Kadakong Kalipay nga Dala sa Balita

Joseph William Billy Johnson: Holiness to the Lord [Joseph William Billy Johnson: Pagkabalaan ngadto sa Ginoo], ni Emmalee Glauser Powell

Usa ka gabii sa Hunyo 1978, si Billy Johnson mipauli ngadto sa iyang balay sa Cape Coast, Ghana. Siya ug ag ubang mga miyembro sa iyang kongregasyon nagpuasa, nga maoy himoon nila kanunay, apan ang pagpuasa wala makabayaw sa iyang espiritu. Siya gikapoy ug nawad-an og kadasig tungod kay daghang mga tumutuo nga uban kaniya mihunong sa pagsimba ug mibalik ngadto sa karaan nilang mga simbahan.

Si Billy nangandoy nga mobati og espirituwal ug emosyonal nga kalig-on pag-usab. Duha ka bulan ang milabay, usa ka miyembro sa iyang kongregasyon, misulti kaniya mahitungod sa usa ka pagpadayag nga siya aduna. “Sa dili madugay ang mga misyonaryo moabot,” siya nakaingon. “Nakakita ako og puti nga mga lalaki nga nagpadulong sa atong simbahan. Migakos sila nato ug miduyog nato sa pagsimba.” Lain nga babaye ang mipahibalo nga nakadawat siya og susama nga pagpadayag. Si Billy mismo nagdamgo og pipila ka puti nga mga lalaki nga misulod sa chapel ug nag-ingon, “Kami inyong mga igsoong lalaki, ug mianhi mi aron sa pagbunyag kaninyo.” Pagkahuman, nagdamgo siya og Itom nga mga tawo nga miabot gikan sa layo aron moapil sa Simbahan.

Sa gihapon, dili mawala ni Billy ang iyang pagbati nga nawad-an og paglaom.

Lawom na ang gabii, apan dili siya makatulog. Usa ka kusog nga impresyon midasig kaniya sa pagpaminaw sa British Broadcasting Corporation (BBC) diha sa radyo—butang nga wala niya mahimo sa daghang katuigan.

Nakit-an niya ang radyo, usa ka dagtom [brown] nga model nga adunay upat ka pilak nga lisoanan diha sa ubos. Ang radyo misagitsit sa dihang iya kining gipatingog. Sa iyang pagliso sa mga lisoanan, ug ang pula nga pointer miirog balik-balik sa dial. Apan dili niya makit-an ang sibya.

Dayon, human sa usa ka oras nga pagpangita, sa kataposan nakit-an ra ni Billy ang sibya sa balita gikan sa BBC. Mianunsiyo ang tigbalita nga ang Presidente sa Ang Simbahan ni Jesukristo sa mga Santos sa Ulahing mga Adlaw nakadawat og pagpadayag. Ang tanang takos nga lalaki sa Simbahan bisan pa sa kaliwat, makadawat na karon sa pagkapari.

Natumba si Billy, mikalit og hilak tungod sa kalipay. Ang awtoridad sa pagkapari sa kataposan moabot na sa Ghana, magdala sa tanang panalangin sa ebanghelyo ngadto sa iyang katawhan.

Ang misyonaryo miabot sa Cape Coast sa ulahing bahin nianang tuiga, nagbunyag ni Billy Johnson ug gatosan sa ubang mga tumutuo. Sukad nianang hiyona, ang Simbahan dali kaayong mikatap sa tibuok Ghana ug sa kasilinganang nasod sa West Africa. Ang Cape Coast Ghana Temple gipahibalo niadtong Oktubre 2023; mao kini ang ikatulo nga templo sa nasod.