“Nadala ngadto sa Labihan ka Taas nga Bukid”

Ni Matthew McBride

Departamento sa Kasaysayan sa Simbahan

Sama sa mga propeta nga adunay talagsaong mga panan-awon sa kahangtoran, atong makita atol sa pagtuga ang tahas sa Manluluwas sa plano sa kaluwasan ug makat-on kon unsaon sa pagpangandam alang sa adlaw kon kita sa literal nga mosulod sa Iyang presensiya ug sa Iyang Amahan.

Isip Propeta sa Pagpahiuli, si Joseph Smith gipanalanginan nga makasaksi sa talagsaong mga panan-awon sa mga kahangtoran. Nakita niya ang Manluluwas subra sa kausa ug nakasinati diha sa panan-awon “unsay naa kaniadto, ug unsay naa karon, ug unsay umaabot.”

Dili lamang kay si Joseph Smith ra ang aduna niana nga mga panan-awon. Ang mga kasulatan adunay pipila ka asoy sa matinud-anong mga tawo kinsa nakasaksi sa talan-awon sa mga kahangtoran. Si Abraham nakakita sa mga kahangtoran, lakip ang premortal nga Konseho sa Langit ug ang Paglalang sa yuta (tana-wa sa Abraham 3; 4). Si Moises “nadala ngadto sa labihan ka taas nga bukid” ug gitudloan sa tanan nga butang “mahitungod niini nga yuta” (Moises 1:1, 36), lakip ang Paglalang, ang Pagkapukan ni Adan ug ni Eva, ug sa makaluwas nga misyon ni Jesukristo. Si Enoch, Nephi, ug Juan nga Tigpadayag adunay susamang mga panan-awon diin sila nakaangkon og propetikanhong panglantaw (tan-awa sa Moises 7; 1 Nephi 11–15; Pinadayag 1).

Nabasa na ba ninyo kini nga mga asoy ug nanghinaot nga unta duna kamo sa susamang kasinatian? Unsa kaha ang pagbati nga makakita sa kalapad sa plano sa Amahan gamit ang inyong mga mata ug makadungog sa Iyang tingog gamit ang inyong mga dunggan?

Ang Pagtuga Mihatag sa mga Santos og Panglantaw sa Kahangtoran

Didto sa Kirtland, Ohio, USA, si Joseph nagtinguha sa pag-andam sa ubang nag-una nga mga Santos alang sa kahigayonan nga makakuha og daklit nga paglantaw sa kahangtoran sa ilang kaugalingon sama sa karaang mga propeta. Dihang gitukod sa mga Santos ang Kirtland Temple, ang Ginoo misaad nga ang “tanang putli og kasingkasing” nga misulod sa unang templo sa ulahing mga adlaw “makakita sa Dios” (Doktrina ug mga Pakigsaad 97:16).

Si Joseph miawhag sa mga Santos sa pagpangandam sa pisikal ug sa espiritwal sa pagdawat niini nga panalangin. Nagpuasa sila, nag-ampo, nagtuon sa ebanghelyo, naligo, ug nagsul-ob og limpiyong sapot. Dayon, sugod niadtong Enero 1836 ug hangtod sa pagpahinungod sa templo ug sa solemno nga katigoman duha ka bulan human niadto, daghang Santos sa Kirtland misulod sa balay sa Ginoo ug nakadawat sa gisaad nga daklit nga paglantaw sa kahangtoran. “Ang Manluluwas mihimo sa iyang pagpakita ngadto sa uban,” gisulat ni Joseph sa iyang journal, “samtang ang mga anghel nangalagad ngadto sa uban.” Mipalanog sa saad sa Ginoo nga Iyang tugahan ang mga Santos og gahom sulod sa Iyang balay, gipasabot ni Joseph Smith kini nga mga kasinatian isip “tinuod nga pagtuga.”

Ang panahon nga naglibot sa pagpahinungod sa Templo sa Kirtland usa ka talagsaon nga gutlo, sagrado nga panahon, usa sa talagsaong mga milagro sa unang kasaysayan sa Simbahan. Ug pinaagi sa pagbisita sa langitnong mga mensahero sulod niana nga templo, gihatagan sa Ginoo si Propeta Joseph Smith sa mga yawe nga gikinahanglan aron mapahigayon ang umaabot nga buhat sa templo (tan-awa sa Doktrina ug mga Pakigsaad 110).

Pipila ka tuig ang milabay human niana didto sa Nauvoo, Illinois, USA, ang Simbahan milambo. Liboan ka bag-ong mga kinabig nga wala pa makasinati sa “gahom sa pagtuga” sa Kirtland midagsang gikan sa mga misyon sa Simbahan sa England ug sa tibuok Estados Unidos.

Samtang nagkapundok ang mga Santos sa Nauvoo, ang Ginoo midasig ni Joseph Smith nga mogamit og mahinuklogong drama sa pag-akting diha sa pagtuga aron ipresentar ang dakong panan-awon sa plano sa Ginoo. Kini nga pagpasundayag sa Paglalang, Pagkapukan, ug sa atong ngadto-ngadto nga pagbalik sa presensiya sa Dios pinaagi sa makaluwas nga misyon ni Jesukristo maoy labing importanteng bahin sa gisubli-subli nga seremonya sa pagtuga nga ipahigayon sulod sa mga templo. Nagtugot kini sa mga Santos nga makaapil sa ilang kaugalingon ug alang sa ilang mga katigulangan. Samtang lahi kini gikan sa mga kasinatian sa panan-awon nga giasoy ni Abrahan ug ni Moises, ang sulod nga maoy labing importante sa ordinansa mao ra gihapon.

Ang pagtuga mopahimutang sa mga partisipante sa usa ka langitnong pagsaysay bahin konektadong panghitabo. Kaysa basahan lamang bahin sa propetikanhong panan-awon, ang mga Santos gitudloan mahitungod sa mga kahangtoran pinaagi sa panan-aw ug pandungog. Mamahimo silang mga aktor sa sugilanon samtang mohimo sila og mga pakigsaad nga makatabang nila sa pagbalik ngadto sa presensiya sa Dios. Sama kinta nga sila mao si Nephi didto sa bungtod o ni Joseph Smith didto sa Kirtland. Ug ang sama nga Espiritu nga mitudlo sa mga propeta makatudlo kanila samtang moapil sila sa seremonya sa pagtuga.

Litrato sa Nauvoo Illinois Temple ni Shane Michael Bezzant

Ang Pagtuga Nagbutang sa Ilang Inadlaw-adlawng mga Kabalaka ngadto sa Panglantaw

Ang pag-apil sa pagtuga didto sa Nauvoo Temple nagtabang sa mga Santos sa pagbutang sa ilang inadlaw-adlawng mga kabalaka ug malisod nga mga pagsulay sa maayong panglantaw. Naghatag kini kanila og kaseguroan sa gugma sa Manluluwas ug mipahinumdom kanila sa mahimayaong umaabot nga naghulat niadtong mohimo ug motuman sa mga pakigsaad. Sa pagpamalandong sa pinugos nga pagbiya sa mga Santos gikan sa Nauvoo ug sa ilang layo kaayo nga pagbaktas ngadto sa bag-ong panimalay sa Utah, si Sarah P. Rich mipamatuod, “Kon dili pa tungod sa pagtuo ug kahibalo nga gitugyan ngari kanamo didto sa templo pinaagi sa impluwensya ug tabang sa Espiritu sa Ginoo, ang among biyahe susama ra unta sa pag-ambak ngadto sa kangitngit.”

Gipamatud-an ni Presidente Russell M. Nelson ang obserbasyon ni Sarah dihang gitudlo niya nga ang instruksiyon ug mga pakigsaad sa pagtuga “mobayaw kanato lapas sa mga limitasyon sa kaugalingon natong gahom ug panglantaw.”

“Ang matag templo usa ka balay sa pagkat-on,” mipahayag si Presidente Nelson. “Didto tudloan kita sa pamaagi sa Agalon. Ang iyang pamaagi lahi kay sa uban.” Sa paghisgot kon sa unsang paagi ang espirituhanong pagpangandam, sama sa pagtuon sa kasulatan, makapalambo sa atong kasinatian sa templo, si Presidente Nelson midugang nga, “ang pagrebyo sa karaang kasulatan mas labaw ka makalamdag human nga ang usa mapamilyar na sa pagtuga sa templo.”

Paglabay sa panahon, ang pamaagi nga gigamit sa pagpresentar sa mahimayaong mga kamatuoran sa plano sa kaluwasan sulod sa mga templo giusab gikan sa mga miyembro nga maoy modala sa mga tahas ngadto sa gihimoan og salida nga presentasyon nga gihubad sa daghang pinulongan. Bisan unsa ang paagi sa presentasyon, minilyon sa mga Santos sa Ulahing mga Adlaw sa kapin na sa milabayng 180 ka tuig napanalanginan sa gipalapdan nga panglantaw sa kahangtoran nga ilang masinati kon mosaka sila sa bungtod pinaagi sa pagsulod sa balay sa Ginoo.