Ko e Fiefia Naʻe ʻOmi ʻe he Ongoongó

Joseph William Billy Johnson: Holiness to the Lord [Siosefa Viliami Pili Sionisoni: Māʻoniʻoni ki he ʻEikí], tā fakatātā ʻa Emmalee Glauser Powell

ʻI ha efiafi ʻe taha ʻi Sune ʻo e 1978, naʻe foki ai ʻa Pili Sionisoni ki hono ʻapí ʻi Keipi Kousi, Kana. Naʻá ne ʻaukai mo e kau mēmipa kehe ʻi hono haʻofangá, ʻo hangē ko ia naʻa nau faʻa faí, ka naʻe ʻikai fai ʻe he ʻaukaí ha meʻa ke hiki hake ai hono laumālié. Naʻá ne helaʻia mo loto-foʻi koeʻuhí he naʻe fakaʻau ke tokolahi ange ʻa e kakai tuí kuo ʻikai ke nau toe lotu fakataha mo ia pea nau foki ki honau ngaahi siasi motuʻá.

Naʻe fakaʻamu ʻa Pili ke ne toe ongoʻi mālohi fakalaumālie mo fakaeloto. ʻI ha ngaahi māhina kimuʻa, naʻe talaange ai ʻe ha mēmipa ʻi hono haʻofangá fekauʻaki mo ha fakahā naʻá ne maʻu. Naʻá ne talaange, “ʻE vavé ni pē ʻa e taimi ʻe haʻu ai ha kau faifekau. Kuó u mamata ki ha kau tangata papālangi ʻoku nau haʻu ki heʻetau lotú. Naʻa nau fāʻofua mo kau fakataha mo kitautolu ʻi he moihuú.” Naʻe talaange ʻe ha toe fefine ʻe taha naʻá ne maʻu ʻa e fakahā tatau. Naʻe misi ʻa Pili ki ha kau tangata papālangi ne nau hū mai ki hono falelotú ʻo pehē, “Ko ho ngaahi tokoua kimautolu, pea kuo mau omi ke papitaiso koe.” Hili iá, naʻá ne misi ki ha kakai ʻUliʻuli ne nau omi mei ha feituʻu mamaʻo mo lahi ke kau ki he Siasí.

Ka naʻe ʻikai pē ke mole atu ʻene loto-foʻí.

Naʻe fakaʻau ke fuoloa e poʻulí, ka naʻe ʻikai ke ne lava ʻo mohe. Naʻe ongo mālohi kiate ia ke fanongo ki he Kautaha Fakamafola Lea Faka-Pilitāniá (BBC) ʻi he letioó—ko ha meʻa naʻe teʻeki ke ne fai ʻi ha ngaahi taʻu lahi.

Naʻa ne maʻu ʻa e letioó, ko ha sīpinga lanu melomelo mo ha kau lanu siliva ʻe fā ʻoku mioʻi, ʻoku tuʻu ʻo ofi ki he tuʻuʻanga ʻo e letioó. Naʻe ʻuʻulu hake ke moʻui ʻa e letioó ʻi heʻene fakamoʻui iá. Naʻá ne mioʻi takai ʻa e kau silivá, pea ngaʻunu ʻa e kiʻi laine kulokulá ʻi he ʻotu fiká. Ka naʻe ʻikai ke ne maʻu ʻa e fakamafolá.

Pea hili ha houa ʻe taha ʻo e fekumí, naʻe faifai pea maʻu ʻe Pili ha ongoongo mei he BBC. Naʻe fanongonongo ʻe he faiongoongó kuo maʻu ʻe he Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha fakahā. Ko e kakai tangata moʻui taau kotoa pē ʻi he Siasí, ʻo tatau ai pē pe ko e hā e matakalí, te nau lava he taimí ni ʻo maʻu ʻa e lakanga fakataulaʻeikí.

Naʻe tō ʻa Pili ʻo tangi ʻi he fiefia. ʻE faifai pea aʻu mai ʻa e mafai ʻo e lakanga fakataulaʻeikí ki Kana, ʻo ne ʻomi ʻa e ngaahi tāpuaki kotoa ʻo e ongoongoleleí ki hono kakaí.

Naʻe tūʻuta ʻa e kau faifekaú ʻi Keipi Kousi ʻi he konga kimui ʻo e taʻu ko iá, ʻo papitaiso ʻa Pili Sionisoni mo ha kakai tui ʻe laungeau. Talu mei he taimi ko iá, mo e mafola vave ʻa e Siasí ʻi Kana mo e ngaahi fonua kaungāʻapi ʻi ʻAfilika Hihifó. Naʻe fanongonongo ʻa e Temipale Cape Coast Ghana ʻi ʻOkatopa 2023; ʻe hoko ia ko e temipale hono tolu ʻi he fonuá.