“Mga Templo: Usa ka Dangpanan sa Zion,” Liahona, Hunyo 2025.
Makasaysayanong mga Panglantaw sa Balay sa Ginoo
Mga Templo: Usa ka Dangpanan sa Zion
Nagkapundok kami didto sa mga templo ug nakakaplag og kadangpan gikan sa mga unos sa kinabuhi.
Mga litrato pinaagi ni Gillian Needham, Martin Hunter, ug Cameron Spencer/Getty Images
Pagka 12:51 p.m. niadtong Pebrero 22, 2011, ang linog nga may gikusgon nga 6.3 nakahimo og labihan nga kadaot sa Christchurch, sa New Zealand. Sento otsenta y singko ka mga tawo ang nangamatay, ug pipila ka libo ang nangaangol. Ang kahadlok ug ang kagubot sa siyudad mabatyagan. Midangat og pipila ka oras ang akong pagdrayb latas sa mga nangaguba aron makuha ang akong mga anak gikan sa ilang mga eskwelahan ug makit-an ang akong bana, kinsa didto sa dapit sa siyudad diin nahitabo ang labihang kadaot.
Dihang nauli na mi sa balay, nagkinahanglan kaming mohukom unsay buhaton. Dili luwas ang magpabilin didto, mao nga niana gihapong pagkahapon gipamutos dayon namo ang pipila sa among mga gamit ug misugod sa pagbiyahe padulong sa amihan. Wala mi makaamgo nga makasinati kami og daghang mga milagro sa among pagbiyahe.
Sa among pagbiya sa siyudad, ang among van hapit na mahubsi sa gasolina, apan nakapatubil mi sa estasyonan sa gas nga maoy unang nangabli og balik. Ang among van dunay problema sa mekanikal, mao nga gibilin namo kini sa garahe aron ipaayo. Dihang gikuha namo kini, wala kami pabayra sa mekaniko, nag-ingon nga gusto siyang makatabang niadtong mga naapektohan sa linog. Ang mga higala ug pamilya mipakita og kamabination kanamo, nagtabang nga kami ug ang among mga anak mahupay.
Sa kataposan mibiyahe mi ngadto sa Hamilton, kapin sa 500 ka milya (800 km) paamihan sa Christchurch. Ang bag-o pa namong pamilya nakapasilong sa usa sa mga dorm alang sa mga estudyante sa usa ka wala gamita nga eskwelahan tupad sa Hamilton New Zealand Temple. Didto kadto sa tiilan sa templo nga gipaningkamotan namo sa pagtabang ang among mga anak aron maulian gikan sa pagkalisang isip nga bakwit sa linog.
Nahinumdom ko nga naghangad sa pagtan-aw sa tore sa templo ug sa pagginhawa og lawom sa wala pa motikang pasulod, kay nagkinahanglan og dakong kaisog ang pagkombinse sa akong kaugalingon nga kini usab dili mahagsa sama sa daghang mga bilding nga nangahagsa didto sa among gipuy-an nga siyudad. Sulod sa lobby sa templo, ang Espiritu nagdala kanamo og kalinaw samtang among giplano ang sunod namong mga lakang: kon unsaon namo nga masugdan ang paghapsay sa kasamok ug magpadayon sa among kinabuhi.
Ang tagsulat ug ang iyang pamilya sa gawas sa Hamilton New Zealand Temple
Usa ka Dangpanan gikan sa Unos
Sa sayo nga bahin sa Pagpahiuli, ang Ginoo namahayag, “Ako nagsugo kaninyo sa pagtukod og balay ngari kanako, alang sa pagpundok sa akong mga santos, nga sila mosimba kanako” (Doktrina ug mga Pakigsaad 115:8). Ang Ginoo mipasabot nga kini nga panagpundok sa mga Santos mamahimo nga “alang sa usa ka panalipod, ug usa ka dangpanan gikan sa unos” (Doktrina ug mga Pakigsaad 115:6). Pagkahuman sa linog, ang Hamilton Temple mao ang pundokanang dapit nga gidangpan sa akong pamilya.
Ang Hamilton Temple gipahibalo nga tukoron niadtong 1954, gisundan sa usa ka panawagan alang sa tabang sa pagtukod. Ang mga Santos sa New Zealand misanong dihadiha dayon. Ang pipila ka batan-ong mga lalaki, mga batan-ong babaye, ug minyo nga mga magtiayon pormal nga gitawag isip tigtrabahong mga misyonaryo. Ang uban na-kombinse sa ilang pamilya ug mga higala. Ang pipila mibati lang og kadasig nga moadto ug moserbisyo niadtong mga miapil sa pagtukod pinaagi sa paghatag og pagkaon o pinansiyal nga suporta.
Human nga napahinungod ang templo niadtong 1958, daghang mga Santos ang nagpundok ngadto sa templo tabok sa New Zealand ug sa Pacific Area aron makadawat sa ilang pagtuga [endowment] ug pagselyo. Sama pananglit, dihang si Vaha’i ug Sela Tonga sa nasod sa Tonga nakadungog nga usa ka templo ang tukoron sa New Zealand, giplanohan nila ang pagtambong sa pagpahinungod. Bisan sa mga babag sa pagbiyahe, si Vaha’i ug Sela maoy unang magtiayon nga naselyo sa Hamilton Temple.
Litrato sa Hamilton New Zealand Temple ni Brent Thomson
Usa ka Dangpanan gikan sa Kalibotan
Ang Suva Fiji Temple nahimo usab nga dangpanan sa mga Santos sa Pasipiko nga didto nagkapundok. Ang templo napahinungod niadtong Hunyo 18, 2000, panahon sa sibil nga kasamok. Sa pahinungod nga pag-ampo, si Presidente Gordon B. Hinckley (1910–2008) nag-ampo: “Gipanalanginan mo kami og templo niini nga isla sa nasod. Dili na kami mobiyahe pa og layo latas sa kadagatan aron sa paghimo niana nga buhat nga Imong gi-establisar isip sagrado ug gikinahanglan alang sa Imong mga Santos niining dispensasyon sa ulahing mga adlaw. Gidungog Nimo ang among mga pag-ampo ug mipatalinghog sa among mga pangamuyo nga kini nga panalangin moabot kanamo.” Sa panahon sa tensyon, ang mga Santos sa Fiji nakakaplag og kalinaw sulod sa mga bongbong sa templo, usa ka literal nga kadangpan gikan sa kasamok.
Niadtong Pebrero 20, 2016, giguba sa Bagyong Winston ang liboan ka mga balay. Mao kadto ang labing dako nga bagyo nga miigo sa Fiji sukad. Pagkasunod adlaw, si Presidente Henry B. Eyring, kaniadto-Unang Magtatambag sa Unang Kapangulohan, mipahinungod og balik sa Suva Fiji Temple human sa 16-ka bulan nga pag-ayo. Nag-ampo siya: “Salamat sa Imong matinud-anong mga Santos niining matahom nga yuta. Mangamuyo kami sa Imong mga panalangin ngari kanamo, nga sila mapanalanginan og gugma ug kalinaw, nga ang ilang mga yuta magmabungahon, ug nga molambo sila ug mapanalipdan sa matarong nilang mga buhat. Mangayo kami nga sila mapanalipdan gikan sa mga unos sa kinaiyahan ug gikan sa mga kasungian sa katawhan samtang maglakaw sila nga masulondon sa Imong mga sugo.”
Ang mga templo naghatag og espirituhanong dangpanan pinaagi sa pagpunting kanato ngadto kang Jesukristo. Ang pagpabiling konektado ngadto Kaniya pinaagi sa atong mga pakigsaad makatabang nga atong masagubang ang espirituhanong mga bagyo sama sa mga pagsulay ug mga tentasyon. Si Presidente Russel M. Nelson misaad: “Walay mas makatabang kaninyo sa paggunit sa gunitanan nga puthaw kaysa pagsimba sa templo kanunay kon gitugot sa inyong mga sirkumstansiya. Walay laing mas makapanalipod kaninyo samtang inyong masugatan ang mga gabon sa kangitngit sa kalibotan.”
Sa daghan pang mga templo nga karon gipahibalo, gipangtukod pa, o gigamit na sa tibuok kalibotan, mas nahimong sayon alang sa mga Santos ang pagpundok ug pagpangita og kadangpan sulod sa mga templo. Bisan unsa pa kalayo, ang mga sumusunod sa Ginoo gibira padulong ngadto niini nga balay kon nagkinahanglan sila og kadangpan nga Iyang gisaad ngadto sa Iyang mga tawo sa pakigsaad. Kon kita magmatinuoron sa mga pakigsaad nga atong gihimo sa sulod sa balay sa Ginoo, kanunay natong makaplagan ang atong labing dako nga kalinaw ug kadangpan pinaagi sa Manluluwas, nga si Jesukristo.