Sa Unsang Paagi ang Pagpamatuod sa Usa Ka Tawo Midala sa Iyang Pamilya Ngadto sa Simbahan . . . Ug sa Templo

Sa unsang paagi ang 2025 nga mga Prayoridad sa Area sa Pilipinas nakatabang nga madala ang mga pamilya ngadto sa templo? Ang mga miyembro makakita og usa ka sundanan ug inspirasyon gikan sa talagsaong kasinatian sa pamilyang Santos.

Si Jerusalem “Jerome” Santos nagdako sa usa ka Santos sa Ulahing Adlaw nga pamilya, nga aktibo sa Simbahan. Dihang nagkahingkod na siya, si Jerome dili na aktibo ug lahi na ang iyang mga gikalingawan. Nagtrabaho siya, nagminyo, ug nagpasanay og usa ka pamilya nga may duha ka anak nga babaye.

Apan kanunay nga dunay magbalik-balik sa iyang hunahuna sulod sa katuigan: ang iyang pagpamatuod sa ebanghelyo ni Jesukristo. Nagpuyo sa Siyudad sa Sorsogon sa Bicol, si Jerome nagsugod sa pagpangita sa kinadul-ang meetinghouse sa Simbahan ug nakakita og usa ka miyembro nga mitultol niya ug mitudlo sa lokasyon ug oras sa mga Dominggo nga serbisyo.

Sa misunod nga semana, si Elder Lagrimas ug Elder Maximo sa Philippines Legazpi Mission didto sa kasilinganan ni Jerome ug nadasig nga moduol ngadto niya samtang nag-ayo siya sa karatula sa sari-sari store sa pamilya. “Pwede ba ming motabang nimo?” Nangutana si Elder Lagrimas. “Okey ra, nahuman na pod ko,” mitubag si Jerome. “Salamat, Elders.”

Nakamatikod nga usa siya ka Santos as Ulahing mga Adlaw, giamigo sa mga misyonaryo si Jerome, kinsa miabli sa iyang panimalay kanila. Nadiskobrehan nila nga ang iyang asawa nga si Maryjane ug ang mga anak nga babaye nga sila si Rahda Israel ug Tamara Elijah dili mga miyembro sa Simbahan. Mihangyo si Jerome nga tudloan sa mga misyonaryo ang iyang pamilya.

“Sa una, ang akong asawa nagpanuko tungod sa iyang relihiyoso nga kagikan,” nahinumdoman ni Jerome, “apan samtang nagpadayon kami natubag ra sa mga Elder ang iyang mga pangutana ug mga kabalaka.” Ang importante sa tanan, si Maryjane nakakat-on og butang nga nakaapekto og dako kaniya: nga ang ilang pamilya magkauban sa hangtod dili lang niining kinabuhia apan hangtod sa kahangtoran.

Nagtinguha si Jerome nga siya personal nga mobunyag sa iyang pamilya, diin ang tanan miuyon nga magpasakop sa Simbahan. Hinoon, kay siya nalayo man sa Simbahan sa dugay nga panahon, pangitaonon pa ang iyang rekord sa pagkamiyembro. Gikontak ni Jerome ang iyang kanhi mga lider sa kabatan-onan alang sa tabang, ug natabangan siyang makaakses sa hotline number sa Simbahan nga nagtabang nga masulbad ang iyang mga problema sa rekord sa pagkamiyembro.

Pagka-Septiyembre 30, 2023. Si Brother Santos mibunyag sa iyang asawa ug sa ilang duha ka anak nga babaye. “Labihan ang akong kalipay!” samtang gihulagway ni Maryjane kadtong espesyal nga adlaw.

Karon nga silang tanan nagsubay na sa dalan sa pakigsaad, ang pamilyang Santos naningkamot sa ilang tumong: nga mahimong takos nga maghupot og rekomend sa templo ug maselyo ang tibuok pamilya. Nahimo silang aktibong mga miyembro sa Bacon Branch sa Legaspi Stake, nagtambong og miting sa sakramento ug nagdawat og mga calling. Ang mga lider sa branch mitabang usab nga maandam ang pamilya nga mahimong takos.

Sa kataposan, pagka-Disyembre 17, 2024, ang pamilyang Santos naselyo alang sa karon ug sa tibuok kahangtoran sa Manila Philippines Temple. “Labihan ang akong kalipay nga nakasulod sa templo ug naselyo sa akong pamilya,” mipahiyom ang 9 anyos nga si Tamara. “Alang nako,” dugang pa sa 14 anyos nga si Rahda, “mibati ko nga mas duol kaayo ni Jesukristo sulod sa Iyang Balay.”

Sa paglantaw og balik, si Brother Jerusalem Santos nasayod nga ang Ginoo, pinaagi sa iyang mga Santos, nagmahunahunaon kaniya: “Nasayod ko nga si Jesukristo may plano gayod alang namo, sa tinagsa man ug isip usa ka pamilya.”