« អែលឌើរ ក្លេមិន អិម ម៉ាតស្វាហ្គោថាតា » លីអាហូណា ខែឧសភា ឆ្នាំ២០២៥ ។
អែលឌើរ ក្លេមិន អិម ម៉ាតស្វាហ្គោថាតា
ពួកចិតសិបនាក់ដែលមានសិទ្ធិអំណាចទូទៅ
នៅពេលអែលឌើរ ក្លេមិន អិម ម៉ាតស្វាហ្គោថាតា នៅវ័យក្មេង នៅប៊ុតស្វាណា លោកតែងតែអានព្រះគម្ពីរប៊ីបឮៗឲ្យលោកយាយរបស់លោកស្ដាប់ ។ លោកបានអាន សាំយូអែល ទី១ ៣ ដែលព្រះទ្រង់មានព្រះបន្ទូលទៅកាន់សាំយូអែល ដែលត្រូវបានហៅជាព្យាការីនាពេលក្រោយមក ។
« សំណួរទូទៅរបស់ខ្ញុំគឺ ‹ តើព្រះនៅធ្វើរឿងដដែលដូចនេះឬទេ ? › »
សំណួរនោះបានចាប់ផ្ដើមដំណើររបស់លោក ក្នុងការព្យាយាមស្វែងរកព្រះដែលនៅតែមានព្រះបន្ទូល ។ ក្រោយមកនៅពេលដែលលោកមានអាយុ ១៦ឆ្នាំ លោកបានជួបនឹងពួកអ្នកផ្សព្វផ្សាយសាសនាពួកបរិសុទ្ធថ្ងៃចុងក្រោយ បានអានព្រះគម្ពីរមរមនបានប៉ុន្មានថ្ងៃ ហើយបានទូរសព្ទទៅពួកអ្នកផ្សព្វផ្សាយសាសនាថា លោកចង់ទទួលបុណ្យជ្រមុជទឹក ។
ក្រោយមកលោកបានក្លាយជាប្រធានស្ដេកដំបូងគេដែលត្រូវបានហៅនៅប៊ុតស្វាណា បន្ទាប់មកត្រូវបានហៅជាពួកចិតសិបនាក់ប្រចាំតំបន់ដំបូងគេ ហើយឥឡូវត្រូវបានហៅជាពួកចិតសិបនាក់ដែលមានសិទ្ធិអំណាចទូទៅដំបូងគេ ។
លោកបានមានប្រសាសន៍ថា « ខ្ញុំមាននូវទីបន្ទាល់ដែលចាក់ឫសជ្រៅ ថាព្រះមានព្រះជន្មរស់នៅ ហើយមានព្រះបន្ទូលមកកាន់យើងនៅថ្ងៃចុងក្រោយនេះ ហើយថាយើងរស់នៅក្នុងថ្ងៃ និងពេលដែលពួកព្យាការីមាននៅលើផែនដី » ។
ក្លេមិន មូសាមិ ម៉ាតស្វាហ្គោថាតា បានកើតនៅ មីតដលភីត ប៊ុតស្វាណា នៅថ្ងៃទី៨ ខែមករា ឆ្នាំ១៩៨០ ជាកូនរបស់ បូចូតហ៊ី ចេ. និង រ៉ាឆែល អិម ម៉ាតស្វាហ្គោថាតា ។ បន្ទាប់ពីបម្រើនៅបេសកកម្មខេបថោន អាហ្វ្រិកខាងត្បូង លោកបានជួបភរិយារបស់លោក ណូវលធី ប៊ូស៊ីស៊ីវី ប៊ុតថេលេហ្សី នៅព្រឹត្ដិការណ៍យុវមជ្ឈិមវ័យនៅលីវប្រចាំតំបន់ ។ ពួកគាត់បានរៀបអាពាហ៍ពិពាហ៍នៅព្រះវិហារបរិសុទ្ធ យូហានស៍ប៊ើក អាហ្វ្រិកខាងត្បូង នៅថ្ងៃទី២៨ ខែកុម្ភៈ ឆ្នាំ២០០៤ ។ ពួកលោកមានកូនបីនាក់ ។
លោកបានទទួលសញ្ញាបត្របរិញ្ញាបត្រផ្នែកទស្សនវិជ្ជា ។ លោកបានបម្រើការងារក្នុងឧស្សាហកម្មយានយន្ដជាមួយយីហោរថយន្ដផ្សេងៗ ដោយកាន់តំណែងថ្នាក់ដឹកនាំជាច្រើន រួមមានអ្នកគ្រប់គ្រងផ្នែកលក់ អ្នកគ្រប់គ្រងទូទៅ និងអ្នកគ្រប់គ្រងប្រចាំប្រទេសនៅក្រុមហ៊ុន Barloworld Motor ។
នៅពេលលោកត្រូវបានហៅ អែលឌើរ ម៉ាតស្វាហ្គោថាតា កំពុងបម្រើជាអ្នកធ្វើពិធីបរិសុទ្ធនៅក្នុងព្រះវិហារបរិសុទ្ធនៅព្រះវិហារបរិសុទ្ធ យូហានស៍ប៊ើក អាហ្វ្រិកខាងត្បូង និងជាអ្នកឯកទេសភាពខ្លួនទីពឹងខ្លួនប្រចាំតំបន់ ។