Unsay Akong Tahas sa Pag-ani?

“Tan-awa ang umahan puti ug andam na sa pag-ani” (Doktrina ug mga Pakigsaad 6:3; 11:3; 12:3; 14:3).

Sa pipila ka nagkalain-laing mga pagpadayag niadtong 1829, ang Ginoo mihatag og pabalik-balik nga mga sugo nga moapil sa pag-ani (tan-awa sa Doktrina ug mga Pakigsaad 4; 6; 11; 12; 14). Tungod kay ang pipila ka bersikulo gibalik-balik man sa matag pagpadayag, atong masabtan nga ang Ginoo dunay importanteng mensahe nga gusto Niya nga atong mahibaloan.

Usa ka pagsusi sa mga simbolo niini nga mga tudling makatabang nga atong mas masabtan ang kahulogan niini.

Ang Umahan Puti Na

Kon ang umahan sa lugas makita nga puti na, timailhan na kana nga ang lugas human na sa pagtubo ug andam nang pundokon. Ang pag-ani nagrepresentar sa pagdala sa mga anak sa Dios ngadto sa Iyang gingharian.

Usa ka Sanggot

Ang sanggot usa ka himan nga gamiton sa pag-ani og mga tanom. Ang sanggot, dunay hait, kurbada nga suwab nga magamit sa tawo aron sayon pamutlon ang dagkong hut-ong. Usa kana ka yano nga himan nga pwedeng gamiton sa tanan. Makarepresentar kini sa mga himan nga anaa atong magamit, sama sa templo, mga kasulatan, atong mga talento, mga pagpamatuod, ug daghan pa.

Igalab ang Imong Sanggot sa Tanan Nimong Kusog

Ang pulong nga igalab nagpasabot og ihandos o ihampas. Nagdala kini sa hulagway sa determinadong paningkamot kay sa kaswal, simpol ra nga lihok. Ang pagtabang sa mga indibidwal nga makaduol kang Kristo nagkinahanglan og pagtuo, paningkamot, kaporsigido, ug dedikasyon.

Mag-ani

Kon mag-ani na ang mga mag-uuma, moadto sila sa ilang uma ug pundokon ang tanang hinog na nga lugas, mga utanon, mga hilba, o prutas. Sa ebanghelyo nga pagsabot, nagtabang kita sa pag-ani sa matag higayon nga moapil kita sa mga kalihokan nga magtabang sa pagdala sa mga anak sa Dios ngadto sa Iyang gingharian. Maglakip kini sa pagpakigbahin sa ebanghelyo, pagpahigayon og mga buhat alang mga katigulangan, ug pagtabang sa mga kabos ug nanginahanglan.

Samtang Adlawan Pa

Kini nga hugpong naghatag og pagbati sa kadinalian sa buhat sa pag-ani. Kadtong magtinguha sa pagpundok sa ilang mga abot nagkinahanglang molihok samtang andam na ang lugas, o wala silay maani. Ang Ginoo nag-ingon, “ug kini mao ang ikanapulo ug usa nga takna, ug ang kataposan nga higayon nga Ako motawag og mga mamumuo ngari sa akong ubasan” (Doktrina ug mga Pakigsaad 33:3).

Pagtipig o Pagtigom

Human na ang pag-ani kon ang tanang maayo nga lugas napundok na. Giprotektahan kini ug gipreserba. Sa samang paagi, kon tabangan nato ang mga indibidwal sa paghimo ug pagtuman sa mga pakigsaad ngadto sa Dios, mapanalipdan sila ug mapreserba alang sa kahangtoran. Ang Ginoo misaad, “Pagkadako sa inyong [kalipay] uban kaniya diha sa gingharian sa akong Amahan!” (Doktrina ug mga Pakigsaad 18:15).

Samtang ang paghulagway sa pagpundok gibalik-balik diha niini nga mga seksiyon, ang wala isubli mao ang mga instruksyon kon asa gayod o unsaon sa pag-ani. Karon ang panahon sa pag-ani, apan ang pagkakabig lahi-lahi sa matag indibidwal. Kon naghunahuna kamo kon unsay inyong mahimo sa pagtabang og pundok sa ani, ikonsiderar ang pagtulun-an ni Presidente Russell M. Nelson: “Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel. Ingon lang niana ka yano.”