« អែលឌើរ ប៊ី. ខូរី ឃូវែលយើរ៍ » លីអាហូណា ខែឧសភា ឆ្នាំ២០២៥ ។
អែលឌើរ ប៊ី. ខូរី ឃូវែលយើរ៍
ពួកចិតសិបនាក់ដែលមានសិទ្ធិអំណាចទូទៅ
នៅពេលអែលឌើរ ប៊ី. ខូរី ឃូវែលយើរ៍ បានប្រកាសថាលោកឈប់ពីការងាររបស់លោកដើម្បីធ្វើជាប្រធានបេសកកម្មសម្រាប់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មិត្ដរួមការងាររបស់លោកបានសួរថា « តើអ្នកឆ្កួតទេឬ ? »
អែលឌើរ ឃូវែលយើរ៍ បានមានប្រសាសន៍ថា មិត្ដរួមការងាររបស់លោកមានការលំបាកក្នុងការយល់ពីមូលហេតុ ដែលលោកនឹងចាកឆ្ងាយពីអាជីពដែលកំពុងរីកចម្រើនរបស់លោករយៈពេលបីឆ្នាំ ។ លោកបានមានប្រសាសន៍ថា ប៉ុន្ដែសំណួររបស់ពួកគេគឺជាឱកាស « ដើម្បីចែកចាយពីមូលហេតុដែលយើងធ្វើកិច្ចការដែលយើងធ្វើ និងហេតុអ្វីយើងជឿអ្វីដែលយើងជឿ ហើយអំពីព្រះដែលយើងជឿលើ ។ នោះគឺព្រះយេស៊ូវគ្រីស្ទ » ។
ប្រាយអិន ខូរី ឃូវែលយើរ៍ បានកើតនៅថ្ងៃទី១២ ខែមករា ឆ្នាំ១៩៦៩ នៅទីក្រុងឡូសអាន់ជើឡែស រដ្ឋកាលីហ្វ័ញ៉ា ជាទីកន្លែងដែលលោកត្រូវបានទទួលយកមកចិញ្ចឹម និងបីបាច់ ។ ឪពុករបស់លោក ហែនហ្ស ចូអាឆិម ឃូវែលយើរ៍ គឺជាមន្ដ្រីប៉ូលីស ។ ម្ដាយរបស់លោក ចូអាន់ លែសលី ចានេក ឃូវែលយើរ៍ គឺជាស្ដ្រីមេផ្ទះ ។ លោកគឺជាកូនច្បងក្នុងចំណោមបងប្អូនបួននាក់ ។
កាលនៅជាអ្នកផ្សព្វផ្សាយសាសនាវ័យក្មេង អែលឌើរ ឃូវែលយើរ៍ បានបម្រើនៅបេសកកម្មប្រេស៊ីល សៅប៉ូឡូខាងត្បូង ។ លោកបានបញ្ចប់ការសិក្សាថ្នាក់បរិញ្ញាបត្រផ្នែកទំនាក់ទំនងសាធារណៈពីសាកលវិទ្យាល័យ ព្រិកហាំ យ៉ង់ នៅឆ្នាំ១៩៩៤ ។ លោកបានចូលធ្វើការនៅ Shell Oil Company នៅឆ្នាំ១៩៩៦ ជាកន្លែងដែលលោកធ្វើការជាមួយអង្គភាពធុរៈកិច្ចជាច្រើននៅអាមេរិកខាងកើត ។
អែលឌើរ ឃូវែលយើរ៍ បានរៀបអាពាហ៍ពិពាហ៍នឹង វិនឌី ស៊ូ ម៉ានវ៉ារីង នៅថ្ងៃទី១៨ ខែកក្កដា ឆ្នាំ១៩៩២ នៅព្រះវិហារបរិសុទ្ធ ឡូសអែនជើឡែស រដ្ឋកាលីហ្វ័ញ៉ា ។ ពួកគាត់មានកូនបុ្រសបួននាក់ ។ គូស្វាមីឃូវែលយើរ៍ បានបម្រើជាថ្នាក់ដឹកនាំបេសកកម្មនៅប្រេស៊ីល ឃើរីទីបាខាងត្បូង ពីឆ្នាំ២០១៦ ដល់ឆ្នាំ២០១៩ ហើយបានរស់នៅខាធី រដ្ឋតិចសាស នៅពេលលោកទទួលបានការហៅរបស់លោក ។
អែលឌើរ ឃូវែលយើរ៍ ធ្លាប់បម្រើជាពួកចិតសិបនាក់ប្រចាំតំបន់នៅអាមេរិកខាងជើងក្នុងតំបន់ខាងត្បូងឈាងខាងកើត ប្រធានស្ដេក ទីប្រឹក្សាក្នុងគណៈប្រធានស្ដេក ទីប្រឹក្សាជាន់ខ្ពស់ ប៊ីស្សព ទីប្រឹក្សាក្នុងគណៈប៊ីស្សព និងប្រធានក្រុមយុវជនប្រចាំវួដ ។