Pagpangalagad sama sa Buhaton sa Manluluwas

Usa ka tigpangalagad nga igsoong babaye sa New Zealand gigiyahan ngadto sa usa ka talagsaon nga paagi sa pagtabang sa usa ka sister sa iyang ward. Kini nga sister bag-o lang nagbulag sa iyang bana. Ang tigpangalagad nga mga igsoong babaye nagpulaw sa iyang masuso ug nakamatikod nga kini nga sister ingon og aktibo sa online sa lawom na nga mga oras sa kagabhion, maong nakahukom siya nga mopadala og mensahe kaniya. Human mag-ampo mahitungod kon unsaon niya nga makatabang, nadasig siya nga mogahin og oras sa adlawan nga matulog ug gitakda ang iyang alarma aron makamata sa gabii aron makig-uban niini nga sister pinaagi sa pagpadala og mensahe kaniya sa online tungod kay mao kini ang panahon sa adlaw nga ang sister mibati og kasubo ug kamingaw ug ilabi na nga mingawon sa iyang bana.

Sa kanunay nga mga inter-aksiyon ug mga imbitasyon gikan niining tigpangalagad nga mga igsoong babaye, sa kadugayan kini nga sister nagsugod sa pagbalik ngadto sa simbahan. Ang iyang tigpangalagad nga mga igsoong babaye mohapit ug mokuyog niya ngadto sa mga miting ug sa mga kalihokan. Dayon nakabaton siya og tinguha sa pagpakigsulti sa iyang bishop mahitungod sa pagbag-o sa iyang rekomend sa templo.

Ang semana human madawat niya ang iyang rekomend, siya ug ang iyang tigpangalagad nga mga igsoong babaye nagkuyog sa pagtambong sa templo. Tungod niining panahon sa dinasig nga pag-atiman, wala na siya mobati nga naguol.

Kining tigpangalagad nga mga igsoong babaye sa tinud-anay nahimong kasaligan nga mga higala ug espirituwal nga unang tigresponde alang niining minahal nga sister nga miagi og mahagitong nga panahon sa iyang kinabuhi. Nakahatag sila og temporal ug espirituwal nga kahupayan. Apan nagkinahanglan kini og panahon, pailob, mabinationg paghigugma, ug malumo nga mga imbitasyon.

Pinaagi sa pagtinguha sa inspirasyon sa Ginoo, kining tigpangalagad nga igsoong babaye gigiyahan sa usa ka talagsaong paagi nga siya makatabang. Sa kataposan, kanang dinasig nga pagpangalagad migiya niini nga sister pabalik ngadto sa templo ug sa mga panalangin sa usa ka pakigsaad nga relasyon ngadto sa Dios.

Pero, aron magpadayon ang mga paningkamot niining tigpanglagad nga mga igsoong babaye, nagkinahanglan kini sa ilang gugma sa Dios ug sa ilang gugma alang niini nga sister. Mahimo kitang mag-ampo alang niana nga gugma kon wala nato kini batia sa sinugdanan. Ang pagpangalagad ngadto sa uban tungod lang sa katungdanan dili makalahutay sa taas nga panahon, ilabi na kon kadtong gisangon kanato magmagahi sa sinugdanan.

Si Elder Dale G. Renlund sa Korum sa Napulog Duha ka Apostoles miingon nga kinahanglan nga kita nga “mohigugma ug mangalagad sa paagi nga ang uban mapaduol ngadto ni Jesukristo.” Sa paghimo niana, kinahanglan kita nga mopalambo og mga relasyon sa pagsalig uban niadtong gisangon kanato. Kana nga matang sa relasyon molambo paglabay sa panahon. Magkinahanglan kini og mas labaw pa kaysa pagpadala lang og text o pakig-istorya diha sa hawanan sa simbahan.

Kon hunahunaon nato giunsa sa Manluluwas pagpangalagad ug mag-ampo aron makahibalo unsaon sa pagpangalagad sa atong kaigsoonan sama sa atong mahunahuna nga Iyang buhaton, makahibalo kita kon unsay buhaton. Kita adunay pribilihiyo sa pagrepresentar sa Manluluwas sa atong mga paningkamot sa pagpangalagad. Paghunahuna og tawo sa inyong kinabuhi nga gikauban ninyo karon o kaniadto, o manghinaot nga ikauban ninyo, nga makapahimo ninyo nga mobati nga gihigugma ug adunay bili ug nag-awhag ninyo nga mahimong mas maayo nga tawo bisan sa pagpakig-uban lang kaniya, kinsa modasig ninyo sa pagtinguha sa pagsunod sa Manluluwas.

Mao kana ang unsay mas taas ug mas balaan nga pagpangalagad. Dili kini komplikado; yano lang kini, apan nagkinahanglan kini og tinguha nga mahimong nianang matanga sa tawo alang sa uban, ang matang sa tawo nga sama sa Manluluwas alang niadtong makauban Niya. Ang pagpangalagad sama sa usa ka aprentis ngadto sa Manluluwas tungod kay nagbansay kita nga mahimong sama Kaniya ug nagkat-on sa paghigugma ug pag-atiman sa uban sa paagi nga Iyang buhaton.

Tungod kay ang matag indibidwal talagsaon, ang matag usa magkinahanglan og lahi usab, sama sa gibuhat sa sister gikan New Zealand. Samtang mag-ampo kita, mogahin og panahon, ug sinsero nga maminaw sa uban, madiskobrehan nato ang indibidwal nga mga panginahanglan ug makadawat og inspirasyon aron makahibalo unsaon ug kanus-a moserbisyo kanila, sa temporal ug sa espirituwal nga paagi.

Samtang palamboon nato ang relasyon sa pagsalig, makahimo kita sa pagtabang sa pagpalig-on sa hugpot nga pagtuo sa uban diha sa Manluluwas pinaagi sa atong pagserbisyo ug pinaagi sa indibidwal nga mga mensahe nga bation nato nga nadasig nga ipakigbahin. Napanalanginan ako sa milabay nga katuigan sa nadasig nga tigpangalagad nga mga igsoong babaye nga nahimo nakong pipila sa akong labing suod nga mga higala. Kadto nga mga relasyon sa pagsalig nakapalig-on nako sa daghang paagi ug nakatabang nako nga mobati sa gugma ug pag-atiman sa Manluluwas alang kanako.

Importante kaayo nga kadtong pangalagaran nato mobati usab sa gugma ug pag-atiman sa Manluluwas alang kanila. Mao kini ang paagi sa pagdala sa kahupayan sa Manluluwas ngadto sa uban ug, sa proseso, makakaplag sa atong kaugalingon nga kahupayan diha Kaniya.

Pagkahimong Sama Manluluwas

Ang ehemplo sa Manluluwas mao ang usa sa indibidwal nga pagpangalagad ug gugma. Samtang kita magbansay sa pagpangalagad sama sa buhaton sa Manluluwas, mausab kita nga mahimong mas sama Kaniya. Ang pagpangalagad mahimong kabahin sa atong pagkatawo, dili lang unsay atong buhaton. Paglabay sa panahon, ang pagpangalagad mahimong kabahin nato, ug kita moadto sa pagserbisyo aron maghimo og kaayohan, sama sa gibuhat sa Manluluwas, aduna man o walay assignment.

Si President Jeffrey R. Holland, Akting nga Presidente sa Korum sa Napulog Duha ka Apostoles, midapit kanato nga “mas hugot ang kamasaligon sa kinasingkasing nga pagpakabana alang sa usag usa, dinasig lamang sa putli nga gugma ni Kristo sa pagbuhat sa ingon. Bisan pa sa unsay atong bation nga atong mga limitasyon ug mga kakulangan—ug kitang tanan adunay mga hagit—bisan paman, hinaot nga maghago ta uban sa Ginoo sa ubasan, sa paghatag og tabang sa Dios ug Amahan natong tanan sa Iyang dako nga buluhaton sa pagtubag sa mga pag-ampo, paghatag og kahupayan, pagpahid sa mga luha, ug paglig-on sa huyang nga mga tuhod. Kon ato kanang buhaton, mahimo kitang mas mahisama sa tinuod nga mga disipulo ni Kristo nga maoy angayan kanato. … Hinaot nga maghigugmaay kita sa usag usa sama sa Iyang paghigugma kanato.”

Usa kini ka sagrado nga buhat nga makig-uban ni Jesukristo sa pagpanalangin sa mga kinabuhi sa mga anak sa atong Langitnong Amahan. Kon himoon nato kini pinaagi sa espiritu sa gugma ug pasalamat alang sa oportunidad sa pagpanalangin sa mga kinabuhi sa uban, ang atong kaugalingong kinabuhi mapanalanginan sa hilabihan sa paghimo sa ingon.