Mahibaloan Nimo Kon Unsay Buhaton

Paghulagway pinaagi ni Katy Dockrill

Usa ka buntag human nga bag-o lang matawag isip presidente sa Relief Society, nakadawat ko og tawag gikan sa inahan sa usa ka pamilya sa among ward. Gitug-an niya ang pagkawala sa iyang trabaho, mga isyu sa medikal ug ubang mga hagit. Tataw nga naggamit na pamilya ang kataposan nilang kapanguhaan. Samtang naminaw ko, hilom kong nag-ampo nga ang Espiritu Santo mogiya ug modirekta sa akong mga pulong ug mga lihok.

Gipaneguro nako sa sister nga kontakon nako ang bishop ug mopahibalo kaniya sa dili madugay nianang adlawa. Gibati nako nga magdali sa pagtabang niini nga pamilya, ilabi na sa mga bata nga anaa sa balay. Human makahimo og daghang pagtawag sa telepono bisan pa niana, akong nadiskobrehan nga ang tanan sa bishopric ug ang kapangulohan sa elders korum wala sa lungsod. Kay bag-o pa sa akong calling, dili ko segurado unsay buhaton.

Human miluhod sa pag-ampo, mihukom ko nga mamalit alang sa pamilya ug makigsabot sa bishop kon mauli na siya. Nakahukom sab ko nga mohatag og pipila ka gikinahanglan nga mga aytem. Samtang nangandam ko nga mobiya sakay sa akong sakyanan, duna koy tin-aw ug dili masayop nga impresyon: “Paghulat.” Gisunod nako ang pag-aghat ug migawas sa akong sakyanan. Paglabay sa usa ka oras, usa ka tuktok miabot sa atubangan sa akong pultahan.

Sa gawas nagbarog ang usa ka biyuda gikan sa among ward. Gitunolan ko niya og duha ka dagkong sako sa pagkaon ug miingon, “Sister Smith, nasayod kong nahibalo ka unsay buhaton niini.” Dayon dali siyang nanaog sa biranda ug mipaingon sa iyang sakyanan.

Napuno ako sa pasalamat ug sa malumong mga pagbati gikan sa Espiritu. Gitubag sa Ginoo ang akong mga pag-ampo. Napahinumdoman ako bahin ni Nephi, kinsa gigiyahan sa Espiritu, wala masayod sa sinugdanan sa mga butang nga kinahanglan niyang buhaton (tan-awa sa 1 Nephi 4:6).

Kon mag-ampo kita ug mosunod sa gamay, hinay nga mga pag-aghat, madawat nato kini nga kaseguroan gikan sa Ginoo: “Kay ihatag kini kaninyo sa takna gayod, oo, sa diha gayod nga higayon, unsa ang inyong isulti” (Doktrina ug mga Pakigsaad 100:6)—ug usahay sa unsay angay natong buhaton. Nahibalo ang Ginoo sa diha-diha ug dinalian nga panginahanglan niini nga pamilya sa wala pa ko makahibalo. Napanalanginan ko nga makasaksi sa malumong kaluoy sa Ginoo dihang kini nga biyuda mihatag og usa ka halad nga nakapakaon sa pamilya sa oras gayod sa ilang panginahanglan.

Nagpasalamat ko sa usa ka Langitnong Amahan kinsa nagsangkap kanato sa panahon sa atong panginahanglan kon kita magpaduol Kaniya.