Mei he YA Fakauiké
Fakamoʻui ʻe Kalaisi hili ha Fakamamahi
ʻOku nofo ʻa e tokotaha faʻu tohí ʻi Saute ʻAfilika.
Naʻá ku maʻu ha fakamoʻui mo ha nonga ʻia Sīsū Kalaisi ʻi heʻeku fakaakeake mei hano fakamamahiʻi fakasekisuale au.
Consider the Lilies [Fakakaukau ki he ʻakau ko e Lilé], tā fakatātaaʻi ʻe Koleva Timothy
Talu mei he momeniti ʻo hono ueʻi au ke u ngāue fakafaifekau taimi kakató, mo ʻeku ongoʻi ha fuʻu fiemaʻu lahi ke u kamata teuteu. Naʻá ku falala ʻoku ʻi ai ha palani pau mo ʻuhingamālie ʻa e ʻOtuá maʻaku. Naʻá ku kamata fakafonu leva ʻeku ngaahi pepa fakafaifekaú pea fakakakato kotoa e meʻa fakapepa naʻe fiemaʻú ʻi he māhina pē ʻe taha.
ʻI heʻeku tatali ko ia ke fakakakato ʻeku ngaahi teuteu fakaʻosí, naʻá ku fehangahangai mo ha ngaahi faingataʻa naʻa nau siviʻi ʻeku tuí. Ka naʻe ʻikai mafakatataua ʻa e ngaahi faingataʻa ko iá ki he meʻa naʻe ʻamanaki ke u fehangahangai mo iá.
Kumi ha Fakafiemālie ʻia Kalaisi
Naʻá ku foua hano fakamamahiʻi fakaseksuale au ʻi he lolotonga ʻo e taimi ko ʻení. ʻI heʻeku fakaakeake mei he fakamamahi ko ʻení, naʻá ku feinga ke fakakaukauʻi pe ʻe fēfē hoku kahaʻú.
Naʻe ʻi ai haʻaku fehuʻi foʻou: Ko e hā e ʻuhinga naʻá ku foua ai ha faʻahinga meʻa fakamamahi pehē, tautautefito ʻi he lolotonga ʻo ʻeku feinga ke fakahoko e ngāue ʻa e ʻEikí?
Naʻe lōmekina ʻeku moʻuí ʻi he taʻepauʻiá, manavasiʻí, mo e fakaveiveiuá. Naʻá ku tui he ʻikai ke u toe lava ha meʻa. Naʻe ʻikai ke u lava ʻo ʻiloʻi ha toe founga ʻe faifai angé peá u toe fakaakeake ai mei ha faʻahinga aʻusia fakamamahi pehē. Naʻá ku ongoʻi tuenoa lahi mo mole moʻoni ʻeku ʻamanakí.
Naʻá ku hohaʻa naʻa kuo ʻai ʻe he aʻusiá ni ke u taʻetaau, ko ia naʻá ku kole fakahinohino leva ki heʻeku palesiteni fakasiteikí. Naʻá ne fokotuʻu mai ke u kumi ha fakafiemālie ʻi he Fakalelei faifakamoʻui ʻa Sīsū Kalaisí. Naʻá ne fakamamafaʻi ko Kalaisi ʻa e maʻuʻanga tokoni taupotu taha ʻo e fakamoʻuí mo e nongá mo ne fakalotolahiʻi au ke u lau e Tohi ʻa Molomoná.
Naʻá ku kei fefaʻuhi pē mo e puputuʻú mo e veiveiuá. Naʻe fakapoʻuli ʻeku fakakaukaú, pea naʻe ʻikai ke u ʻilo ʻa e meʻa ke faí. Naʻe faleʻi au ʻe heʻeku palesiteni fakasiteikí ke kiʻi taʻofi ʻeku pepa ngāue fakafaifekaú ka u kumi ha tokoni fakapalofesinale mei ha toketā fakaeʻatamai. Naʻe tokoniʻi au ʻe he ngaahi founga matuʻuaki naʻá ne akoʻi maí, fakataha mo e poupou mei hoku ngaahi kaungāmeʻá, ʻi heʻeku fakaakeaké. Ka naʻe tautautefito ʻeku maʻu ʻa e fiemālié ʻi he temipalé.
Ko Hono Fakamoʻui ʻo Kinautolu ʻOku ʻIkai Lava ʻo Fakamoʻuí
ʻI he lolotonga e vahaʻataimi mamahi lahi fau ko ʻení, naʻá ku tafoki ki he ʻOtuá ʻo lotu ke maʻu ha fakamoʻui, ivi, mo ha nonga. ʻI heʻeku fakafemoʻuekinaʻi au ʻi he Tohi ʻa Molomoná, naʻe kamata ke u foua ha ongoʻi nonga lahi fau. Naʻe fakaʻau ʻo mahuʻingamālie makehe kiate au e mālohi faifakamoʻui ʻo Sīsū Kalaisí. Naʻe aʻu ʻo u fakatokangaʻi ko e meʻa naʻá ku fouá naʻe ʻikai ko haku foʻui, pea naʻe fakafiemālieʻi au ʻi heʻeku ʻilo naʻe ʻafioʻi ʻe he ʻOtuá hoku faingataʻaʻiá pea “[te Ne] fai [ʻeku] ngaahi taú” maʻaku (Tokāteline mo e Ngaahi Fuakava 105:14). Naʻe ʻomai ʻe he ʻilo ko ʻení kiate au ʻa e fakapapau mo e fakamahino naʻá ku fiemaʻú.
Naʻe toʻo ʻe Sīsū Kalaisi kiate Ia “ʻa e ngaahi mamahi mo e ngaahi mahaki ʻoku moʻua ai hono kakaí … koeʻuhí ke fonu hono lotó ʻi he ʻaloʻofa” (ʻAlamā 7:11–12). ʻOku maʻu ʻe Kalaisi ha mahino moʻoni ki he ngaahi palopalema he kuohilí kuo tau fouá mo foaki mai ha nonga mo e fiemālie. ʻOkú Ne toe ʻai foki ke tau lava ʻo faʻa fakamolemole, neongo kapau ʻe taimi lōloa haʻatau fakahoko ia.
ʻI heʻeku foua hono ngāueʻi hoku mamahí ʻi he tokoni fakapalofesinale mo fakalaumālié fakatouʻosi, kuó u maʻu ai ha nonga. Naʻá ku toki maʻu kimuí ni hoku ʻenitaumeni fakatemipalé mo hoku uiuiʻi fakafaifekaú, ʻo tuku ʻa e fakafetaʻi kotoa ki he mālohi ʻo Sīsū Kalaisí.
Naʻe akoʻi ʻe ʻEletā Petuliki Kealoni ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku mataotao ʻa Sīsū ʻi he ngaahi meʻa ʻoku ngali taʻemalava ke ikunaʻí. Naʻá Ne hāʻele maí ke fakamalava ʻa e taʻemalavá, huhuʻi ʻa ia ʻoku ʻikai ala huhuʻí, fakamoʻui ʻa ia ʻoku ʻikai ala fakamoʻuí, fakatonutonu ʻa ia ʻoku ʻikai ala fakatonutonú, talaʻofa kiate kinautolu ʻoku ʻikai ha talaʻofá. Pea ʻokú Ne taukei moʻoni ai. Ko hono moʻoní, ʻokú Ne haohaoa moʻoni ai.”
Naʻe hoko ʻo moʻoni kiate au ʻa e ngaahi moʻoni ʻo e Fakalelei ʻa Sīsū Kalaisí ʻi Heʻene fakahoko ʻa e meʻa naʻá ku pehē naʻe taʻemalava ʻi heʻeku moʻuí. Naʻá Ne fakamoʻui au ʻi heʻeku manavasiʻí, veiveiuá, mo e puputuʻú, pea ko e fakaofó, he naʻá Ne fakamoʻui au.
Kapau kuó ke foua ha faingataʻa pe ngaohikovia, manatuʻi ʻoku ʻofaʻi koe! ʻOkú ke taau ke ʻofaʻi mo fakamoʻui koe. Kātaki ʻo ʻūkuma; he ʻoku hoko ʻa e fakamoʻuí ʻi ha taimi pau. Pea ʻoua naʻá ke faingataʻaʻia toko taha pē! ʻOku mahuʻinga ke maʻu ha kau tokoni fakafoʻituitui te ke lava ʻo falala ki aí—he ʻoku tokoni lahi moʻoni.
Kae mahuʻinga tahá, hanga kia Kalaisi. Te Ne fakahaofi koe.