អែលឌើរ ម៉ៃឃល ហ្សាស្លា

ពួកចិតសិបនាក់ដែលមានសិទ្ធិអំណាចទូទៅ

អែលឌើ ម៉ៃឃល ហ្សាស្លា ចងចាំពីការតស៊ូពុះពារនៅឆ្នាំ២០១៧ បានយ៉ាងច្បាស់ ។ នៅថ្ងៃអង្គា ក្នុងខែមករា លោកបានបាត់បង់ការងាររបស់លោកនៅក្នុងក្រុមហ៊ុនច្បាប់អន្ដរជាតិមួយ នៅពេលដែលក្រុមហ៊ុននោះប្រកាសក្ស័យធន ។ នៅថ្ងៃបន្ទាប់ ផ្ទះរបស់លោកបានជន់លិចទឹក នៅពេលដែលប្រព័ន្ធទឹកបានខូចខាត ។ ចោរបានគាស់ផ្ទះរបស់លោកនៅថ្ងៃទីបី ដោយព្យាយាមលួចយករបស់ទ្រព្យមានតម្លៃរបស់គ្រួសារលោក ។ ក្នុងរយៈពេលតែពីរបីថ្ងៃប៉ុណ្ណោះ ជីវិតរបស់លោកបានក្រឡាប់ចាក់ ។

លោកបានមានប្រសាសន៍ថា « នៅថ្ងៃអាទិត្យនោះ ខ្ញុំបានញញឹមដូចរាល់ដង កាលខ្ញុំអង្គុយនៅលើវេទិកាក្នុងនាមជាប្រធានស្ដេក » ។ « ពុំមាននរណាម្នាក់ដឹងពីហេតុការណ៍ដែលបានកើតឡើងនោះទេ ។ ប៉ុន្ដែនៅក្នុងចិត្ដ ខ្ញុំមានទុក្ខសោកយ៉ាងខ្លាំង ។ ខ្ញុំបានស្ថិតនៅក្នុងកន្លែងដ៏ងងឹតបំផុត » ។

បន្ទាប់ពីការប្រជុំ បុរសដ៏ទន់ភ្លន់ និងស្ងប់ស្ងាត់ម្នាក់នៅក្នុងវួដ បានសួរលោកថាមានរឿងអ្វីកើតឡើង ។ អែលឌើរ ហ្សាស្លា បានមានប្រសាសន៍ថា « គាត់គ្រាន់តែស្ដាប់ ហើយបន្ទាប់មកឱបខ្ញុំ » ។ « ខ្ញុំបានទទួលអារម្មណ៍ថាព្រះអម្ចាស់បានឱបក្រសោបខ្ញុំ ថាទ្រង់ជ្រាបដឹងពីកាលៈទេសៈដ៏អកុសលរបស់ខ្ញុំ ហើយថាគ្រប់យ៉ាងនឹងបានល្អប្រសើរ » ។

ម៉ៃឃល ហ្សាស្លា ជាកូនប្រុសរបស់ អ័រមិន ឡុតវិហ្គ និង អ័មត្រត ហាន់ណា បានកើតនៅ នូម៉ុនស្ទើរ អាល្លឺម៉ង នៅថ្ងៃទី២៦ ខែកក្កដា ឆ្នាំ១៩៧២ ។ លោកបានធំឡើងនៅ ស្លេសស្វិក ហូលស្ដាញ ហើយក្រោយមកបានបម្រើនៅបេសកកម្ម យូថាហ៍ អូហ្គឌិន ។ ភរិយារបស់លោកគឺ ម៉ាហ្គ្រែត អាន រ៉ោបានបម្រើនៅបេសកកម្ម វិសាលដ្ឋានព្រះវិហារបរិសុទ្ធ ។ ពួកលោកបានរៀបអាពាហ៍ពិពាហ៍នៅព្រះវិហារបរិសុទ្ធ ហ្វ្រែងហ្វឺត អាល្លឺម៉ង់ នៅថ្ងៃទី៤ ខែមេសា ឆ្នាំ១៩៩៧ ។ នៅពេលលោកបានទទួលការហៅរបស់លោក ពួកលោកបានរស់នៅជាមួយកូនៗប្រាំនាក់របស់ពួកលោកនៅ ហ្គ្រីសហេម អាល្លឺម៉ង់ ជាកន្លែងដោយពួកលោករីករាយនឹងការដើរព្រៃ និងវិស្សមកាលនៅលើកោះក្នុងប្រទេសដាណឺម៉ាក ។

អែលឌើរ ហ្សាស្លា បានទទួលបរិញ្ញាបត្រផ្នែកច្បាប់ពីសាកលវិទ្យាល័យម៉ៃនស៍ ក្នុងឆ្នាំ២០០០ ។ លោកបានបញ្ចប់អាជីពផ្នែកច្បាប់របស់លោកក្នុងនាមជាដៃគូប្រតិបត្ដិការជាន់ខ្ពស់ នៅក្រុមហ៊ុន McDermott Will & Emery ។

មុនពេលការហៅរបស់លោកជាពួកចិតសិបនាក់ដែលមានសិទ្ធិអំណាចទូទៅ អែលឌើរ ហ្សាស្លា បានបម្រើជាពួកចិតសិបនាក់ប្រចាំតំបន់នៅតំបន់អឺរ៉ុបកណ្ដាល ប្រធានបេសកកម្មបណ្ដោះអាសន្ននៅបេសកកម្ម ហ្វ្រែងហ្វឺត អាល្លឺម៉ង់ ប្រធានសេ្ដក ទីប្រឹក្សាជាន់ខ្ពស់ និងទីប្រឹក្សាក្នុងគណៈប៊ីស្សព ។