Tigpangalagad nga mga Anghel sa Bukid

Nasayod ko nga dili ko makabiya sa bukid nga walay daghang tabang, lakip sa langitnong tabang. Mao nga nangayo ko og panalangin sa pagkapari. Si Bishop Heiner midihog ug si Mark Handly, usa ka magtatambag sa bishopric, miselyo sa pagdihog. Sa dihang si Brother Handly namulong, mihilom ang among grupo.

Nakahinumdom gihapon si Nathan sa unsay iyang gibati ug sa gibati sa ubang mga batan-ong lalaki samtang naminaw siya sa gamhanan nga mga pulong sa panalangin: “Nagmalinawon ko, mihinay ang akong kasingkasing, ang akong hunahuna mikalma. Nahingangha ko sa gahom sa Manluluwas nga gipakita pinaagi sa Espiritu Santo, nga nakatandog sa akong kasingkasing. Naghunahuna ko sa akong kaugalingon, ‘Gusto ko nga makahimo niana sa umaabot. Gusto ko nga makahimo sa paghatag og kalinaw ug pagkaayo sa akong mga minahal.’”

Bisan pa nianang mapakalma nga kaseguroan, ang mga pulong sa panalangin nga nakapatandog nako pag-ayo mao kini: “Ma-Ok ra ka, apan molungtad pa kini og taudtaod.”

Kanang “taudtaod” naglakip sa panahon sa pagkuha kanako aron makabiya sa bukid. Ako unom ka pye, upat ka pulgada ang gitas-on (193 cm), ug nianang higayona mitimbang ko og 230 ka libra (104 kg). Ang mga batan-ong lalaki naghunahuna, “Unsaon man namo siya pagdala sa ubos?” Naghunahuna ko sa samang butang.

Tungod kay nakakuha ko og pagbansay sa first-aid kaniadto sa ting-init, gisugo nako ang among grupo sa paghimo og tukod alang sa akong tiil gamit ang pisi, tape, mga sanga sa kahoy, ug foam sa higdaanan. Kinahanglan pa gihapon ming molakaw og 4 ka milya ug motabok sa sapa-sapaa sa bukid sa dili pa kami makabot sa among mga sakyanan ug makapangita og medikal nga pagtagad.

Ang duha ka labing taas sa among grupo misuporta nako pinaagi sa paggunit sa akong mga bukton samtang naglakaw sila tupad nako. Hinay-hinay, nagsugod mi sa paglugsong sa ubos. Usahay ang akong tuhod mapilo, ug ako motikuko sama sa lingkoranan nga mapilopilo. Kinahanglan kong makigbisog sa kalipong sa matag masakit nga lakang. Nagkadugang ang kabalaka si Bishop Heiner sa matag milabay nga oras sa among pagdulhog.

Samtang ang uban sa among pundok mihawan sa agianan sa mga bato sa unahan ug sa mga sagbot aron mas sayon ang paglakaw alang nako, ang uban motungas og balik aron sa pagdala og tubig, pagkaon, ug pagdasig. Ang pagbaktas nga sa kasagaran molungtad lang og mga duha ka oras miabot og walo ka oras.

Si Bishop Heiner ug ang pipila ka batan-ong lalaki miuna ngadto sa sapa. Didto, sa unsay gihulagway ni Daniel Palmer nga “usa ka pag-ampo sa among mga kasingkasing,” nagbugkos sila og mga troso gikan sa natumba nga mga kahoy ug naghimo og taytayan sa gibiyaan nga dam sa mga biber. Naghimo usab sila og gunitanan.

Sa dihang miabot ko sa sapa upat ka oras gikan sa pagbaktas,, hinay ug mabinantayong akong mitabok sa taytayan nga troso nga gisuportahan sa pipila ka matinabangon nga mga kamot. Mihunong mi aron sa pagpahulay ug nag-ampo og lain na pod sa daghang mga pag-ampo. Nianang puntoha, katunga na kami sa bukid.

Paglabay sa pipila ka oras, ang unang batan-ong lalaki migawas sa kakahoyan duol sa sinugdanan sa dalan. Gipasabot nila ang among kahimtang ngadto sa pipila ka mga nagkamping nga nagsakay og mga sakyanan nga alang niana nga dapit. Pipila niadtong maayong mga Samaryanhon misaka sa dalan, mikuha sa pipila namo, ug midala namo ngadto sa among mga sakyanan.

Wala madugay nagpaingon na kami ngadto sa Trinidad, Colorado, diin ako gitambalan sa usa ka emerhensiya nga lawak sa ospital. Gisukdan ko sa doktor og brace sa tuhod ug mga kratsis, ug mipauli.

“Ang Gahom sa Dios”

Wala, wala ako maayo dayon. Ang pagkaayo “milungtad pa og taud-taod” human sa operasyon ug pisikal nga terapi. Apan mapasalamaton ko sa panalangin sa pagkapari nga akong nadawat, sa hugot nga pagtuo nga gipakita niadtong kinsa nag-ampo alang nako ug nagtabang nako (tan-awa sa Santiago 2:26), ug sa panaghiusa sa katuyoan nga among nakab-ot samtang nagtambayayong kami nga makalugsong ako sa bukid.

Nakakat-on kami og pipila ka importante nga butang nianang adlawa, mga leksiyon nga nakapalig-on sa among mga pagpamatuod ug determinasyon, nakatabang sa mga batan-ong lalaki nga mopasalig nga moserbsiyo og mga misyon, ug nag-andam nila alang sa malisod nga kabukiran nga ilang katkaton sa umaabot.

“Kauban sa akong talagsaong mga lider ug ka grupo mao ang gahom sa Dios,” nahinumdom si Nathan. “Nagtuo ko nga Siya mipadala og mga anghel nianang adlawa aron sa pagtabang namo. Kini nga kasinatian mitabang nako nga makasabot sa kaimportante sa pagkatakos sa pagpanalangin sa sakramento ug sa pagtuman sa akong ubang mga katungdanan sa pagkapari.”

Wala ko kahibalo unsa ka dako nga bahin ang nahimo niana nga kasinatian sa pagtabang sa mga batan-ong lalaki niana nga pagbaktas nga mopasalig og mga kinabuhi sa pag-ampo, pagserbisyo, ug katakos. Daghang kasinatian sa ilang batan-ong mga kinabuhi nga ingon og nahimong importante nga tahas sa ilang pasalig ngadto ni Jesukristo ug sa Iyang Simbahan. Apan ang matag usa niadtong mga batan-on lalaki miserbisyo sa Manluluwas isip full-time nga mga misyonaryo.

Sa paglabay sa panahon, nagkadako ang akong pasalamat alang niadtong buotan nga mga sulugoon sa Ginoo—sa unsay ilang gibuhat nako kaniadto ug sa unsay padayon nilang gihimo alang sa uban karon. Alang nako, sila mao, ug magpabilin, nga tigpangalagad nga mga anghel (tan-awa sa Doktrina ug mga Pakigsaad 13:1).