Gikan sa mga Luha sa Kasubo ngadto sa mga Luha sa Pagpasalamat

Paghulagway pinaagi ni Katy Dockrill

Wala ko maandam bisan gamay sa adlaw dihang ang 10 ka tuig nako nga asawa miingon nga gusto siyang mobiya sa Simbahan ug sa among kaminyoon. Tinuod, ang matag usa kanamo nagkulang sa maturidad, kamabination, pagpasaylo, ug gugma, apan gusto kong magpadayon sa pagsulay nga molambo ang among kaminyoon. Apan, siya, wala.

Mibati ko nga nagtahod sa akong mga pakigsaad, nagtuon nga madasigon sa mga kasulatan, ug maunungon nga miserbisyo sa bishopric sa ward. Apan human mibiya ang akong asawa, naglisod ko, napungot, ug naglibog nga makamata na lang ko sa tungang gabii sa paghigwaos. Mangagas ang mga luha, ug buhaton lang nako ang bugtong butang nga akong mahimo—mag-ampo sulod sa mga oras.

Mibati ko nga sama sa usa ka drayber sa sakyanan nga nagdrayb og tarong apan sa kalit lang gibunggoan sa laing sakyanan nga di matag-an ang pagdagan. Dili ba angay unta ang akong kamasulundon mopanagang kanako gikan sa kalamidad?

Naghunahuna ko kon ang mga miyembro sa ward naghunahuna nga nangilad ko. Lider ko sa ward kansang pamilya sukwahi sa hulagway sa usa ka modelo nga pamilya. Unsaon nako sa pag-atubang ang mga miyembro sa ward kon ang akong kinabuhi ingon og naguba? Tungod kay mibati ko og kakulang, mihukom ko nga angay kong mohangyo nga magpa-release sa akong calling.

“Kon nag-antos ka sa mga pagbati sa kakulang, dili ka angayng mobati niana,” miingon ang akong bishop. “Tawo lamang kita ug makahimo og mga sayop.”

Human sa lima ka lisod nga mga tuig, nabantayan nako nga nausab ko. Mas mapinanggaon na ako ug mapasayloon. Mas kalma na ang akong kalag. Akong nakita ang akong mga kahuyang isip mga oportunidad nga mahashasan sa Espiritu Santo (tan-awa sa Ether 12:27).

Paglabay sa panahon, nakahimamat ko og talagsaon nga babaye nga may duha ka anak sa kanhi niyang kaminyoon. Naasawa nako siya pagka-2020. Malipayon na ko sukad. Ang matag gabii nakong mga luha sa kasubo karon midagayday na isip mga luha sa pasalamat. Ang Ginoo nagbu-bu og daghan kaayong panalangin.

Tungod kay nakasinati og dili malipayon ug dili himsog nga mga kahimtang sa akong pamilya, nakakuha ko og kahupayan gikan sa tambag ni Elder David A. Bednar sa Korum sa Napulog Duha ka Apostoles: “Kaninyo nga nakasinati sa kagul-anan sa diborsyo sa inyong pamilya o mibati sa kasakit sa pagkapakyas sa pagsalig, palihog hinumdomi [nga ang sundanan sa Dios alang sa mga pamilya] magsugod pag-usab diha kaninyo! … Makadugang kamo og kalig-on sa inyong kadena [sa mga henerasyon] ug tingali gani sa pagtabang nga mapahiuli ang sumpay sa nabugto nga mga sinumpayan.”