Mga Prayoridad sa Area sa Pilipinas

Ang baroganan sa Pagpadayag. Ang buhat sa mga Kapangulohan sa Area pagahimoon sumala sa giya sa pagpadayag ug inspirasyon sa Espiritu Santo. Ang mga Prayoridad sa Area nagpakita sa kabubut-on sa Ginoo, nga maangkon pinaagi sa pagpadayag. Ang mga Kapangulohan sa Area nagtinguha sa tabang sa Espiritu Santo sa pagpangutana sa husto nga mga pangutana, sa paghimo og dinasig nga mga desisyon, ug sa pag- establisar og plano nga modasig ug mohiusa sa lokal nga mga lider ug mga miyembro.

Ang baroganan sa Pakigtambag. Ang Kapangulohan sa Area nanaghisgot kon unsaon sa pag-organisar sa talagsaong mga kalig-on ug sa pagtubag sa mga hagit sa area aron sa pagtuman sa buhat sa Dios sa kaluwasan ug kahimayaan.

Ang baroganan sa Pagdelegar. Ang indibidwal nga mga lider dili makahimo ug kinahanglang dili mohimo sa tanan nga sa sila lang. Nagkinahanglan kini sa matag miyembro nga motrabaho aron molambo ang Simbahan.

Ang baroganan sa Pagkamay-tulubagon. Ang mga Kapangulohan sa Area mao ang responsable sa pagdumala sa buhat sa Ginoo diha sa mga dapit ug manubag ngadto Kaniya. Ang mga Kapangulohan sa Area mohatag og oportunidad sa mga lider sa area, lokal nga mga lider sa pagkapari ug sa auxiliary, mga pamilya, ug mga indibidwal nga maoy manubag sa ilang mga responsibilidad sa pagtuman sa mga katuyoan ug mga tumong sa mga Prayoridad sa Area.

Ang baroganan sa Pagbarog pinaagi sa Kinaugalingong Paningkamot. “Ang pagbarog pinaagi sa kinaugalingong paningkamot mao ang abilidad, pasalig, ug paningkamot sa pagsangkap sa espirituwal ug temporal nga mga kinahanglanon sa kinabuhi alang sa kaugalingon ug sa pamilya. Samtang ang mga miyembro mahimong mas mapaningkamoton sa kaugalingon, sila mas makaserbisyo usab sa uban.”v (Kinatibuk-ang Tamdanan nga Basahon 22.0)

Moestablisar ug mopalig-on sa Simbahan sa pagpangandam alang sa Ikaduhang Pag-anhi ni Jesukristo pinaagi sa pagdapit sa tanan nga moduol ngadto Kaniya, mohimo ug motuman sa mga pakigsaad sa templo, ug molig-on sa atong mga pamilya, mga ward, ug mga stake.

Moduol ngadto ni Kristo ug “itanyag ang inyong tibuok nga kalag” ngadto Kaniya (Omni 1:26).

1. Moduol ngadto ni Kristo – Magdapit og usa ka higala nga mokuyog ninyo ug mosinati sa kalipay sa pagsimba ni Jesukristo sa panagtigom alang sa sakramento.

2. Mohimo ug Motuman sa mga Pakigsaad – Mosunod sa tambag sa propeta sa pagpakabuhi nga takos sa rekomend sa templo ug modawat sa langitnong gahom pinaagi sa paghimo ug pagtuman sa mga pakigsaad sa templo.

3. Molig-on sa Nagtubo nga Henerasyon – Moandam ug mosupota sa nagtubo nga henerasyon sa pagserbisyo og full-time nga misyon.

Ang mahinungdanong elemento sa mga Prayoridad sa Area mao ang malamposong pagpatuman niini. Pinaagi sa pagpatuman sa mga Prayoridad sa Area, ang Kapangulohan sa Area ug ang tanang lider sa area moseguro nga ang mga katuyoan ug mga tumong mahimong aktibo nga bahin sa kinabuhi sa tanang miyembro. Ang Kapangulohan sa Area nagplano kon unsaon nila pagtudlo sa panglantaw, mga katuyoan, ug mga tumong sa mga Prayoridad sa Area ngadto sa mga lider, mga pamilya, ug mga indibidwal sa paagi nga makapaaghat ug makapadasig nila ngadto sa paglihok. Ang mga stake ug mga ward human niana motakda og mga tumong ug mga katuyoan nga may kalabotan sa lokal nga mga kahimtang nga nahisubay sa mga Prayoridad sa Area. Ang mga pamilya ug mga indibidwal gidapit usab sa pagbuhat niana.

Atol sa usa sa bag-ohay lang nga mga pagsuroy nila ni Elder ug Sister Wong sa Cabanatuan Philippines Mission, ang mga presidente sa stake ug district giawhag sa pagpakigtambayayong sa mga misyonaryo sa usa ka espesyal nga pamaagi sa pagpangalagad. Ang mga miyembro ug mga lider nga adunay mga kapanguhaan apan kulang sa panahon sa pagbisita sa ilang gisangon nga mga pamilya gihangyo nga mopakigbahin sa mga ngalan sa mga pamilya ngadto sa full-time nga mga misyonaryo. Ang mga miyembro miandam og mga pagkaon isip mga gasa aron sa pagpahayag sa ilang gugma alang sa wala na moapil nga mga miyembro, ug ang mga misyonaryo ang mihatod sa pagkaon ug midapit sa mga nakadawat sa pagbalik sa Simbahan. Ang pagbu-bo sa gugma ug lamian nga mga pagkaon nakapalig-on sa ilang mga pagpamatuod ug nakita nga daghan sa mibalik nga mga miyembro nalipay sa pakigdait sa ilang mga ward ug mga branch.

Kana usa lamang sa ehemplo kon unsaon nga kita makagamit sa atong imahinasyon, magtinguha og inspirasyon, ug magtinabangay sa paggamit sa mga baroganan luyo sa mga Prayoridad sa Area sa pagdapit sa tanan nga Moduol ngadto ni Kristo, Mohimo ug Motuman sa mga Pakigsaad sa Templo, ug Molig-on sa Nagtubo nga Henerasyon. Ang mga Prayoridad sa Area sa Pilipinas mohatag og gamhanang panglantaw alang sa mga miyembro ug mga lider aron sa pagpanalangin sa mga indibidwal ug mga pamilya sa Pilipinas. Kini mohiusa ug magtutok sa mga paningkamot sa mga lider sa pagkapari ug auxiliary sa ilang sagrado nga mga pagpangalagad ug moabot ngadto sa mga panimalay ug mga kasingkasing niadtong ilang giserbisyohan.