Makatabang Kami Kaninyo

Paghulagway pinaagi ni Katy Dockrill

Dihang ang kusog nga bagyong Irma miigo sa Caribbean niadtong Septiyembre 2017, nakahimo kini og labihan kadako nga kadaot sa pipila ka isla. Usa ka miyembro sa Simbahan gikan sa Estados Unidos nga gustong motabang mikontak sa akong bana, kinsa nagserbisyo kaniadto isip presidente sa stake sa Puerto Rico.

“Duna koy dako nga bangka nga akong dad-on sa Puerto Rico aron makahatod ko og pagkaon ug mga suplay ngadto sa isla sa Tortuga,” miingon siya. “Nagkinahanglan ko sa imong tabang sa pagpundok og mga suplay.”

Agig tubag, nagsugod kami sa pagpundok og mga donasyon sa pagkaon, sapot, ug ubang mga aytem gikan sa mga miyembro sa Simbahan ug sa uban diha sa Puerto Rico. Nagpadala kami og duha ka bangka nga puno sa karga ngadto sa Tortuga ug nangandam sa pagpadala sa ikatulong puno sa karga nga bangka, nga among natigom sa stake center aron iapod-apod. Panahon kadto nga nahibal-an namong naay laing kusog kaayo nga Bagyong Maria, nga nagpadulong tumong sa Puerto Rico.

Dihang mitugpa ang kusog kaayong Bagyo nga Maria, miguba kini sa among isla, mipatay og liboan ka mga tawo. Sulod sa daghang adlaw human niadto, dili kami makabiya sa among kasilinganan tungod sa mga nangatumba nga kahoy, salin sa nangaguba, ug uban pang mga nangaali. Didto sa stake center, hinoon, duna kami suplay sa pagkaon, tubig, mga sinina, ug personal nga mga aytem—tanan nga among gikinahanglan alang sa natural nga kalamidad. Natigom namo kadtong mga butanga aron itabang sa uban, apan misangpot nga kami hinoon ang napanalanginan.

Ang kusog kaayong bagyo nakapahimo sa mga blackout ug mipahunong sa mga internet ug mga serbisyo sa telepono. Samtang ang mga awtoridad sa Puerto Rico naningkamot sa pagresponde, kami dunay mga suplay nga nagsangkap sa dihadihang tabang sa daghang katawhan.

Dihang ang akong bana pwede nang mobiya sa among panimalay, gibati niya ang pag-aghat nga mobisita sa mga miyembro sa among stake. Nakakita siya og duha ka sister kansang mga panimalay naguba ug nawad-an sa tanan.

“Makatabang kami kaninyo,” miingon siya. “Aduna kami sa unsay inyong gikinahanglan. Ang stake center puno sa mga suplay.”

Samtang ang mga miyembro sa Simbahan ug ang mga miyembro sa ubang tinuohan mikontak sa akong bana alang sa tabang, nagsugod kami sa pagkadawat og mga gift cards nga kwarta gikan sa mga miyembro sa Simbahan sa Estados Unidos nga among gipang-apod-apod sa mga nanginahanglan. Gipalihok usab sa Simbahan ang makitawhanong mga kapanguhaan sama sa pagkaon, tubig, ug ubang mga suplay ngadto sa among isla. Sulod sa mga bulan, kini nga mga donasyon nakahimo nga kami nakatabang og dili maihap nga mga Taga Puerto Rico.

Samtang nagtabang kami sa among mga kasilinganan human sa kusog kaayo nga bagyo nga Irma, ang Ginoo nag-andam og paagi nga kami makatabang sa among kaugalingon human sa kusog kaayo nga bagyong Maria. Sama sa gitudlo sa Manluluwas: “Panghatag kamo, ug kamo hatagan” (Lucas 6:38).