Balaanong Plano sa Langitnong Amahan

Paghulagway pinaagi ni Agnieszka Więckowska

Isip lider sa mission sa Brazil, migahin ko og usa ka semana dapit sa kataposan sa 2023 sa pag-interbyo sa 60 sa among 160 ka misyonaryo. Ang usa nila, usa ka zone leader, mihangyo nga makigsulti nako sa pribado. Dihang nagkita mi, gitunolan ko niya og usa ka karton sa sapatos ug giingnan ko nga ang iyang mga ginikanan mipalit og ekstra nga paresan sa sapatos alang sa tawo didto sa misyon nga tingale nagkinahanglan niini.

Kay natandog ko, gipasalamatan nako siya sa kamanggihatagon ug kamanggihunahunaon sa iyang mga ginikanan. Apan, hilom kong nanghinaot, nga ang gamayng sapatos, 8.5 nga gidak-on, unta mas dako pa, kanang komon nga sukod alang sa kadaghanang mga misyonaryo. Bisan pa niana nagmapasalamaton ko ug gibutang ang mga sapatos sa akong sakyanan.

Duha ka adlaw ang milabay, nag-interbyo ko og dugang nga mga misyonaryo, dihang gidapit nako ang mapahiyumong misyonaryo sa akong opisina. Miabot siya upat ka semana na ang nakalabay gikan sa Guatemala. Dihang gipangutana nako siya kon kumosta siya, ang iyang pahiyom napulihan og pagbakho.

Nagluha siyang misugilon sa iyang kaulaw dihang ang laing misyonaryo inosenting mikomedya niya nga wala makapangbutones sa ibabaw nga dapit sa iyang polo. Bag-o lang siya nga nakabig ug nagdako sa panimalay nga usa ra ang ginikanan. Ang iyang mama naglisod gyod sa kwarta nga isuporta kaniya ug sa iyang duha ka igsoon. Ang iyang hinatag nga mga polo gagmay ra kaayo, mao nga gihigtan niya kini sa higot sa karaan niyang gamit na kurbata aron itago ang dili mabutones nga dapit sa ibabaw.

Gihatagan nako siya og kwarta nga gidonar sa usa ka miyembro sa Simbahan alang sa mga misyonaryo nga nagkinahanglan og ikasul-ob ug giingnan nga magpalit og bag-ong mga polo. Dayon nakabantay ko nga guba na ang iyang sapatos. Sa kalit, akong nahinumdoman ang mga sapatos nga naa sa akong sakyanan! Nangutana ko niya kon unsay sukod sa iyang sapatos nga isul-ob, nakabantay nga gagmay ang iyang tiil.

“8.5, ang sukod sa akong isul-ot” mitubag siya.

Mga luha miagas sa akong mga mata dihang mipasabot ko nga dunay ginikanan sa usa ka misyonaryo nga bag-o lang midonar og paresan sa sapatos nga sakto sa iyang sukod. Nagpalitrato ming duha ug gipadala kini ngadto sa zone leader. Ang iyang papa, nga tayming usab nga Taga-Guatemala, natandog nga nakatabang siya og usa ka misyonaryo nga gikan sa lumad niya nga nasod.

Sa among misyon, kining mga matang sa panalangin mahitabo matag adlaw. Ang uban tingali moingon nga mga sulagma lamang kini, apan mouyon ko kang Elder Neal A. Maxwell (1926–2004), kinsa miingon nga resulta kini sa “balaanong plano” sa mahigugmaon nga Langitnong Amahan.