“Kobaļo̧k ilo Karōk eo an Anij im ilo Tampeļ eo,” Liaona, M̧aaj. 2025.
Kobaļo̧k ilo Karōk eo an Anij im ilo Tampeļ eo
Jilu pedped ko rej kakeememej kōj bwe kōj aolep jemaron̄ bōk kōjeraam̧m̧an ko Anij ej litok n̄an ajri ro Nejin.
Pija in Barranquilla Colombia Temple jān Leslie Nilsson
Ikar jijet ilo juon kūrub in membōr ro an Kabun̄ in. Jej jan̄in kar ioon doon m̧okta, ak kōj aolep ewōr juon men jej āinwōt juon kake: jekar ro ejjeļo̧k pāleer.
Kiiō, ikōņaan bōk likļo̧k kōj jidik. Ilo gospel eo an Jisōs Kraist, rejjabkallikar kōj kōn ļābōļ. Kadkad eo ad em̧ool, Būreejtōn Russell M. Nelson ekar katakin, ej bwe kōj jej “ajri in jetōb ro nejin Anij.” Imeļeļe bwe ejjab menin aorōk bwe jen kūr jet iaan membōr ro an Kabun̄ in ro ejjeļo̧k pāleen. Jekjek in ewōr un ko an. Ak jet iien, āinwōt em̧ōj an erom̧ jekjek eo ilo wāween in, emaron̄ kōm̧m̧an bwe membōr ro ren en̄jake āinwōt armej ro rejjab jān Kabun̄ in. Aaet emaron̄ kōm̧m̧an bwe en pen n̄an er bwe ren en̄jake ekoba kōjeraam̧m̧an ko an Anij kōn lo̧mo̧o̧r im mour ijo ilōn̄tata.
Kwoj loe, jekar kōnono kōn tampeļ eo—im jet armej ilo kūrub in rekar en̄jake bwe armej ejjeļo̧k pāleer rejjab koba ippāer jān bōk tarlep in kōjeraam̧m̧an ko an tampeļ eo. Ij meļeļe; n̄e kwoj jan̄in m̧are ilo juon Kabun̄ ej pedped ioon baam̧le, emaron̄ pen n̄an loe wāween am̧ pād ie. Ak ij barāinwōt jeļā bwe Irooj ejjab ekajet mekarta juon armej ej erreo n̄an bōk kōjeraam̧m̧an ko kar kallim̧ur kaki pedped wōt ioon paaktokin ak ļābōļ ko. E “ej lale būruon” (1 Samuel 16:7) im kōm̧m̧ane kōjeraam̧m̧an ko An bwe ren pād n̄an aolep ro rej kāālet n̄an ļoor E. Ij tōmak menin kōn aolepān būruwō. Kōn menin, ilo kōļmenļo̧kjeņ, erkein rej jilu pedped ko n̄an jipan̄ Armej ro Rekwojarjar ilo Raan Ko Āliktata ro ejjeļo̧k pāleer jeļā bwe er rej kobaļo̧k ilo karōk eo an Anij im ilo tampeļ eo.
1. Anij ekar ejaake karōk eo An n̄an kajjojo ajri ro Nejin.
Kōnke bujen eo ekāāl im ejjeļo̧k jem̧ļo̧kin an m̧are ej mennin aikuj n̄an mour ijo eutiejtata, maron̄ ļōmņak bwe karōk eo an Anij ekar jab kōm̧m̧an n̄an ro otemjej ro ejjeļo̧k pāleer (lale Katak im Bujen Ko 131:1–3). Ak Elder Patrick Kearon ekar katakin: “Karōk eo an Jemed eaiboojoj,, aaet karōk eo ‘ejejjōt’An, eaar kōm̧anm̧ane n̄an kōjepļaak eok n̄an kapijuknen, ejjab n̄an dāpij eok. Ejjeļo̧k eaar kiil iaļ eo ak likit juon ijeņ bwe en kōjeere eok im karo̧o̧le eok. Ilo m̧ool, ej okōtan menin. Anij ej kajjieon̄ aolep iien n̄an tōpar eok. E ‘ekōņaan bwe aolep ajri ro Nejin ren kāālet n̄an ro̧o̧l n̄an Ippān,’ im Ej kōjerbal aolep wāween ko emaron̄i n̄an kōjepļaakļo̧k eok.”
Ejjab kōņaan eo an Anij n̄an jilkinļo̧k ro otemjej ejjeļo̧k pāleer jān lan̄lōn̄ kōn kōjeraam̧m̧an ko Ej litok. Būreejtōn M. Russell Ballard (1928–2023), Ripinej Jenkwan Būreejtōn eo an Doulul eo an Jon̄oulruo Rijilōk ro, ekar katakin, “Jeje ko rekwojarjar im rikanan ro raan kein rej kalikkar bwe aolep ro rej tōmak ilo kōjparok bujen ko an gospel renaj wōr aer iien em̧m̧an n̄an mour ijo eutiejtata.” Kajjojo jetōb eļap an aorōk ilo mejān Jemedwōj Ilan̄—jon̄an an ļap Ekar jilkintok Nejin Ejitōnbōro Emake Wōt n̄an mej im pinmuuri kōj aolep jān jerawiwi bwe jen maron̄ bōk mennin letok eo an mour indeeo (lale Jon 3:16–17; Katak im Bujen Ko 18:10–12).
Eļan̄n̄e mour peļļo̧k tok im oktak jān kar kōtmāne, jemaron̄ lo kōj make kajjitikin jibadbad eo ad ilo karōk eo an Anij. Aaet karōk eo An ej jāmin kar lukkuun kōttōbrak mour ko ad renaaj aolep āinwōt juon wōt. Jejjab jeļā ta lan̄lōn̄ eo, inepata ko, tōprak ko, ak metak bar eo emaron̄ in itok ilo iaļ in ad. Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar ba, “Eļap ijo jejjab jeļā kaki im bwe ad pedped wōt ioon ej n̄an lōke ilo Irooj im iakwe eo An n̄an ajri ro Nejin.”
Jemaron̄ jab jeļā etke iaļ ko ad rej āinwōt wāween in kiiō. Ak lōke ilo Anij im iakwe eo An emaron̄ letok alikkar kōn wāween An kar kōm̧anm̧an karōk eo An n̄an aolep ajri ro Nejin—ekoba kwe.
Pija eo itulowaan Rome Italy Temple Visitors’ Center jān Massimo Criscione
2. Tampeļ eo ej kabwijer kōjeraam̧m̧an ko n̄an kajjojo armej.
Jemaron̄ ļōmņak kōn liāp ko āinwōt an jerbal wōt n̄an juon em̧m̧aan im kōrā pālele. Ak ilo kakobaba n̄an kobaik ripālele ro ippān Irooj, liāp ko rej liāpe baam̧le ko n̄an indeeo. Jān liāp ko, aolep ajri ro nejin Anij remaron̄ lan̄lōn̄ kōn kōjeraam̧m̧an ko an indeeo eļan̄n̄e rej kōjparok bujen ko aer.
Kajoor in liāp eo ej kōmaron̄e aolep kain̄i ko an priesthood eo ilo lan̄ im ioon laļ. Elder D. Todd Christofferson jān Doulul eo an Jon̄oulruo Rijilōk ro ekar katakin: “[kajoor in liap] ej kōm̧m̧an lo̧mo̧o̧r n̄an armej im baam̧le ren mour ijo eutiejtata im pād n̄an ro nejin Anij ijoko otemjej im iien otemjej remaron̄ kar mour ioon laļ in. Ebar ejjeļok katak ak tōmak ak mālim emaron̄ tōpar jon̄an lap an jeraam̧m̧an in kitbuuj elōn̄ men ko. Kajoor in liāp in ej juon waļo̧ktok eo ewāppen kōn ekajet, tūriam̧o̧, im iakwe an Anij.” Kōjeraam̧m̧an ko an Irooj litok rekitbuuj men otemjej im bwe rej pād n̄an aolep ro renaaj kōm̧m̧an im kōjparok bujen ko aer Ippān.
Jemaron̄ in meļeļeļo̧k wāween an karōk eo an Anij kitbuuj men otemjej ilo ad kabun̄jar ilo m̧weo im̧ōn Irooj. Joļo̧k iien ilo tampeļ, Būreejtōn Nelson ekar katakin, “naaj jipan̄ eok ļōmņak kōn selestial im n̄an bōk juon visōn kōn wōn lukkuun kwe, wōn eo kwonaaj erom̧, im kain mour rot eo kwomaron̄ bōke n̄an indeeo.” Ekar barāinwōt kōmeļeļeiki bwe kabun̄jar ilo tampeļ ko renaaj letok n̄an kōj kōjparok, juon naan in kam̧ool ekajoorļo̧k, kaenōm̧m̧an, revelesōn an juon make, kōļapļo̧k jeļāļo̧kjeņ im kajoor, im juon meļeļe eļapļo̧k kōn karōk eo an Anij.
Mekarta jej rim̧are ak ejjeļo̧k pāleen, tampeļ eo ej kabwijer jeraam̧m̧an in jetōb n̄an kōj aolep—ej juon jikin me ej kōkajoorļo̧k im leļo̧k maron̄ n̄an aolep ro rej kōņaan epaake ļo̧k Anij. N̄an eļapļo̧k, lale bwebwenato eo “Empowered by Temple Worship.”
3. Ilo tampeļ eo, jemaron̄ kam̧wilaļļo̧k jem̧jerā eo ad ippān Jisōs Kraist.
Ilo tampeļ eo, jibadbad eo ad eļap ej Jisōs Kraist. E ej ioļapļap in karōk eo an Anij im ej un eo kōj aolep jemaron̄ bōk lo̧mo̧o̧r im mour ijo eutiejtata. Būreejtōn Nelson ekar katakin: “M̧weo im̧ōn Irooj ej juon im̧ōn ekkatak. Ijeņ, Irooj ej katakin ilo wāween eo An make. Ijeņ, Rilo̧mo̧o̧r ej katakin kōn kajjojo kain̄i ko. Ijeņ, jej ekkatak wāween n̄an kōpeļļo̧k ran̄ōl eo im alikkar ad kōnono ippān lan̄. Ijeņ jej ekkatak wāween ad kōbōjrak rinana eo im epaake kajoor in priesthood eo an Irooj n̄an kōkajoorļo̧k kōj im ro rejitōnbōro ippad. Ewi jon̄an ad aikuj kijorjor n̄an kappukot likapejn̄ak ijeņ.”
Jemaron̄ lo likapejn̄ak im kobaļo̧k ilo tampeļ eo jān reilo̧k n̄an Irooj ilo kain̄i ko im bujen ko. N̄an kōm̧m̧an āindein, jenaaj loe kam̧ool eo bwe Ej iakwe kōj im bwe “aolep rej āinwōt juon” (lale 2 Nipai 26:33). Kōn wōt iakwe eo An n̄an kōj, E ekōņaan bwe jen ejaake “jem̧jerā ko ejjeļo̧k jem̧ļo̧kier” Ippān im bōk maron̄ n̄an juon “kain iakwe ejenolo̧k im tūriam̧o̧” jān bujen ko an. Eļan̄n̄e jej kōm̧m̧an im kōjparok bujen ko an tampeļ, jemaron̄ kōkajoorļo̧k jem̧jerā ko ad Ippān, letok n̄an kōj “kōjatdikdik, lan̄lōn̄, im laudin̄din̄ aolepān ad mour”—mekarta jekjek ko ad.