“Atong Masunod si Jesukristo pinaagi sa Pag-apil Kaniya sa Iyang Buhat,” Liahona, Hunyo 2025.
Atong Masunod si Jesukristo pinaagi sa Pag-apil Kaniya sa Iyang Buhat
Moapil kita sa buhat sa Manluluwas kon motutok kita sa Iyang mga katuyoan, motuman sa Iyang mga sugo, ug mohigugma sa usag usa.
Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando] ni Heinrich Hofmann
Sa dihang nabunyagan kita, nagsugod kita sa proseso sa pagdala diha sa atong kaugalingon sa ngalan ni Jesukristo. Kabahin niini nga proseso nagtimaan nga moapil kita sa Manluluwas diha sa Iyang buhat. Si Presidente Dallin H. Oaks, Unang Magtatambag sa Unang Kapangulohan, misulat “usa sa labing importante nga mga kahulogan sa pagdala ngari nato sa ngalan ni Kristo [mao] ang pagkaandam ug paghatag og usa ka pasalig sa pagdala ngari nato sa buhat sa Manluluwas ug sa Iyang gingharian.”
Ang buhat sa Manluluwas mao ang “pagpahitabo sa pagka-imortal ug kinabuhing dayon sa tawo” (Moises 1:39). Ang pagka-imortal mao ang walay kondisyon nga gasa nga giseguro na ni Jesukristo pinaagi sa Iyang pagkabanhaw. Pero ang kinabuhing dayon, dili pareha sa pagka-imortal. Ang kinabuhing dayon mao ang labing mahinungdanon nga gasa nga ikahatag sa Dios ngadto sa katawhan (tan-awa sa Doktrina ug mga Pakigsaad 14:7). Mao kini ang pagpuyo sa kahangtoran isip mga pamilya didto sa Iyang presensiya. Aron kita makadawat og kinabuhing dayon, kinahanglan nga kita mahimong matinud-anong mga disipulo ni Jesukristo. Nagpasabot kini nga kita modawat sa gipahiuli nga ebanghelyo pinaagi sa pagbaton og hugot nga pagtuo diha sa Manluluwas ug sa Iyang Pag-ula, maghinulsol, magpabunyag, modawat sa gasa sa Espiritu Santo, mohimo ug motuman sa mga pakigsaad sa templo, ug molahutay hangtod sa kataposan. Ang paglahutay hangtod sa kataposan naglakip sa pag-apil sa Manluluwas diha sa Iyang buhat.
Matinguhaon nga Moapil
Moapil kita sa buhat sa Manluluwas kon kita motabang sa mga anak sa Dios nga mahimo usab nga mga matinud-anong disipulo ni Jesukristo. Kini naglakip sa pagpakigbahin sa Iyang ebanghelyo, sa ingon mopundok sa nagkatibulaag nga Israel, pinaagi sa pagtuman sa mga responsibilidad diha sa Simbahan sa Manluluwas ug pinaagi sa pagpaningkamot nga mahimong sama Kaniya. Ang atong “kalamposan [sa Iyang buhat] wala magdepende kon sa unsang paagi ang uban mopili sa pagtubag [kanato], ngadto sa [atong] mga pagdapit, o ngadto sa [atong] sinsero nga mga buhat sa pagkamabination.” Si Presidente Russell M. Nelson mipamatuod, “Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, kamo nagtabang sa pagpundok sa Israel.”
Aron sa paghimo sa buluhaton sa Manluluwas nga atong buluhaton, magtutok kita sa Iyang mga katuyoan, magtuman sa Iyang mga sugo, ug maghigugmaay. Bisan og buhaton nato ang Iyang buhat sa Iyang pamaagi (tan-awa sa Doktrina ug mga Pakigsaad 51:2), ang ubang butang gihatag nato nga atong sulbaron sa atong kaugalingon. Ang Manluluwas misulti sa mga Santos kinsa nagpundok sa Lalawigan sa Jackson, Missouri:
“Kay tan-awa, dili maayo nga Ako momando sa tanang butang; kay siya nga kinahanglan nga pugson sa tanang butang, tapolan ug dili maalamon nga sulugoon; mao nga siya dili makadawat og ganti.
“Sa pagkatinuod moingon ko, ang mga tawo kinahanglan nga matinguhaon nga moapil diha sa maayo nga katuyoan, ug mobuhat og daghang butang pinaagi sa ilang kaugalingong gawasnon nga kabubut-on, ug mopahitabo sa daghang pagkamatarong;
“Kay ang gahom anaa kanila, diin sila mao ang mga tinugyanan sa ilang mga kaugalingon. Ug kon ang mga tawo nagbuhat og maayo sila dili mawad-an sa ilang ganti” (Doktrina ug mga Pakigsaad 58:26–28).
Samtang magsunod kita sa Manluluwas, moapil sa Iyang buhat, ug motabang sa uban nga mahimong Iyang matinud-anon nga mga disipulo, nagtudlo kita sa unsay Iyang itudlo. Tungod kay kita walay pagtugot sa pagtudlo og bisan unsa (tan-awa sa Doktrina ug mga Pakigsaad 52:9, 36), nagtutok kita nga walay pagtipas sa Iyang dokrina (tan-awa sa Doktrina ug mga Pakigsaad 68:25). Dugang pa, gihatagan nato og piho nga pagtagad kadtong mga kabos, nanginahanglan, ug anaa sa kakuyaw (tan-awa sa Doktrina ug mga Pakigsaad 52:40). Kining gihatagan og gibug-aton giklaro sa dihang ang Manluluwas mikutlo gikan sa Isaias diha sa usa ka sinagoga sa Nazaret:
“Ang Espiritu sa Ginoo ania kanako. Gidihogan ako niya aron pagsangyaw sa Maayong Balita ngadto sa mga kabos; gipadala ako niya aron pagsangyaw sa kagawasan ngadto sa mga binihag ug pagpahiuli sa panan-aw sa mga buta, pagpagawas sa mga dinaugdaog,
“Pagpahibalo sa tuig nga ang Ginoo moluwas sa iyang katawhan!” (Lucas 4:18–19; tan-awa usab sa Isaias 61:1–2).
Ang tuig nga ang Ginoo moluwas sa Iyang mga katawhan nagpasabot sa panahon nga ang tanang panalangin sa pakigsaad sa Dios ihatag diha sa Iyang katawhan. Atong sundon si Jesukristo pinaagi sa pagdapit sa uban sa pagdawat sa mga panalangin sa paghimo ug pagtuman sa mga pakigsaad ngadto sa Dios ug pinaagi sa pag-atiman niadtong kinsa kabos o kadtong nanginahanglan.
Ang pag-apil diha kang Jesukristo sa Iyang buhat madasigon tungod kay ang Iyang mga buhat, mga plano, ug mga katuyoan “dili gayod mapakyas, ni kini makawang” (Doktrina ug mga Pakigsaad 3:1). Alang niadtong nawad-an og paglaom, ang Ginoo mitambag: “Busa, ayaw kakapoy sa maayong buhat, kay kamo nagpahimutang sa pundasyon sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (Doktrina ug mga Pakigsaad 64:33). Ang Ginoo ra ang bahala sa pag-ani, ug buhaton lang nato ang atong bahin.
Ang Kasingkasing ug usa ka Andam nga Hunahuna
Ang pagbuhat sa atong bahin mas yano kay sa atong gihunahuna tungod kay dili kinahanglan nga atong dad-on ang dili ordinaryo nga mga talento o mga abilidad ngadto sa buhat sa Ginoo. Ang Iyang gikinahanglan mao ang yanong pasalig ug pagkaandam. Ang Ginoo miingon ngadto sa mga Santos sa Kirtland, Ohio, “Tan-awa, ang Ginoo nagkinahanglan sa kasingkasing ug sa usa ka andam nga hunahuna” (Doktrina ug mga Pakigsaad 64:34). Ang Ginoo makapahimo sa andam nga makahimo, apan dili Siya makapahimo o dili Siya mohimo sa makahimo nga andam. Sa laing pagkasulti, kon kita mapasaligon ug andam, siya makagamit nato. Apan bisan unsa pa kita ka maayo, Siya dili mogamit nato gawas kon kita mapasaligon sa Iyang buhat ug andam sa pagtabang Kaniya.
Si Samuel ug si Anna-Maria Koivisto pulos nagpakita og pasalig ug pagkaandam. Wala madugay human sa ilang kaminyoon, ang mga Koivisto mibalhin gikan sa Jyväskylä, Finland, ngadto sa Göteborg, Sweden, aron mangita og mga oportunidad sa panarbaho. Sa pag-abot, si Brother Koivisto gidapit nga makigkita ni Presidente Leif G. Mattsson, usa ka magtatambag sa kapangulohan sa Göteborg Sweden Stake. Tungod kay si Samuel dili makasulti og Swedish, ang interbiyo gipahigayon sa Iningles.
Human sa mubo nga pang-istoryahanay, si Presidente Mattsson mihangyo ni Samuel nga moserbisyo isip lider sa misyon sa ward sa Utby Ward. Gisulti ni Samuel ang problema: “Pero dili ko kasulti og Swedish.”
Si Presidente Mattsson miakbo sa iyang lamesa ug direktang nangutana, “Nangutana ba ko kon makamao kang mosulti og Swedish, o andam ka bang moserbisyo sa Ginoo?”
Mitubag si Samuel, “Nangutana ka kon andam ba ako nga moserbisyo sa Ginoo. Ug ako andam.”
Gidawat ni Samuel ang calling. Gidawat usab ni Anna-Maria ang mga calling. Silang duha miserbisyo nga matinud-anon ug nakat-on sa pagsulti og Swedish atol sa panahon sa ilang pagserbisyo.
Ang pasalig ug pagkaandam sa pagserbisyo sa Ginoo naghulagway sa mga kinabuhi ni Samuel ug ni Anna-Maria. Sila ang ordinaryo nga mga bayani sa Simbahan. Matinud-anon silang nagserbisyo matag higayon nga sila hangyoon. Nakatudlo sila nako nga kon kita moserbisyo, naggamit kita sa mga talento nga aduna kita (tan-awa sa Doktrina ug mga Pakigsaad 60:13), ug ang Ginoo motabang nato nga matuman ang Iyang mga katuyoan.
Kon andam kita nga moserbisyo, maningkamot kita nga dili moreklamo o magbagulbol, tungod kay dili nato gusto nga mamansahan ang atong pagserbisyo sa bisan unsa nga paagi. Ang pagreklamo mahimong timailhan sa nagduhaduha nga pasalig, o nga ang atong gugma alang sa Manluluwas dili na mao. Kon dili mabantayan, ang pagbagulbol mosangko ngadto sa dayag nga rebelyon batok sa Ginoo. Kini nga pagkasangko nakita sa kinabuhi ni Ezra Booth, usa sa unang kinabig sa Simbahan ngadto sa Ohio nga gitawag isip usa ka misyonaryo ngadto sa Missouri.
Sa iyang pagbiya sa Ohio niadtong Hunyo 1831, si Ezra nasuko nga ang pipila ka misyonaryo nakabiyahe sakay sa karwahe samtang siya naglakaw ubos sa kainit sa adlaw, nagsangyaw samtang naglakaw diha sa dalan. Nagbagulbol siya. Sa pag-abot niya sa Missouri, nahigawad siya. Ang Missouri dili mao unsa ang iyang gilaoman. Hinuon, gitan-aw niya ang palibot ug nakaobserbar nga “ang mapaabot medyo mangiob.”
Si Ezra nahimong mas dili malaomon, mayubiton, hinawayon. Sa pagbiya sa Missouri, imbes magsangyaw samtang siya naglakaw, nga maoy gisugo niya nga buhaton, nagdali siyang mibalik kutob sa iyang mahimo ngadto sa Ohio. Ang iyang unang gamayng pagbagulbol nahimong pagduhaduha ug sa kataposan sa pagkawala sa iyang pagsalig ngadto sa iyang unang espirituwal nga mga kasinatian. Sa wala madugay mibiya si Ezra sa Simbahan ug sa “kataposan ‘mibiya sa Kristiyanismo ug wala na motuo sa Dios [agnostic].’”
Pareha ang mahitabo nato kon kita dili magbantay. Kon dili kita padayong magbaton og mahangtorong panglantaw, magpahinumdom sa atong kaugalingon kang kinsa kini nga buhat, basin kita moreklamo, magduhaduha, ug sa kataposan mawad-an sa atong hugot nga pagtuo.
Nag-ampo ko nga kita makapili sa pagsunod ni Jesukristo pinaagi sa pag-apil Kaniya sa Iyang buhat. Kon buhaton nato, hatagan kita og “bililhon ug dagkong mga gasa nga iyang gisaad” (2 Pedro 1:4). Kini nga mga panalangin naglakip sa kapasayloan sa sala (tan-awa sa Doktrina ug mga Pakigsaad 60:7; 61:2, 34; 62:3; 64:3), kaluwasan (tan-awa sa Doktrina ug mga Pakigsaad 6:13; 56:2), ug kahimayaan (tan-awa sa Doktrina ug mga Pakigsaad 58:3–11; 59:23). Sa pagkatinuod, gisaaran kita sa labing mahinungdanon nga gasa nga ikahatag sa Dios—kinabuhing dayon.