“Ako Moayo Kanila,” Liahona, Peb. 2025.
“Ako Moayo Kanila”
Ang pagpangalagad sa Manluluwas sa pagpang-ayo usa ka balaanon nga pasiuna ug saad sa malungtaron nga pisikal ug emosyonal nga pagkaayo nga moabot sa matag usa nato sa Pagkabanhaw.
Klaro gihapon nakong nahinumdoman ang pipila ka taas nga biyahe sa eroplano nga akong nahimo atol sa akong propesyonal nga kinabuhi isip usa ka kapitang piloto sa eroplano.
Sa usa niini, mopalupad ko gikan sa Germany sa alas 11:00 sa buntag ug motugpa sa California sa ala 1:00 sa hapon sa samang adlaw. Magtandi sa lokal nga pagbiya ug sa mga oras sa pag-abot, ingon og makita nga ang paglupad tabok sa Kadagatan sa Atlantic ug sa kontinente sa North America mikabat lamang og duha ka oras. Ang Boeing 747 paspas, apan dili ingon niana ka paspas! Sa tinuod, miabot kini og mga 11 ka oras, depende sa hangin, sa pagbiyahe og 5,600 ka milya (9,000 ka kilometro).
Tungod kay kami naglupad padulong sa kasadpan, ang adlaw wala gayod mosalop atol sa among paglupad. Nakatagamtam kami og tumang kahayag sa adlaw gikan sa Germany ngadto sa California.
Hinuon, ang pagbalik ngadto sa Germany hingpit nga lahi nga kasinatian. Bisan kon molupad mi og sayo sa hapon, samtang maglupad mi padulong sa silangan, mas dali moabot ang pagsalop sa adlaw kay sa kasagaran, ug sa wala lang damha, naabtan na kami sa kagabhion.
Atol niining taas nga mga paglupad, ang akong kalag sa kasagaran mapuno sa kahingangha samtang mamalandong ko sa katahom niini nga yuta ug sa kahan-ay sa gilalang sa Dios. Bisan samtang maglupad sa gabii, sa hingpit nga kangitngit, nasayod ko nga adunay kaseguroan nga ang adlaw mosubang pag-usab, kanang masanag nga kahayag mobalik ug mohatag og kainit ug kinabuhi sa bag-ong adlaw sa dili pa mahuman ang among pagbiyahe. Ang mga sirkumstansiya sa akong paglupad tingali nakapahimo niini nga ingon og ang adlaw hinay nga mosalop o paspas nga mosubang, apan nasayod ko nga ang adlaw nagpabilin nga makanunayon, dili matarog, ug masaligan diha sa kalangitan.
Pareha ang akong gibati mahitungod sa Dios. Tungod kay ako adunay dakong kaseguroan sa kaalam ug katuyoan sa Dios alang sa Iyang tanang gilalang, mabati nako ang makalipay nga paglaom ug malungtarong kalinaw kon ako maghunahuna mahitungod sa atong mortal nga pagkatawo. Mga anak kita sa Dios. Siya nahigugma nato. Siya nakahibalo sa atong mga sirkumstansiya. Andam Siya nga motabang. Kini nga mga kamatuoran dili mausab, bisan kon ang ubang mga butang sa atong palibot ingon og dili makanunayon ug dili matagna.
Kitang tanan makasinati og mga higayon sa kangitngit, kasubo, ug kawalay kaseguroan nga naghulga sa atong kalinaw. Mapasalamaton kaayo ko sa kasaligan ug tinuod nga tinubdan sa kamatuoran ug kahayag (tan-awa sa Doktrina ug mga Pakigsaad 88:6–11). Si Jesukristo mao ang kahayag ug ang kinabuhi sa kalibotan. Tungod Kaniya ug sa Iyang maulaon nga sakripisyo, kita adunay paglaom alang sa umaabot, makagamit sa balaanon nga kahayag aron moiwag sa mangitngit nga mga adlaw sa atong pagbiyahe, ug ang saad sa hingpit nga kadaogan batok sa sala ug kamatayon.
“Siya Nahigugma sa Kalibotan”
Si Jesukristo mao lamang ang hingpit nga tawo nga sukad naglakaw sa yuta. Tungod sa Iyang hingpit nga kinabuhi, Siya wala makautang sa hustisya. Tungod sa gugma alang nato, gihatag Niya ang Iyang kinabuhi alang sa matag usa nato nga indibidwal ug alang sa tanang anak sa Dios sa pag-abli sa pultahan sa pagka-imortal ug kinabuhing dayon.
Bisan unsa pa ang gusto ni Satanas nga atong tuohan, walay usa nato nga dili maabot sa abilidad sa Manluluwas sa pagluwas nato. Walay usa nato nga dili mahimong iapil sa grasya sa pagpasaylo. Walay usa nato nga dili maabot sa “[pagliyok] sa kahangtoran sa mga bukton sa iyang gugma” (2 Nephi 1:15).
Kining labing mahinungdanon nga gasa sa tanang gasa moabot tungod sa makahimo ug matubsanong gahom sa Pag-ula ni Jesukristo. Tungod sa pag-antos sa Manluluwas didto sa Getsemani ug didto sa Golgota, Siya nasayod unsaon sa pagluwas nato ug pagtabang nato nga makasugakod sa bisan unsa ug sa atong tanang kahuyang (tan-awa sa Alma 7:12).
“Dili siya maghimo og bisan unsa gawas kon kini alang sa kaayohan sa kalibotan; kay siya nahigugma sa kalibotan, gani siya mitugyan sa iyang kaugalingon nga kinabuhi aron siya makadani sa tanan nga mga tawo ngadto kaniya” (2 Nephi 26:24).
Si Jesukristo mao ang atong kalig-on!
Siya motabang.
Siya mopahiuli.
Siya moluwas.
“Sa dihang ang Manluluwas [mihatag sa Iyang maulaon nga pagsakripisyo] alang sa tanang katawhan, Siya miabli og usa ka dalan diin kadtong mosunod Kaniya makagamit sa Iyang makaayo, makalig-on ug matubsanon nga gahom,” miingon si Presidente Russell M. Nelson.
Kana nga gahom, sama sa adlaw, anaa kanunay. Dili gayod kini mawala-wala. Ang pagpili sa pagsunod sa mga lakang sa Manluluwas sama sa naglakaw gikan sa kangitngit ngadto sa kahayag, diin makadawat kita sa mga panalangin sa kahayag, kamainiton, ug gugma sa Dios. Nasayod ko nga moabot ang adlaw, nga kita molingi ug mapuno sa pasalamat nga atong nahimo ang mahangtoron nga importante nga desisyon nga mosalig ni Jesukristo ug sa Iyang balaan nga gugma sa pagbayaw ug paglig-on kanato.
“Balik ngari Kanako”
Ang Basahon ni Mormon naghisgot sa mga tawo nga migahin og tulo ka adlaw sa grabeng kangitngit human sa Paglansang sa Krus sa Manlululwas. Ang pisikal nga kangitngit sa ilang palibot nagsimbolo sa espirituwal nga kangitngit nga nasinati natong tanan tungod sa sala. Dayon ang mga tawo nakadungog sa tingog ni Kristo nga nagdapit nila nga mogawas gikan sa kangitngit ug ngadto sa Iyang kahayag:
“Dili ba kamo mobalik ngari kanako, ug maghinulsol sa inyong mga sala, ug makabig, nga aron unta Ako moayo kaninyo?” (3 Nephi 9:13).
“Mohalad og usa ka sakripisyo ngari kanako nga usa ka masulub-on nga kasingkasing ug usa ka mahinulsolon nga espiritu” (3 Nephi 9:20).
“Maghinulsol ug mobalik ngari kanako uban ang hingpit nga katuyoan sa kasingkasing” (3 Nephi 10:6).
Ang Manluluwas mipadangat niadtong sama nga mga pagdapit ngari kanato karon kon makita nato ang atong kaugalingon nga nahisalaag diha sa kangitngit. Ingon nga ang matag pagsubang sa adlaw nagtimaan sa pagsugod sa bag-ong adlaw, matag higayon nga kita maghinulsol atong madawat ang bag-ong pagsugod, usa ka mahayag nga sinugdanan.
Wala kana magpasabot nga kini sayon. Ang paghinulsol nagpasabot nga kausaban, ug ang kausaban dili mahitabo diha-diha dayon. Bisan adunay kalipay, ang paghinulsol naglakip sa “diosnon nga kasubo” (2 Mga Taga-Corinto 7:10). Nagkinahanglan kini nga kita moangkon ug mokompisal sa atong mga kasaypanan, mangayo og kapasayloan gikan sa Dios ug gikan niadtong atong napasakitan. Labaw sa tanan, nagkinahanglan kini nga atong tinguhaon “ang Espiritu sa Ginoong Makagagahom,” aron kita makasinati “og dako nga kausaban … sa [atong] mga kasingkasing, aron [kita] wala nay tinguha sa pagbuhat og daotan, apan sa pagbuhat og maayo kanunay” (Mosiah 5:2).
Kana nga matang sa kausaban usa ka taas nga panaw, apan kon himoon ninyo ang unang lakang, “ang adlaw sa inyong kaluwasan” nagsugod, ug “dihadiha ang mahinungdanon nga plano sa katubsanan mapadangat kaninyo” (Alma 34:31).
Pinaagi sa atong sinsero nga paghinulsol, ang Dios misaad sa pagpasaylo ug dili na hinumdoman ang atong mga sala. Kon kita maglisod sa paghikalimot sa atong mga sala, paningkamotan nato nga mosalig sa saad sa Ginoo nga mopasaylo ug magkat-on sa pagpasaylo sa uban ug sa atong mga kaugalingon.
“Ang atong espiritu madaot kon kita masayop ug makasala,” gitudlo ni Presidente Boyd K. Packer (1924–2015). “Apan dili sama sa kahimtang sa atong mga lawas nga mortal, kon ang proseso sa paghinulsol makompleto, walay mga uwat ang magpabilin tungod sa Pag-ula ni Jesukristo.”
Healing the Blind Man [Nag-ayo sa Buta nga Tawo], ni Carl Heinrich Bloch
“Dad-a Sila Ngari”
Ang Manluluwas mao ang Gamhanang Tig-ayo. Usa sa labing maanindot nga mga pagpakita sa Iyang gahom sa pag-ayo makita sa Basahon ni Mormon, sa istorya sa Iyang personal nga pangalagad sa karaang Amerika:
“Aduna ba kamo dihay mga masakiton?” Siya nangutana. “Dad-a sila ngari. Aduna ba kamo dihay mga bakol, o mga buta, o mga pungkol, o mga angol, o mga sanglahon, o mga dili makalihok, o mga bungol, o mga gitakboyan sa bisan unsa nga matang sa sakit? Dad-a sila ngari ug Ako moayo kanila, kay Ako naluoy kaninyo; ang akong kasingkasing napuno sa kaluoy. …
“Ug nahitabo nga sa dihang nakapamulong na siya, ang tanang pundok sa mga katawhan, nagkahiusa, miduol kauban sa ilang mga masakiton ug may mga balatian, ug sa ilang mga bakol, ug kauban sa ilang mga buta, ug kauban sa ilang mga amang, ug kauban sa tanan kanila nga gitakboyan sa tanan nga matang sa sakit; ug miayo siya kanila sa matag usa dihang sila gidala ngadto kaniya” (3 Nephi 17:7, 9).
Matag higayon nga ang Manluluwas moayo ni bisan kinsa nga “gitakboyan sa tanan nga matang sa sakit,” sa wala pa ug human sa Iyang Pagkabanhaw, usa kini ka pagpamatuod sa Iyang labing dakong gahom sa pag-ayo sa atong mga kalag. Ang matag milagroso nga pagkaayo usa ka pasiuna ug saad sa malungtaron nga pisikal ug emosyonal nga pagkaayo nga moabot sa matag usa nato sa Pagkabanhaw, nga “mao ang pinakaimportante nga buhat sa Ginoo sa pag-ayo.”
Tinuod nga ang atong mga pag-ampo nga mamaayo niini nga kinabuhi dili kanunay tubagon sa paagi nga atong gilaoman, apan kini wala gayod ibaliwala. Ang panahon sa pagkaayo moabot, sama nga ang kangingit sa kagabhion kanunay nga moiway—sa eksakto nga oras—ngadto sa mahimayaong pagsubang sa adlaw.
Sama sa gipamatuod ni Presidente Nelson: “Dili mahitabo nga ang atong pagtuo dili mamatikdan. Nasayod ako nga ang panglantaw sa maalamon nga Langitnong Amahan mas klaro kay sa atoa. Samtang nahibalo kita sa atong mortal nga mga problema ug kasakit, nasayod siya sa atong imortal nga kauswagan ug potensiyal. Kon mag-ampo kita aron makahibalo sa Iyang kabubut-on ug motugyan sa atong mga kaugalingon niini uban sa pailob ug kaisog, ang langitnong pagkaayo mahitabo sa Iyang kaugalingong paagi ug panahon.”
Karong bag-o lang ang akong asawa, si Harriet, ug ako milakip sa among mga pag-ampo og usa ka espesyal nga paglaom ug pangamuyo alang sa pipila ka tawo nga among gimahal. Nag-ampo kami nga ang grupo nga nag-atiman sa ilang panglawas hatagan og talagsaon nga abilidad sa pag-ayo sa ilang mga sakit. Gibati namo nga idugang nga bisan kon dili mahitabo ang dihadiha dayon nga pagkaayo o ang pagkaulian, ang gahom sa Manluluwas nga moayo makahatag unta nila og kahupayan ug kalinaw. Ang makaayo nga epekto sa matubsanong gahom sa Manluluwas adunay mas dakong epekto sa atong emosyonal, espirituwal, ug gani sa pisikal nga kahimsog kaysa bisan unsa nga yutan-ong tambal nga atong madawat. Si Jesukristo mao ang Tig-ayo niini nga kinabuhi ug sa kahangtoran.
Akong mga kaigsoonan, minahal nga mga higala, mopamatuod ko nga ang kaluoy sa Manluluwas paigo aron moayo sa inyong mga samad, molimpyo kaninyo sa sala, molig-on ninyo sa mga pagsulay nga moabot, ug mopanalangin ninyo og paglaom, kaalam, ug sa Iyang kalinaw. Ang Iyang gahom anaa sa kanunay—makanunayon ug masaligan—bisan kon kita, sa usa ka higayon, mobati nga layo sa Iyang gugma, kahayag, ug kadasig.
Nag-ampo ako nga kita dili mawad-an sa atong pagbati sa katingala ug tumang pasalamat sa tanang gihimo ni Jesukristo alang kanato. Palihog timan-i nga kamo gihigugma sa hingpit, ug hinumdomi unsay gisaad nganha kaninyo sa kahangtoran.
“Hinaot nga itugot sa Dios diha kaninyo nga ang inyong mga palas-anon mogaan, pinaagi sa kamaya sa iyang Anak,” si Jesukristo (Alma 33:23).