“Naʻe Maluʻi Au,” Liahona, Sune 2025.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Maluʻi Au
Naʻá ku feinga ke teketekeʻi ʻa e ueʻi fakalaumālié, ka naʻe ʻikai fuoloa kuó u ako ha lēsoni mahuʻinga fekauʻaki mo e muimui ki he Laumālie Māʻoniʻoní.
Tā fakatātā ʻa Agnieszka Więckowska
ʻI ha efiafi ʻe taha ʻi heʻeku fakaʻuli atu ki ha paati faiʻaho ʻo haku kaungāmeʻa, naʻá ku fakaʻuli hifo ʻi ha kiʻi hala leini ua naʻe lōngonoa mo fakapōpōʻuli. Fakafokifā pē kuó u maʻu ha ongo faikehe. Naʻe haʻu ha fakakaukau kiate au ʻoku totonu ke u tafoki. Naʻá ku feinga ke fakaʻuhingaʻi, pehē ko e meʻa pē heʻeku ilifiá.
Ka neongo ia, naʻe toe hoko mai ʻa e ueʻí, ʻo tuʻo ua. Naʻá ku lea leʻo lahi, “Tamai Hēvaní, ʻoku ʻikai ha feituʻu ia ke u toe tafoki ki ai. Kapau ʻoku fiemaʻu ke u tafoki, kātaki ʻo fakahā mai e feituʻu ke u tafoki ki aí.”
ʻI he taimi pē ko iá, naʻá ku sio ki ha tauʻanga meʻalele naʻe teʻeki ke u fakatokangaʻi kimuʻa lolotonga e ngaahi taimi ne u faʻa fakaʻuli mai ai he hala ko ʻení. Naʻá ku tafoki fakavave leva ʻo foki ki ʻapi.
Naʻe loto-mamahi hoku ngaahi kaungāmeʻá ʻi heʻeku talaange he ʻikai ke u ʻalu ki he pātí. ʻI heʻenau fakakaukau naʻe ʻuhinga ʻeku fokí koeʻuhí naʻe ʻikai ke u fie ʻalu toko tahá, naʻa nau fokotuʻu mai ke u ʻalu ange mo hoku husepānití ke ma foki mai. Naʻe loto ki ai hoku husepānití. Naʻá ne ʻave au ki he pātí peá ne foki ki ʻapi.
Naʻe tā mai hoku husepānití kimui ange. Naʻá ne leʻo hohaʻa. Naʻá ne pehē, ʻi heʻene fakaʻuli foki ki ʻapí, naʻe taʻofi ia ʻe ha kau polisi ʻo ʻeke pe naʻe sio nai ki ha meʻa ʻoku ngali kehe. Naʻa nau pehē, naʻe fakamālohiʻi ha loli mei he halá ʻe ha kau mēmipa fakakaukengi ʻa ia ne nau tā mo kaihaʻa mei he fakaʻulí. Naʻe mahaloʻi ʻe he kau polisí naʻe taumuʻa e kau kengí ki he lolí koeʻuhí naʻe ʻikai ke toe ʻi ai ha kā ne ofi atu ʻi he taimi ko iá.
Ne u ʻohovale! Kimuʻa angé, ko ʻeku meʻalelé pē ʻe taha naʻe ʻi he foʻi hala tatau ko iá. Naʻá ku ʻiloʻi naʻe ueʻi au ʻe he Laumālie Māʻoniʻoní pea naʻe maluʻi au ʻe he ngaahi mālohi ʻo hēvaní. ʻI heʻeku fakakaukau ki he meʻa kuo hokó, ne haʻu ki heʻeku fakakaukaú ha ngaahi meʻa kehe ne hoko ʻi heʻeku moʻuí. Naʻá ku fakatokangaʻi ko e meʻa naʻá ku pehē ko e hoko noa peé, ko ha ngaahi ueʻi moʻoni ia mei he Laumālie Māʻoniʻoní.
Kuo akoʻi mai ʻe Palesiteni Lāsolo M. Nalesoni, “ʻI he ngaahi ʻaho ka hokó, he ʻikai lava ke tau moʻui fakalaumālie taʻe kau ai ʻa e tataki, fakahinohino mo e ivi fakafiemālie, mo tatau maʻu pē ʻo e Laumālie Māʻoniʻoní.”
ʻI he ʻaho ko iá, naʻe ʻikai ngata pē ʻi hono maluʻi fakalaumālie au ʻe he ivi tākiekina ʻo e Laumālie Māʻoniʻoní; naʻá ne toe maluʻi fakatuʻasino foki au. ʻOku ou ʻiloʻi ʻoku ʻafioʻi kitautolu ʻe he ʻOtuá pea kapau te tau fakafanongo kiate Ia, te Ne tataki ʻetau moʻuí.