« អែលឌើរ ខេវីន ជី ប្រោន » លីអាហូណា ខែឧសភា ឆ្នាំ២០២៥ ។
អែលឌើរ ខេវីន ជី ប្រោន
ពួកចិតសិបនាក់ដែលមានសិទ្ធិអំណាចទូទៅ
នៅពេលដែល ខេវីន ប្រោន មានអាយុ ១២ឆ្នាំ អ្នកផ្សព្វផ្សាយសាសនាជាស៊ីស្ទើរ បានបបួលលោកឲ្យអានព្រះគម្ពីរមរមន ។ ដូច្នេះជារៀងរាល់ព្រឹកលោកបានអធិស្ឋាន អាន ហើយអធិស្ឋានម្ដងទៀត ។ នៅក្នុងការអធិស្ឋានម្ដងៗ លោកតែងទូលសួរព្រះវរបិតាសួគ៌ថា តើព្រះគម្ពីរមរមនពិតឬអត់ ។
លោករំឭកថា នៅព្រឹកមួយនោះ កាលកំពុងអធិស្ឋាន លោក « មិនទាន់ទាំងបានសួរសំណួរផង ។ ចម្លើយរបស់ព្រះអម្ចាស់បានមកដល់លោកតាមរបៀបមួយដ៏ខ្លាំងក្លា » ។ លោកបានទទួលអារម្មណ៍ថា ព្រះអម្ចាស់មានបន្ទូលដល់លោក ៖ « យើងស្គាល់អ្នក ហើយយើងស្រឡាញ់អ្នក ។ « អ្នកគឺជាបុត្រារបស់យើង » ។
ភ្លាមៗនោះ ព្រះវិញ្ញាណបរិសុទ្ធបានបញ្ជាក់មកកាន់លោក ៖ « នេះគឺជាសេចក្ដីពិតរបស់ព្រះ ។ ព្រះគម្ពីរមរមនគឺពិត ។ យ៉ូសែប ស៊្មីធ គឺជាព្យាការី » ។ បទពិសោធន៍នេះបានផ្លាស់ប្តូរជីវិតលោក ។
អែលឌើរ ប្រោន ផ្តល់កិត្តិយសដល់ឥទ្ធិពលរបស់អ្នកផ្សព្វផ្សាយសាសនាជាស៊ីស្ទើរនោះ និងអ្នកដទៃទៀតសម្រាប់បុគ្គលដែលលោកបានក្លាយជាក្នុងពេលនេះ ។ តាំងពីនៅវ័យក្មេង លោកបានទទួលឥទ្ធិពលពីសមាជិកទាំងឡាយនៃសាសនាចក្រ ដែលបានជួយលោក—មានតាំងពីប្រធានមណ្ឌលរបស់លោករហូតដល់គ្រូអង្គការបឋមសិក្សា ពួកអ្នកផ្សព្វផ្សាយសាសនាវ័យក្មេងទៅដល់ពួកអ្នកផ្សព្វផ្សាយសាសនារៀមច្បង និងជាពិសេសភរិយារបស់លោក ណាឌីន ដែលបានជះឥទ្ធិពលខ្លាំងបំផុតដល់លោក ក្រៅពីព្រះអម្ចាស់ ។
ខេវីន ជី. ប្រោន បានកើតនៅថ្ងៃទី១៨ ខែឧសភា ឆ្នាំ១៩៧៦ នៅ មេនឆេស្ទើរ ចាម៉ៃកា ជាកូនរបស់ ដេសម៉ុនដ៍ ហូលនេស និង ផាតស៊ី វិល្លាម ប្រ៊ិសសិត ។ លោកបានរៀបអាពាហ៍ពិពាហ៍នឹង ណាឌីន ខាតធើរ ក្នុងឆ្នាំ១៩៩៩ ។ ពួកលោកមានកូនចំនួនប្រាំនាក់ ។
អែលឌើរ ប្រោន បានទទួលសញ្ញាបត្របរិញ្ញាបត្រពីសាកលវិទ្យាល័យបច្ចេកវិទ្យា នៅចាម៉ៃកា ក្នុងឆ្នាំ២០០៨ ។ លោកបានទទួលសញ្ញាបត្រអនុបណ្ឌិតផ្នែកគ្រប់គ្រង និងគោលនយោបាយសាធារណៈពីសាកលវិទ្យាល័យ វេស អ៊ីនឌី ក្នុងឆ្នាំ២០១២ ។ ចាប់តាំងពីឆ្នាំ២០០១ មកលោកបានបម្រើការងារនៅក្នុងថ្នាក់សិក្ខាសាលា និងវិទ្យាសាសនារបស់សាសនាចក្រ ។
នៅពេលទទួលការហៅរបស់លោក អែលឌើរ ប្រោន កំពុងបម្រើជាពួកចិតសិបនាក់ប្រចាំតំបន់នៅក្នុងតំបន់យូថាហ៍ ។