mikanselar sa akong mga plano. Naghunahuna ko sa akong pamilya, sa unsang paagi ang Ginoo mitabang namo nga mobalhin sa Austria gikan sa Uruguay sa gamay pa ko. Nakaamgo ko nga tingali ang Ginoo nagkinahanglan nako dinhi. Uban sa bag-ong disposisyon, mitutok ko sa pagtukod sa gingharian didto sa Austria, nga puno sa katahom, buhong sa kasaysayan, ug panimalay sa daghang bantogang batid sa musika, sama ni Beethoven ug Mozart.

Pipila lang ka sa semana ang milabay nakahimamat ko og batan-ong babaye kinsa, sama nako mibalhin gikan sa Habagatang Amerika uban sa iyang pamilya. Nahimo kaming suod nga mga higala. Dili siya usa ka Santos sa Ulahing mga Adlaw apan mainampingong nagtuon sa akong debosyon ngadto sa Manluluwas ug sa Iyang Simbahan ug sa kataposan nakaangkon sa iyang kaugalingong pagpamatuod. Paglabay sa duha ka tuig naminyo kami.

Sukad nga naselyo sa templo, si Katerin ug ako mipadako og tulo ka anak nga lalaki ug usa ka anak nga babaye, kinsa makanunayon ug mahalaron. Naningkamot kami nga mopadan-ag sa among kahayag (tan-awa sa Mateo 5:16) pinaagi sa pagkamahigalaon sa tanan ug bukas mahitungod sa among mga pagtuo diha sa among panimalay sa Austria. Mapasalamaton ko sa gasa sa personal nga pagpadayag aron sa pagtabang sa paggiya sa atong mga kinabuhi samtang moserbisyo kita sa Ginoo.