Ang Panalangin sa Gipakigsaad nga Kahupayan

Paglakaw uban Kaniya, ni Eva Timothy, dili pakopyahan

Sa usa ka klase sa Relief Society nga bag-o lang nakong gitambongan, usa ka minahal nga sister mipakigbahin nga ang termino nga “matinguhaon nga moapil” (Doktrina ug mga Pakigsaad 58:27) naghimo sa iyang matinguhaon nang daan nga kalag nga mas nagmatinguhaon pa. Usa siya ka talagsaon nga sister kinsa nakahimo na og daghang maayo ug nagpakabana sa labihan ka daghan.

Ang iyang mga pagbati milanog sa kasingkasing sa daghang buotan nga mga sister kinsa naghunahuna kon igo ba ang ilang nahimo ug kon ang ilang halad madawat ba.

Wala ko magtuo nga ang “matinguhaon nga moapil” nagpasabot nga atong dugangan og labihan kadaghan nga maayong buhat ang atong lista-sa-mga-angay-buhaton. Wala sab ko magtuo nga nagpasabot kini nga mataranta na kita sa labihang paningkamot sa pagsulbad sa mga problema sa kalibotan o gani sa mga problema nga anaa ra sa palibot nato.

Sa pagka-Marso 2024 nga tibuok kalibotan nga debosyonal sa Relief Society, si Presidente Russell M. Nelson mipanalangin kanato og “kaalam sa pag-ila sa unsay gikinahanglan ug dili [kita] modagan og mas kusog kay sa [atong] mahimo.”

Isip mga babaye sa pakigsaad, aduna kita sa mga panalangin sa gahom sa Dios sa pagkapari pinaagi sa pagtahod sa atong mga pakigsaad. Ang iyang gahom makatabang nato sa pagdawat sa gipalapdan nga kapasidad ug kaalam aron masayran kon “unsay mapuslanon” ug dili “modagan og mas kusog kay sa [atong] mahimo.”

Nagdapit kanato ang Ginoo sa paghimo sa Iyang buluhaton sa Iyang pamaagi, nga lahi kay sa pamaagi sa kalibotan—lahi kay sa labihan kapaspas nga kasagarang makadawat og pagdayeg sa kalibotan nga nanubra ang kadasig, nanubra nga kamabungahon, ug makapaluya nga kalibotan.

Gihulagway sa Ginoo kon sa unsang paagi ang pagpundok sa Israel pagahimoon: “Kay kamo dili mobiya nga magdali [o sa kaarisgado], ni molayas; kay ang Ginoo mogiya kaninyo, ug ang Dios sa Israel mao ang mobantay sa inyong luyo” (Isaias 52:12).

Ang pagbiya nga dili magdalidali nagtudlo kanato nga ang ebanghelyo sa Manluluwas gituyo sa pagdala og kalinaw, kahupay sa atong mga kasingkasing, gani sa gipakigsaad nga kapahulayan nga moabot pinaagi sa pagtuman sa mas taas nga balaod ni Jesukristo. Si Presidente Russell M. Nelson mitudlo:

“Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on kanato sa pagpakigbatok sa atong mga pagsulay, mga tintasyon, ug mga kasakit. Kini nga gahom makapasayon sa atong dalan. Kadtong kinsa nagsunod sa mas taas nga mga balaod ni Jesukristo adunay agianan ngadto sa Iyang mas dako nga gahom. Sa ingon niana, ang mga tigtuman sa pakigsaad adunay katungod sa espesyal nga matang sa kapahulayan nga moabot ngadto nila sa ilang tibuok relasyon sa pakigsaad uban sa Dios. …

“… Bisan pa sa mga makalibog dili eksakto nga mga kamatuoran nga anaa sa atong palibot, makakita kamo og tinuod nga kapahulayannagpasabot nga kahupayan ug kalinaw—bisan taliwala sa inyong labing makahasol nga mga problema.”

Nasayod ko nga kining espesyal nga matang sa kapahulayan moabot kon dili nato buhaton kini nga mag-inusara. Moabot kini samtang kita tinuyo nga makigtinabangay ni Jesukristo ug mogamit sa Iyang gahom pinaagi sa pagtahod sa atong mga pakigsaad.

Ang kapahulayan moabot kon atong tugotan Siya nga mokuha sa atong mga palas-anon ug kon pilion nato ang sinsero nga paghinulsol. Ang kapahulayan moabot kon kita mosalig Kaniya sa atong mga panginahanglan ug mga kabalaka ug kon atong pilion ang mas taas ug mas balaan nga panglantaw. Ang kapahulayan moabot kon mopili kitang pamenosan ang paghukom sa usag usa ug mas dugangan ang paghigugmaay.

Ang kapahulayan moabot kon masayran nato nga ang Dios nakaila kanato ug nahigugma kanato. Ang kapahulayan moabot kon makakaplag kita og kalipay pinaagi sa pagdala sa kahupayan sa Manluluwas ngadto sa uban ug tugotan ang uban nga modala sa Iyang kahupayan ngari kanato. Ang kapahulayan moabot kon mohinumdom kita ug mamalandong sa matahom nga mga panalangin nga puno sa kaluoy nga gihatag ngari nato sa matag adlaw.

Ang kapahulayan moabot kon mosimba kita ngadto sa balay sa Ginoo. Gidapit kita ni Presidente Nelson sa paghimo “sa templo nga [atong] dapit nga kasilongan ug dapit sa pagbag-o sa atong kalagsik”—usa ka dapit diin kita makakaplag og kapahulayan. Mobiya kita sa balay sa Ginoo nga sinangkapan sa Iyang gahom ug panglantaw ug sa “mga anghel nga anaa libot [kanato], aron sa pagtabang [kanato]” (Doktrina ug mga Pakigsaad 84:88).

Ang gipakigsaad nga kapahulayan nga atong gitinguha moabot gikan ni Jesukristo. Nagdapit siya kaninyo ug kanako:

“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon Ko kamo.

“Isangon ninyo ang akong yugo diha kaninyo, ug pagtuon kamo gikan kanako; … ug makakaplag kamog pahulay sa inyong mga kalag” (Mateo 11:28–29).