“Lewena ni iTuvatuva ni Kalou kei na Valetabu,” Liaona, Maji 2025.
Lewena na iTuvatuva ni Kalou kei na Valetabu
E tolu na ivakavuvuli e vakananuma vei keda ni rawa ni da ciqoma kece na veivakalougatataki e solia na Kalou vei ira na Luvena.
iTaba ni Valetabu e Barranquilla Colombia mai vei Leslie Nilsson
Au a dabe maliwai ira e dua na ilawalawa lewe ni Lotu. Keimami se bera mada ni sota vakadua, ia e dua ga na ka keimami tautauvata kina: keimami sega kece ni vakawati.
Ia oqo, au vinakata meu suka vakalailai. Ena kosipeli i Jisu Karisito, eda sega ni vakamacalataki ena ivakatakilakila. Na noda ivakatakilakila dina, e vakavulica o Peresitedi Russell M. Nelson, ni da “luvena vakayalo dina na Kalou.” Au kila ni sa gadrevi meda vakatoka eso na lewe ni Lotu dawai. E tu eso na vuna e yaco kina o ya. Ia ena so na gauna, me vaka e kena irairai eke, e rawa ni vakavuna nodra nanuma eso na lewenilotu ni ra sega ni okati. Ena rawa sara mada ga ni vakadredretaka nodra vakila taucoko ni ra okati vakavinaka sara ena veivakalougatataki ni Kalou ni veivakabulai kei na bula vakacerecerei.
O ni raica, keimami a veivosakitaka tiko na valetabu—ka so na tamata ena ilawalawa era vakila ni o ira era sega ni vakawati era na sega ni ciqoma na taucoko ni veivakalougatataki ni valetabu. Au kila; ni o sega tu ni vakamau ena dua na Lotu e yavutaki ena matavuvale, ena dredre na nomu logavinaka kina. Ia au kila talega ni Turaga e sega ni vakatulewataka se kilikili me ciqoma e dua na tamata na veivakalougatataki yalataki ka yavutaki ena irairai e taudaku se ivakatakilakila. Sa “raica na yalo” (1 Samuela 16:7) ka vakarautaka na Nona veivakalougatataki vei ira kece era digitaka me ra muri Koya. Au vakabauta oqo mai vu ni yaloqu. O koya gona, ni vakasamataki tiko oqori, oqo e tolu na ivakavuvuli me vukei ira na Yalododonu Edaidai era sega ni vakawati me ra kila ni ra sa lewe ni ituvatuva ni Kalou kei na valetabu.
1. A bulia na Kalou na Nona ituvatuva me baleti ira yadua na Luvena.
Baleta ni gadrevi na veiyalayalati vou ka tawamudu ni vakamau me baleta na bula vakacerecerei, ena rairai vaka me a sega ni caka na ituvatuva ni Kalou me baleti ira era dawai (raica na Vunau kei na Veiyalayalati 131:1–3). Ia a vakavulica o Elder Patrick Kearon: “na ituvatuva totoka nei Tamada, na Nona ituvatuva ‘vakasakiti’ sara mada ga, e caka me kauti iko ki vale, ka sega ni tarovi iko tu ituba. E sega ni dua e tara e dua na itatao ni gaunisala ka biuta e dua me vakasukai iko ka talai iko laivi. Na dina, e kena veibasai dina. Sa dau vakasaqarai iko tiko ga na Kalou. E ‘vinakata o Koya mera digitaka kece na Luvena mera lesu tale Vua,’ ka vakayagataka na ivakarau kece sara e rawa me kauti iko lesu mai,”
E sega ni nona inaki na Kalou me vakatalai ira tani o ira era sega ni vakawati mai na nodra marautaka na veivakalougatataki e solia o Koya. E vakavulica o Peresitedi M. Russell Ballard (1928–2023), Peresitedi Vakatawa ni Kuoramu ni iApositolo Le Tinikarua, “Era vakadeitaka na iVolanikalou kei na parofita ni gauna oqo ni o ira kece era yalodina ena maroroi ni veiyalayalati ni kosipeli era na rawata na madigi ni bula vakacerecerei.” Na yalo yadua sa ka talei sara ena mata ni Tamada Vakalomalagi—na kena levu e tala mai kina na Luvena e Duabau ga me mate ka sereki keda kece mai na ivalavala ca me rawa ni da rawata kina na isolisoli ni bula tawamudu (raica na Joni 3:16–17; Vunau kei na Veiyalayalati 18:10–12).
Kevaka e duidui na ivakarau ni bula mai na kena e namaki, eda na rairai vakataroga tiko na keda inaki ena ituvatuva ni Kalou. Ia e sega ni vakadeitaka na Nona ituvatuva ni na tautauvata kece na irairai ni noda bula. Eda sega ni kila na reki, yalorarawa, rawa-ka, se mosi ni yalo ena yaco mai vei keda. E kaya o Peresitedi Dallin H. Oaks, na iMatai ni Daunivakasala ena Mataveiliutaki Taumada, “E levu sara na ka eda sega ni kila o koya sa noda inuinui dei duadua ga o ya meda vakararavi vua na Turaga kei na Nona loloma ena vukudra na Luvena.”
Eda na sega beka ni kila na vuna e vaka kina na kena irairai ena gauna oqo na noda sala. Ia na vakararavi vua na Kalou kei na Nona loloma ena rawa ni kauta mai na matata ni Nona ituvatuva me baleti ira kece na Luvena—oka kina o iko.
iTaba ena loma ni Rome Italy Temple Visitors Center mai vei Massimo Criscione
2. Na valetabu e tiko kina na veivakalougatataki yadua me baleti keda kece.
Eda na rairai nanuma beka ni veivauci e vakayagataki walega vei rau na veiwatini. Ia me ikuri ni nodra cokoti vata na veiwatini kei na Turaga, na veivauci ena vakaduavatataka na matavuvale me tawamudu. Mai na veivauci, sa rawa vei ira kece na luve ni Kalou me ra marautaka na veivakalougatataki tawamudu kevaka era maroroya na nodra veiyalayalati.
Na kaukauwa ni veivauci ena vakabau kina na cakacaka vakalotu kece ni matabete mai lomalagi kei vuravura. E vakavuvulitaka o Elder D. Todd Christofferson ena Kuoramu ni iApositolo Le Tinikarua: “[Na kaukauwa ni veivauci] e yaco rawa kina na veivakabulai kei na bula vakacerecerei kina tamata yadua kei na matavuvale vei ira na luve ni Kalou e vuravura ena gauna kei na vanua cava ga era a bula kina e vuravura. E sega ni dua tale na vakabauta vakalotu se vuku ni tamata se lewa, e rawa ni tautauvata kei na madigi veikovuti oqo. Na kaukauwa ni veivauci oqo e ivakaraitaki uasivi ni lewa dodonu, veivosoti, kei na loloma ni Kalou.” Na veivakalougatataki e solia na Turaga era sa okati kece sara ka sa vakarautaki tu vei ira kece era na cakava ka maroroya na veiyalayalati kei Koya.
Eda na rairai kila vakavinaka cake beka na sala e okati keda kece kina na ituvatuva ni Kalou ni da sokalou ena vale ni Turaga. Na gauna ena valetabu, e vakavuvulitaka o Peresitedi Nelson, ena vukei iko mo vakasama vaka silesitieli ka ciqoma na rai se o cei mada o iko, o cei o rawa ni ucuya, kei na mataqali tamata vakacava o rawa ni vakataka me tawamudu.” A vakamacalataka talega ni sokalou ena valetabu ena solia vei keda na veitaqomaki, dua na ivakadinadina kaukauwa cake, vakacegu, ivakatakila yadua, vakalevutaka na kila ka kei na kaukauwa, kei na dua na kila ka cecere cake me baleta na ituvatuva ni Kalou.
Se da vakawati se sega, e tu ena valetabu na madigi vakayalo me baleti keda kece—oqo e dua na vanua e vaqaqacotaka ka vakaukauwataki ira kece era gadreva na voleka vua na Kalou. Me baleta eso tale, raica na yasana “Vakaukauwataki ena Sokalou ena Valetabu.”
3. Ena valetabu, e rawa ni da vakatitobutaka na noda veiwekani kei Jisu Karisito.
Ena valetabu, na kena vakanamata levu duadua o Jisu Karisito. O Koya na uto ni ituvatuva ni Kalou ka sa vu ni noda rawa ni ciqoma kece na veivakabulai kei na bula vakacerecerei. E vakavulica o Peresitedi Nelson: “Na vale ni Turaga sa dua na vale ni vuli. E kea ena veivakavulici na Turaga ena Nona sala. E kea na cakacaka vakalotu yadua ena vakavulica na veika ni iVakabula. E kea eda vulica kina na sala meda na tawasea na ilati ka veivosaki vakamatata kei lomalagi. E kea eda na vulica kina na sala meda vunauca kina na vunimeca ka taura na kaukauwa ni matabete ni Turaga me vaqaqacotaki keda kei ira eda lomana. E dodonu vei keda yadua meda vakasaqara vagumatua meda vakarurugi e kea.”
E rawa ni da kunea na idrodro ka da okati ena valetabu ena noda vakasaqara na iVakabula ena cakacaka vakalotu kei na veiyalayalati. Ni da vakayacora vakakina, eda na kunea kina na ivakadinadina ni lomani keda o Koya ka ni “sa tautauvata na tamata kecega vua na Kalou” (raica na 2 Nifai 26:33). Ena vuku ni Nona lomani keda, e vinakata o Koya meda tauyavutaka na “ivau tawamudu” vata kei Koya ka rawata e dua na “mataqali loloma kei na loloma cecere digitaki” mai na noda veiyalayalati. Kevaka eda cakava ka maroroya na veiyalayalati ni valetabu, sa rawa meda vaqaqacotaka na noda veimaliwai kei Koya, ka kauta mai vei keda na “inuinui, reki, kei na yalodei ena noda bula taucoko”—se cava ga na keda ituvaki.