Trabaho o Pagsimba?

Paghulagway pinaagi ni Katy Dockrill

Human magkolehiyo, nakakita ko og oportunidad nga makatrabaho sa gipangandoy nakong kompanya. Sa unang adlaw, giingnan nako ang akong manedyer sa akong kahinam. Giingnan sab nako siya nga ang pagtahod sa Adlawng Igpapahulay importante kanako.

Miingon siya nga han-ayon niya ang akong iskedyul aron maseguro nga dili ko magkinahanglan nga motrabaho ma-Dominggo. Miingon siya nga nagtahod ang kompanya sa tinuohan sa mga tawo.

Nalingaw ko sa trabaho ug gibuhat ang labing maayo. Akong makita ang akong kaugalingon nga modangat ko sa trabaho sulod sa katuigang moabot.

Usa ka adlaw pipila ka bulang milabay human ko nagsugod, giingnan ko sa manedyer, “Nagkinahanglan ko nimo nga moanhi sa Dominggo. Nagkinahanglan mi sa tibuok team aron mahuman nga lig-on ang quarter ug makapadala og maayong mga resulta ngadto sa headquarters.”

Nakalitan ko.

“Nag-istorya na ta ani kaniadto,” mitubag ko. “Nakasabot ko nga tibuok team ang gusto nimong moanhi, apan ang pagtrabaho og Dominggo supak sa akong gituohan.”

Dayon gitutokan ko niya ug hait nga miingon, “Ingon og andam kang moundang niini nga trabaho tungod sa imong gituohan.”

Bisan og nahigugma ko sa akong trabaho, apan determinado kong mopakita og gugma sa Ginoo pinaagi sa paglikay nga motrabaho ma-Dominggo (tan-awa sa Doktrina ug mga Pakigsaad 59:9–10).

“Motrabaho ka sa Dominggo karon lang gayod kausa,” midugang ang akong manedyer.

Wala kanay kalainan. Nasayod ko, ug ang Langitnong Amahan masayod.

“Pasayloa ko, apan ang ingon niana dili magsilbi kanako. Mituo ako nga ang Dominggo sagrado nga adlaw para nako sa pagsimba sa Dios,” miingon ko.

“Ok, taktak na ka!”

Sakit kaayo nako kadtong mga pulonga. Sa dihang milakaw na ako, bisan pa man niana, gibati nako ang Espiritu Santo sa akong kasingkasing. Ang dili pagtrabaho og Dominggo usa ka timaan nga akong gipili nga ihatag sa Dios sa unsay akong gihunahuna “nga tukma alang sa Igpapahulay.” Nasayod ko nga Siya mopanalangin kanako tungod niini. Wala madugay, nakakita ko og laing trabaho nga nagtugot nako nga akong mabalaan ang Adlawng Igpapahulay.

Ang Ginoo nagsaad diha sa 1 Nephi 17:13, “Ako usab mao ang inyong kahayag diha sa kamingawan; ug Ako moandam og agianan alang kaninyo, kon kini mao nga kamo mohupot sa akong mga sugo.”

Ang huros sa hangin sa kalibotan mosulay sa paghuyop kanato palayo sa dalan gikan sa pagsunod sa Manluluwas. Apan kon sundon nato Siya uban sa pagtuo ug maningkamot sa pagsunod sa Iyang pulong, makakaplag kita og kusog sa pagbuntog sa kalibotan.