Ko e Fokotuʻutuʻu Fakalangi ʻa e Tamai Hēvaní

Tā fakatātā ʻa Agnieszka Więckowska

ʻI heʻeku hoko ko ha taki fakamisiona ʻi Palāsilá, naʻá ku fakaʻaongaʻi ha uike ʻo ofi ki he fakaʻosinga ʻo e 2023 ke ʻinitaviu ha toko 60 mei heʻemau kau faifekau ʻe toko 160. Naʻe kole mai ʻe ha taha ʻo kinautolu, ko ha taki fakasouni, ke ma talanoa toko ua. ʻI heʻema fetaulakí, naʻá ne mono mai ha puha sū peá ne talamai kuo fakatau ʻe heʻene ongomātuʻá ha sū ʻe taha maʻa ha taha ʻi he misioná te ne fiemaʻu.

Naʻá ku fakamālō kiate ia koeʻuhí ko e angaʻofa mo e fakaʻatuʻi ʻa ʻene ongomātuʻá. Ka neongo ia, naʻá ku fakaʻamu fakalongolongo pē, ko e kiʻi sū siʻisiʻi, ʻa ia ko e fika 8.5, naʻe lahi ange hono tui ʻe he tokolahi taha ʻo ʻemau kau faifekaú. Naʻá ku houngaʻia ai pea faʻo e suú ki heʻeku kaá.

Hili ha ʻaho ʻe ua mei ai, naʻá ku ʻinitaviu ha kau faifekau tokolahi ange, ʻi he taimi naʻá ku fakaafeʻi ai ha faifekau fofonga malimali ki hoku ʻōfisí. Ko e toki uike pē ia ʻe fā ʻene tau mai mei Kuatemalá. ʻI he taimi naʻá ku ʻeke ange ai pe ʻokú ne fēfeé, naʻe liliu ʻene malimalí ʻo kamata ke tangi.

Naʻá ne tangi ʻi heʻene ongoʻi mā ʻi hono fakamataliliʻi ia ʻe ha faifekau ʻe taha ʻi he ʻikai ke ne fakamaʻu aʻu hono soté. Ko ha toki papi ului ia pea naʻá ne tupu hake ʻi ha ʻapi ʻo ha mātuʻa taautaha. Naʻe ʻikai mei feʻunga e paʻanga ne maʻu ʻe heʻene faʻeé ke tokoniʻi ʻaki ia mo e toko ua ʻo e fānaú. Naʻe fuʻu siʻisiʻi hono ʻū sote naʻe foaki angé, ko ia ai, naʻá ne fakaʻaongaʻi hono kiʻi hēkesi motuʻá ke fakapuliki ʻaki e fakamaʻu ʻi ʻolunga ne ʻikai lava ʻo fakamaʻú.

Naʻá ku ʻoange ki ai ha paʻanga naʻe foaki mai ʻe ha mēmipa ki he kau faifekau ʻoku nau fiemaʻu ha valá, peá u talaange ke ʻalu ʻo fakatau haʻane sote foʻou. Naʻá ku fakatokangaʻi leva naʻe fakaʻau ke maumau hono suú. Fakafokifā pē kuó u manatuʻi ʻa e sū ʻi heʻeku kaá! Naʻá ku fehuʻi ange pe ʻoku saisi fiha hono suú, ʻi heʻeku fakatokangaʻi atu ʻoku vaʻe siʻisiʻí.

Naʻá ne tali mai, “ʻOku ou tui saisi 8.5.”

Naʻá ku tangi ʻi heʻeku fakamatalaʻi ange naʻe foaki mai ʻe ha ongomātuʻa ʻo ha faifekau, ha sū ʻi hono saisí. Naʻá ma faitā pea ʻave e taá ki he taki fakasouní. Naʻe ongoʻi ʻe heʻene tangataʻeikí, ʻa ia ko ha tokotaha Kuatemala foki mo ia, ʻi heʻene tokoniʻi ha faifekau mei hono fonua tupuʻangá.

ʻI homau misioná, ʻoku hoko fakaʻaho ʻa e ngaahi faʻahinga tāpuaki ko ʻení. Mahalo ʻe pehē ʻe ha niʻihi ko ha tupukoso pē ʻeni, ka ʻoku ou tui tatau mo ʻEletā Niila A. Mekisuele (1926–2004), ʻa ia naʻá ne pehē ko ha “fokotuʻutuʻu fakalangi” ia ʻo ha Tamai Hēvani ʻofa.