Bag-Ong 2025 nga Album Nakatabang sa Kabatan-Onan sa Pagtan-Aw Ngadto ni Kristo

Pinalanggang kabatan-onan sa Area sa Pilipinas, gidapit kamo sa “pagtan-aw ngadto ni Kristo” karong 2025!

Sa tibuok tuig, ang mga miyembro sa Simbahan nga nag-edad og 11-18 giawhag sa pagtumong sa ilang panglantaw ngadto sa Ginoo nga si Jesukristo pinaagi sa pagtutok sa tema, nga gibase sa Doktrina ug mga Pakigsaad 6:36: “Tan-aw ngari kanako sa matag hunahuna; ayaw pagduhaduha, ayaw kahadlok.” Aron ang kabatan-onan, mga ginikanan, ug mga lider sa Simbahan matabangan sa pagkat-on, pagtudlo, ug paggamit sa mga baroganan gikan sa tema, ang Area sa Pilipinas nagpagawas og pipila ka awit sa usa ka espesyal nga album sa kabatan-onan.

Usab, aron masunod ang sugo sa Ginoo nga ang tanang katawhan lakip ang kabatan-onan, “makapaminaw sa kahingpitan sa ebanghelyo sa [ilang] kaugalingon nga dila, ug sa [ilang] kaugalingon nga pinulongan” (tan-awa sa Doktrina ug mga Pakigsaad 90:11), ang mga kanta gihimo sa lain-laing pinulongan pinaagi sa talentado, ug bag-ong mitumaw nga mga artist nga mga Santos sa Ulahing mga adlaw. Ang nagtubo nga henerasyon makapaminaw sa makapalig-on-sa-pagtuo nga mga mensahe sa Iningles, Tagalog, Cebuano, ug Bicolano.

Ang tema sa kanta karong tuiga dunay duha ka bersiyon: “Look Unto Christ” (Iningles acoustic nga bersiyon) pinaagi sa returned missionary ug estudyante sa accountancy nga si Noreen Mae Nivera ug ang “Asahan Siya (“Look Unto Christ” Tagalog nga bersiyon) pinaagi sa sikat nga batan-on nga si Xia Vigor. Ang mga miyembro sa Simbahan makapaabot sa pagpaminaw ug pag-download niining mga kanta kay i-upload kini diha sa Librarya sa Ebanghelyo/app sa Sagradong Musika o sa opisyal nga website sa Simbahan.

“Usa kini ka kanta nga magpahinumdom kanato sa unsang paagi nga hingpit ang gugma sa Dios,” mipakigbahin si Noreen, “nga bisan og mobati man kita nga nagkaluya ug nagkatidlom, kon kita motan-aw ngadto Kaniya, bation nato ang kalig-on nga mabuhi og usab ug makabalik sa dapit diin kita naggikan.” Miingon usab siya sa iyang kaugalingon “nga kini nga kanta para gayod kanako, gikinahanglan ko kini ug nasayod ko nga kinahanglan nga buhaton ko gayod kini, maong gitugyan ko Kaniya ang akong tanan nga kabalaka, kahadlok, ug mga pagduhaduha, ug mibati niining makapainit sa kasingkasing nga kalinaw sa akong kasingkasing.”

Human madungog ang “Look Unto Christ” sa unang higayon, mitug-an si Xia nga “mitandog kini sa akong kasingkasing diha dayon ug nahimo kini nga akong bag-ong paboritong kanta sa simbahan. Usa kini ka dungog nga makakanta sa opisyal nga Tagalog nga hubad sa kanta.” Ang ilado na kaayong aktres midugang nga ganahan kaayo siya sa unang bahin nga “kon kang Kristo mosalig ta nga Siya ang kahayag— kay kini ang tanan nga atong gikinahanglan karon, ang kaseguroan nga anaa gayod ang sanag nga kahayag taliwala sa kangitngit.”

Kauban usab sa mga tigpasundayag mao ang K-pop idol nga si Chantal “Chanty” Videla, nga mikanta sa “Carry Me” (Taglish nga bersiyon), ug giapilan ni Althea Atienza, Ryzza Rome Calcetas, Naomi Tino, Maeden Olive Garcia, Kiersten Melanie Nivera, ug P-pop artist Yzabel Divinagracia. “Ang mao nga kanta piho nga namulong mahitungod sa paghangyo sa Ginoo, ang atong Manluluwas, nga mopas-an kanato, ug sa akong tan-aw managsama ang pagbati sa tanan bahin niini,” mipakigbahin si Chantal, nga nag- ingon usab nga “gibati ko kini sa personal.”

Ang uban pang kanta nga ipagawas diha sa youth album mao ang: “Daughter of Light” (Taglish nga bersyon) ni Kaelyn Papa; “His Work” (Tulo ka pinulongan nga bersiyon sa Iningles, Tagalog, ug Bicolano) pinaagi ni Adrian Pramoso; “I Need Your Strength” (Tagalog, ug Cebuano) pinaagi nila ni Brandon Kyle Sorilla ug Reilan Abasanta; “Fear Not [Salig Lang]” (Taglish) ni Natalie Ruth Villasis; ug “Doubt Not” (Tagalog Acoustic) ni Noah Yuvienco.

Ang paghatag sa iyang pagpamatuod pinaagi sa musika ug sa lumad niyang pinulongan maoy usa ka damgo nga natinuod alang ni Adrian, kinsa naggikan sa Rehiyon sa Bicol. Usa ka nauli na nga misyonaryo, si Brother Pramoso katulo nang nakadawat og Ani ng Dangal Awards sa National Commission for Culture and the Arts (NCCA) sa ilang internasyonal nga grand prix championship sa Indonesia, South Korea, ug Spain.

“Nasayod kong Siya lamang ang makaayo sa samaran natong kasingkasing, siya ang tubag sa atong mga pangamuyo,” si Noreen nanghinaot nga ang nagtubo nga henerasyon mobati samtang maminaw sila sa “Look Unto Christ” ug ang ubang mga kanta nga naa sa 2025 nga album sa kabatan-onan. “Motabang Siya nato sa pagsubay niini nga dalan samtang padayon kita sa pagtan-aw ngadto Kaniya.”