Milagro Atol Sa Kamping

Niana nga panahon, 4 pa lang ko ka tuig nga namiyembro sa Simbahan. Sa wala pa ang maong kalihokan, wala pa gayod ko makasinati nga nangulo og kamping labi na sa pagpangulo og 3-ka adlaw nga kalihokan sa kamping. Sa unang adlaw, gisugat mi og wala dahoma nga labihan ka kusog nga ulan.

Ako ra ang sakop sa kapangulohan sa stake nga anaa niana nga buntag. Ang tanang batan-on nabasa sa ulan samtang nagpahimutang sa ilang mga tent. Nanglagom na ang ilang mga ngabil tungod sa katugnaw dihang gisugdan namo ang pangbukas nga kalihokan. Ang tanang bishop ug mga lider sa kabatan-onan miduol kanako ug uban sa labihan nga kabalaka alang sa kaayohan sa kabatan-onan nangutana kanako unsay among buhaton. Wala koy ikatubag.

Gibuhat nako ang tanan sa pagtawag sa ubang sakop sa kapangulohan sa stake aron makigtambag nila, ang putol-putol nga signal ug ang labihan ka kusog nga ulan nagpalisod sa akong pagkontak nila. Nahadlok ko sa pagbati nga mahukman isip usa ka lider sa simbahan nga walay pagpakabana niana nga higayon.

Akong gibati ang panginahanglan nga mangita og giya sa Ginoo nga si Jesukristo pinaagi sa pag-ampo. Samtang naglakaw ko ug naghunahuna og posibleng mga solusyon, akong gipunting ang akong mga hunahuna ngadto Kaniya ug nangayo og giya ug inspirasyon ingon man sa kalig-on sa akong kaugalingon ug sa tanang partisipante sa Youth Camp nga unta dili magkasakit gikan sa ulan.

Nadasig ko nga mangayo og tabang gikan sa campground officer. Miingon siya nga nasabtan niya sa hingpit ang among sitwasyon ug iyang itugot nga mamalhin mi ngadto sa dunay atop nga hall nga magdugang ra og gamay sa bayranan. Usa kadto ka natubag nga pag-ampo. Pagkahuman dayon, gipangpas-an sa kabatan-onan ang tanan nilang mga gamit sa kamping gikan sa kampinganan ngadto sa hall.

Ang among mga hagit wala pa mahuman. Ang tibuok plano alang sa unang adlaw napapas. Ang tibuok adlaw nagahin sa pagbalhin sa mga gamit sa kamping ubos sa ulan ingon man sa pagpauga sa tanang nangabasa nga butang.

Karon, ang ikaduhang pangutana mao kon unsay among buhaton sa sunod nga adlaw kon dili mohunong ang ulan? Nianang gabhiona, ang tanang sakop sa kapangulohan sa stake didto na. Ang among presidente sa stake mihukom nga kon magpadayon ang ulan among ikansela ang kamping ug mamauli.

Bisan sa mga kalisod sa unang adlaw, nga gikonsiderar namo isip pagpalig-on sa kinaiya nga mga kasinatian, kadaghanan sa mga young men ug young women nalingaw gihapon kaayo ug gustong ipadayon ang kamping. Kini nga tinguha nag-aghat nila nga mangluhod nga nakagrupo ug nag-ampo alang sa mas maayong panahon sa mosunod nga adlaw.

Pagkasunod adlaw, ang tanan mibangon sa usa ka matahom nga hayag nga kabuntagon sa Mt. Makiling. Natingala kami sa gahom sa matinud-anong pag-ampo. Mahinamon kami nga ipadayon ang mga kalihokan!

Ang ikaduha nga adlaw nga kalihokan sa mga young men mao ang paglakaw ngadto sa suba. Gihangyo sila nga magsul-ob og puting t-shirt ug neckerchief. Tungod kay bag-o pa lang ang kusog nga ulan, ang giladmon sa tubig abot sa kiting ngadto sa tuhod. Ang mga lider sa Young Men mipuwesto dapit sa atubang, dapit sa tunga, ug dapit sa luyo sa grupo. Nalingaw kaayo mi sa pagdayeg sa mga gimugna sa Ginoo kauban sa isig ka tighupot sa pagkapari.

Gibati namo ang kainit sa adlaw atoll sa tibuok nga paglakaw. Kadaghanan sa mga young men mitangtang sa ilang mga neckerchief. Daghan nila ang mibiya sa ilang mga neckerchief bisan asa. Nadasig ko nga puniton ang matag neckerchief nga akong nakita subay sa daplin sa suba.

Human sa mga duha ka oras nga paglakaw, ang among presidente sa stake mimando sa mga lider nga naa sa atubangan nga sugdan ang pagpamahawa gikan sa daplin sa suba. Traynta minutos ang milabay, ug wala gihapon mi makakita og luwas nga kaagian pagawas.

Sa kataposan, nakakita ang mga lider og usa ka agianan, apan ang pagkatkat labihan ka tagkason. Gisulayan namo kining gisugyot nga rota apan nakita nga labihan niini kadangog ug lisod gayod alang namo ang pagkatkat ug paggawas sa daplin sa suba. Among nalantaw nga nagkinahanglan mi og kagunitan aron mabira kami paibabaw sa bungtod ug makagawas. Naghunahuna mi, nga ang pagbalik o pagpangita og laing rota mas dugay ug dako nga trabaho. Tanan kami militok og pag-ampo sa among mga kasingkasing nga dunay milagrong mahitabo.

Nahinumdom ko sa mga neckerchief nga akong gipangpunit. Gisumpay-sumpay namo kini sa pagbugkos aron makahimo og may igong kalig-on nga kutay nga kagunitan sa mga young men aron makagawas sila. Sa among pagtinabangay, nakagawas ra kami nga luwas. Mao kadto ang milagro sa neckerchief!

Sa Doktrina ug mga Pakigsaad 6:36, si Jesus miingon, “tan-aw ngari kanako sa matag hunahuna; ayaw pagduha-duha, ayaw kahadlok.” Akong nakat-onan gikan sa among mga kasinatian nga ang mga pagduhaduha ug mga kahadlok mapulihan og pagsalig ug pagtuo kon motan-aw kita ngadto sa atong Manluluwas nga si Jesukristo. Ang pagtan-aw ngadto ni Kristo magdala og mga panalangin sa giya ug kalinaw sa atong kinabuhi. Sa atong paningkamot nga mamahimong tibuok kinabuhi nga mga disipulo ni Jesukristo, ang akong pagdapit sa tanan, labi na sa atong Nagtubo nga Henerasyon, mao ang pagtan-aw ngadto kang Kristo.

Kon imong lihokon ang buluhaton nga giandam ni Jesus nga imong buhaton, Siya molig-on ug mogiya kanimo. Samtang mopili ka sa pagbuhat sa unsay husto, Siya mopanalangin kanimo sa espiritu sa pag-ila nga magtugot nimo aron mahibalo sa husto gikan sa sayop. Samtang mag-andam ka sa pagserbisyo og full-time nga mga misyon, Siya motabang nimo nga mas masabtan ang ebanghelyo ug mapalambo ang gugma ug kalooy ngadto sa uban. Samtang makigsaad ka ngadto Kaniya sulod sa Templo, Iyang ablihan ang talagsaong mga misteryo diha kanimo. Samtang mapalawman pa ang imong pagkakabig sa ebanghelyo ni Jesukristo, Siya motabang nimo sa pag-angkon og personal nga pagpamatuod mahitungod Kaniya ug sa Iyang Pag-ula ug kon unsaon nga imong magamit kining mga panalangin diha sa imong kinabuhi. Mopamatuod ko sa kabalaan sa atong Manluluwas nga si Jesukristo ug sa Iyang gugma alang kanato. Gihigugma nako Siya ug akong gugma ang pagserbisyo Kaniya. Sa ngalan ni Jesukristo, Amen.