Kaveinga ʻo e Māhina Ní: Ko e Fekumi ki he Fiefiá ʻi ha Māmani Hinga

Si‘i ngaahi kaungāmeʻa,

ʻOku ʻi ai ha lea naʻá ku ako mei heʻeku palesiteni fakamisioná ʻoku ou pīkitai ki ai he taimi ʻoku tokatāmaki ai ʻa e taimí. Naʻá ne pehē, “ʻOku tokonaki ʻe he ʻOtuá hoʻomou fiefiá.”

Te ke ala vakavakai takai ki he ngaahi taú, ngaahi fakatamakí, fetāʻakí, fekeʻikeʻí, mo e mahamahakí ʻi heʻene lahi fau ʻi māmani he ʻaho ní peá ke fifili pe ʻe lava fēfē ke hoko ʻeni.

ʻOku fēfē?

Sīsū Kalaisi.

“ʻOua ʻe manavahē: he vakai, ʻoku ou ʻomi kiate kimoutolu ʻa e ongoongo lelei ʻo e fiefia lahi” ko e meʻa ia naʻe talaki ʻe he āngeló ʻi he ʻaloʻi ʻo Kalaisí (Luke 2:10, naʻe tānaki atu hono fakamamafaʻí). Ko e taumuʻa ʻa e ʻOtuá ʻi hono fekauʻi mai ʻa Kalaisi ki māmaní ke fakapapauʻi hoʻo moʻui mo e fiefia taʻengatá. Ko hono fakaofó, he ʻokú Ne palōmesi atu ʻa e fiefiá ʻo fou ʻia Kalaisi ʻi ha konga pē hoʻo moʻuí—ʻi he leleí mo e koví, ʻi he taimi tokamālié mo e koví. Ko e pōpoaki ia ʻoku mau fie vahevahe mo kimoutolu ʻi he māhina ní: Ko Sīsū Kalaisi ʻa e fiefiá.

Naʻa mō ia, ʻoku tau ʻiloʻi ʻe lava ke faingataʻa ke maʻu ʻa e fiefiá ʻi he taimi ʻe niʻihi. ʻOku mau fakatahatahaʻi ai ʻa e ngaahi fakamatalá he māhiná ni ke fakahaaʻi atu ko e fiefiá ʻoku malava maʻu pē ke maʻu. Ko e fiefiá ko ha konga ia ho natula faka-ʻOtua ko e fānau ʻa e ʻOtuá mo ho tofiʻa ko ha ākonga ʻa Kalaisí. Neongo ʻa e meʻa kotoa, te ke kei lava pē ʻo fiefia ʻi he māmani hingá ni.

Ko ha niʻihi ʻeni ʻo e ngaahi fakamatala mei he kakai lalahi kei talavoú ʻi he māhina ní:

• Ko ha tokotaha lahi kei talavou mei ʻAfilika Tonga ʻokú ne maʻu ha fakamoʻui ʻia Kalaisí hili haʻane foua hano fakamamahiʻi fakasekisuale

• Ko ha tokotaha lahi kei talavou mei ʻUlukuai naʻá ne maʻu ʻa e fiefiá ʻi he fakatomala fakaʻahó

• Ko ha tokotaha lahi kei talavou mei Kānata naʻá ne maʻu ha fiefia mo ha fehokotaki ʻi he ongoongoleleí hili haʻane kumi ʻi ha ngaahi feituʻu hala

ʻOku tau toe maʻu foki mo ha ngaahi talanoa ko ha konga ʻo ʻetau ngaahi fakamatala hokohokó:

• Ngaahi taukei ʻo e moʻuí: Ko ha ngaahi fakamanatu ʻaonga mo ha ʻamanaki ki he taimi ʻokú ke fehangahangai ai mo e ngaahi liliu lalahi ʻo e moʻuí

• Ko Hono Fakaʻaongaʻi ʻo e Tokāteline mo e Ngaahi Fuakavá ki Hoʻo Moʻuí: Tokoni ki hoʻo ako ʻa e Haʻu ʻo Muimui ʻIate Aú fekauʻaki mo e fili ke tokanga taha ki he fiefiá

• Fakataha Lotu Filí: Founga te tau lava ai ʻo ikunaʻi ʻa e ʻahiʻahi ke fakafehoanakí

• Ngaahi Fehuʻí mo e Talí: ʻOku founga fēfē haʻatau feilaulau ʻi he fiefia?

Naʻá ku fakakaukau lōloa mo lahi fekauʻaki mo e meʻa ke tohi atu ai ʻi he tohi ko ʻení. Naʻá ku fakakaukauʻi ha ngaahi founga kehekehe ʻe lava ke mahino ai kiate au hoʻomou moʻuí, ke fakahaaʻi atu ʻoku mahino kiate au ʻa e ngaahi faingataʻa ʻoku mou fehangahangai mo ia ʻoku ʻikai fuʻu fakafiefiá.

Ka naʻá ku toki fakatokangaʻi neongo kapau he ʻikai mahino kakato kiate au, ʻoku ʻi ai ha toko taha ʻe mahino ki ai. Kuo hoko pea ʻe hoko maʻu ai pē ʻa Sīsū Kalaisi ko e talí.

Laukonga fiefiá,

Tori Stone, tokataha akoako YA Fakauike