Moadto ug Moserbisyo, Upat ka Higayon nga Pag-Aghat Misyonaryo sa Pilipinas

Karong tuiga, si Elder Monte Schofield ug ang iyang asawa si Sister Kathy Schofield mokompleto sa ilang pagserbisyo isip couple missionary nga na- assign sa Manila Philippines Temple. Ikatulo na kining higayon diin kini nga magtiayon gitawag nga moserbisyo sa nasod, ug ikaupat alang ni Elder Shofield.

“Lakaw ug moserbisyo” Si Elder Schofield padayong nagdapit sa mga batan-ong Pilipino nga mga Santos, ilabi na sa Mga Young Men. “Mopanalangin kini sa kinabuhi niadtong inyong mga matudloan ug mopanalangin kini sa kinabuhi sa mas daghang paagi kay sa imong mahunahuna.”

Ug si Elder Schofield siguradong nasayod unsay iyang gipangsulti.

Si Monte Schofield kaniadto pa nga nagplano nga moserbisyo og misyon apan sa pag-abot sa panahon niadtong 1971, lisod kadto nga desisyon. “Panahon kadto sa Gubat sa Vietnam ug mahinungdanon kadto nga butang sa kinabuhi sa usa ka batan-ong lalaki gikan sa US,” iyang gihinumdoman. Nasayod nga dili siya maapil sa militar nga pagserbisyo lahi kay sa ubang mga young adult nga iyang nahibaloan, si Brother Schofield misanong sa panawagan sa propeta nga ang matag batan- ong lalaki moserbisyo og misyon.

Si Brother Schofield gitawag nga moserbisyo sa Philippines Mission gikan 1971 hangtod 1973, nga kaniadto naglakip sa tibuok Pilipinas. Na-assign siya sa Quezon City (Cubao area), Angeles, Bacolod, Los Bańos/Calamba, Caloocan (Malabon ug area sa Navotas), ug sa Davao City. “Nakapalambo ko og dakong gugma sa ebanghelyo, sa akong Manluluwas, ug sa katawhang Pilipino,” gihinumdoman ni Elder Schofield sa una niyang mga adlaw sa pagsangyaw.

Ang mga Schofields naminyo sa Idaho Falls Temple niadtong 1974 ug nagpasanay og pamilya nga may duha ka anak nga lalaki ug tulo ka babaye. Human miretiro sa panarbaho sa negosyo nga pagpamaligya og sinina, si Brother Schofield misanong sa pagdapit sa Ginoo nga moserbisyo na usab og full-time nga misyon.

“Kanunay nakong giingnan ang akong asawa nga gusto kong mobalik sa Pilipinas ug moserbisyo isip senior couple,” mitug-an si Elder Schofield, “gimahal ko kini nga nasod, ug ilabi na sa mabinationg mga tawo.” Silang duha, ang mga Schofields nagserbisyo sa Cebu City Philippines Temple (2015–2017), sa Philippines Olongapo Mission (2019), ug sa kataposan sa Manila Philippines Temple (2024–2025).

Sa kinatibuk-an, gusto ni Elder Schofield nga ang nagtubo nga henerasyon masayod nga ang pagserbisyo og misyon mousab sa ilang kinabuhi, sama sa pag-usab niini sa iyang kinabuhi: “Dili nako mahunahuna unsa kadako ang kalainan sa akong kinabuhi kon gipili pa nako ang dili pagserbisyo.”