Naʻá ku Ongoʻi e ʻOfa ʻa e ʻOtuá

Tā fakatātā ʻa Agnieszka Więckowska

ʻI he kei siʻi ʻeku faʻeé, naʻe liʻaki ia ʻe heʻene faʻeé. Hili ha ngaahi taʻu siʻi mei ai, naʻe mālōlō ʻene tangataʻeikí, pea naʻe ʻave ia ki ha fāmili naʻe taʻeʻofa ʻiate ia. Naʻe ʻai ʻe he aʻusia ko ʻení ke ne tui he ʻikai ke ne lava ʻo maʻu ha fiefia ʻi ha fāmili.

Ka neongo ia, ʻi he taimi naʻá ne kau ai ki he Siasí, naʻe liliu ʻene tōʻonga fakakaukaú ʻi he fakaʻau ke mahino kiate ia ʻa e mahuʻinga ʻo e fāmilí ʻi he palani ʻa e ʻOtuá ki he fiefiá. Naʻá ne ngāue fakafaifekau pea faifai peá ne mali mo ʻeku tamaí. Naʻá na faʻu fakataha ha fāmili naʻe fonu ʻi he tui kia Sīsū Kalaisí pea fai honau lelei tahá ke moʻui ʻo fakatatau mo ʻenau ngaahi fuakava mo e ʻOtuá. Ko e faʻahinga fāmili ia ne u tupu hake ai ʻi ha kiʻi kolo siʻisiʻi ʻi ʻĀsenitina naʻe ui ko Lima.

Hili ʻeku ngāue fakafaifekau taimi kakató, ʻoku ou manatuʻi ʻeku loto-mamahi mo puputuʻu ʻi he ngāue fakapalōfesinale ke fakahokó. Ka naʻe fakamālohia au ʻe he Tamai Hēvaní ke tauhi ʻeku tuí mo ʻeku ngaahi fuakavá, pea naʻá Ne tāpuakiʻi au ʻaki ha faʻē naʻá ne tauhi foki mo ʻene ngaahi fuakavá. Naʻe hoko ʻene tuí mo ʻene vilitakí ko ha maʻuʻanga ueʻi fakalaumālie kiate au.

ʻI heʻeku fakakaukau ki he ako ʻi he ʻunivēsití, naʻá ku fakakaukau ki ha lēsoni naʻe ʻikai ko e meʻa ia naʻá ku fakaʻānaua ki ai ʻi heʻeku akó. Naʻe fakatokangaʻi ʻe heʻeku faʻeé ʻeku loto-mamahí peá ne pehē mai, “Pikitai ki hoʻo ngaahi fakaʻānauá. Fili ʻa e hala ʻokú ke ʻiloʻi ʻi ho lotó ʻoku totonú.”

ʻI heʻeku kei siʻí, naʻe ʻi ai ʻeku ngaahi fakaʻānaua fekauʻaki mo e mūsiká mo e fakafiefiá. Naʻá ku ako ke tā e pianó, tataki e ngaahi kuaea ʻa e Siasí, mo vahevahe ʻa e ongoongoleleí ʻi he mūsiká. Naʻe hanga ʻe he ngaahi faingataʻa mo e ngaahi meʻa fakahohaʻa ʻo e moʻuí ʻo tohoakiʻi ʻeku tokangá mei he ngaahi fakaʻānaua ko iá.

Naʻe pehē ʻe Palesiteni Lāsolo M. Nalesoni ko kinautolu ʻoku nau fai ha ngaahi fuakava mo e ʻOtuá te nau “maʻu ha faʻahinga ʻofa mo ha ʻaloʻofa makehe” pea ʻi hono fakahoko ha faʻahinga fuakava peheé “ʻe tokoniʻi ai kitautolu ʻe he ʻOtuá ke tau aʻusia e tuʻunga te tau lava ʻo aʻusiá.”

ʻOku ʻomi ʻe heʻetau ngaahi fuakavá ha maluʻi kiate kitautolu. ʻI heʻeku tauhi ʻeku ngaahi fuakavá, naʻá ku ongoʻi ʻEne ʻofa makehe kiate aú. Naʻá ne toʻo ʻa e ngaahi fakafeʻātungia mei hoku halá kae ʻoua kuo ʻatā hoku halá.

Naʻá ku haʻu mei ha kiʻi kolo siʻisiʻi naʻe ʻikai ha meʻa lahi ai maʻa ha kiʻi tamasiʻi taʻeʻiloa. ʻI he ʻaho ní, ʻoku ou fakahoko ha ngaahi koniseti fakapalōfesinale mo ha fale faiva ʻi Puenosi ʻAealesi. Ko hoku uaifí, fānaú, mo e ngāue fakapalōfesinalé ʻa ʻeku ngaahi fakaʻānaua kuo hoko ʻo moʻoní.

ʻOku ou tui ʻoku finangalo ʻa e ʻOtuá ke tau lavameʻa. Kapau te tau vilitaki, te Ne teuteu ha founga maʻatautolu ke tau aʻusia ai ʻa e meʻa kotoa pē ʻokú Ne finangalo ke tau aʻusiá. Ko e mahuʻinga tahá, te Ne tokoniʻi kitautolu ke tau hoko ko ha meʻangāue ʻi Hono toʻukupú ʻi hono ʻomi e niʻihi kehé kiate Iá.