“Keememej Etke Ij Mour kōn Gospel eo,” Liaona, Jān. 2025.
Rūm̧m̧an Ded ro
Keememej Etke Ij Mour kōn Gospel
Kakeememej eō make kōn “etke” ellowetak ko aō ej un eō n̄an epaaktok Rilo̧mo̧o̧r eo im wōnm̧aanļo̧k wōt ilo kōttōpar ko aō ilo jetōb.
Jet iien mour eo aō elukun pokjaljal, ako ij iakwe aenōm̧m̧an eo ij en̄jake n̄e ij deļo̧n̄ļo̧k loan m̧ōn jar eo. Ej juon ian un ko im em̧m̧an ippa kake ilo aō etal n̄an jar!
Im n̄e ij keememej ta eo ij iakwe gospel eo kake—āinwōt en̄jake Jetōb Kwojarjar eo, n̄an waanjon̄ak—eļapļo̧k aō en̄jake im̧we n̄an wōnm̧anļo̧k kōn iminene ko aō ilo jetōb, āinwōt etal n̄an tampeļ eo, riiti jeje ko rekwojarjar, im jar n̄an Jemedwōj Ilan̄
Kōnke mour jet iien ej boub, emaron̄ pidodo n̄an ad meloklok men kein redrik im jej iakwi. Ak ilo aō kakeememej eō aolep iien kōn unin aō mour im iakwe gospel in an Jisōs Kraist ej jipan̄ eō kōkāāl kōttōpar ko aō ilo Jetōb im renaj boktok eō epaake E im Jemedwōj Ilan̄.
Kōm̧m̧an Kōttōpar Kāāl ko ilo Jetōb
Ilo ijjino in kajjojo iiō, ikōn kōņaan bar etale kōttōpar ko aō ilo jetōb ilo aō je jibadbad ko an Iiō eo Ekāāl. Eļan̄n̄e kwoj bar etale eok make im ļōm̧ņak ekōjkan am kōņaan kōkm̧anm̧anļo̧k jemjerā eo am̧ ippān Kraist ilo iiō in, kajjitōk ippam kajjitōk in:
“Etke ij iakwe gospel eo an Jisōs Kraist?”
Sister Ann M. Dibb, kar Rikakpilōklōk eo kein karuo ilo Būreejtōnji eo Eutiej an Doulul eo an Jiron̄ ro, ekar kōmeļeļe bwe “ad iakwe gospel in ej eddōkļo̧k ilo ad en̄jake iakwe eo an Jemed ilo Lan̄ im aenōm̧m̧an eo Rilo̧mo̧o̧r ekar kallim̧ur kake ilo ad kwaļo̧k n̄an E ke jej m̧ōņōņō in pokake im ļo̧o̧r E.”
Jeļā etke kwoj iakwe gospel eo enaaj jipan̄ eok en̄jake im kile iakwe eo an Jemedwōj Ilan̄ im Jisōs Kraist n̄an kwe. Kōļmenļo̧kjen in enaaj bar jipan̄ eok dikļo̧k am̧ eddodo n̄e kwoj kajjieon̄ kōm̧m̧ani im tōpari kōttōpar ko am̧ ilo jetōb.
“Etke” eo aō n̄an mour kake im iakwe gospel in an Jisōs Kraist Kraist ekoba jeļā eo bwe baam̧le ko remaron̄ pād ippān doon n̄an indeeo im aenōm̧m̧an eo n̄aij en̄jake ālkin juon jar ettā n̄an Jemedwōj Ilan̄.
Mekarta ta “etke” eo am̧, dāpiji—enaaj jipan̄ lewaj bun̄ten jetōb eo kwoj aikuji n̄an erom̧ juon rikaļo̧o̧r em̧m̧anļo̧k an Jisōs Kraist.
Mour Kōn “Etke” eo Am̧
Ke iaar kile etke ijaam̧ kar mour kōn gospel eo, wāween aō m̧adm̧ōde kōttōpar ko aō ilo jetōb ekar oktak. Ekar bōjrak aō ļōm̧ņak kōn ta eo ikar likjab in kōm̧m̧ane im kar ļapļo̧k aō mije ta imaron̄ kōm̧m̧ane. Iaar keememej bwe ij mour kōn gospel eo kōnke ij iakwe Rilo̧mo̧o̧r eo aō.
Elder Dieter F. Uchtdorf jān Doulul eo an Jon̄oulruo ro ekar ba: “Jej aikuj errā bwekien ko an Anij ejjab baj juon laajrak ļōmņak ko rem̧m̧an. … Rej jet kōkapilōklōk ko rekwojarjar, pedped ioon m̧ool ko ñan indeeo, litoki bwe en wōr aenōm̧m̧an ioon lal in, im mour indeeo ilo mour eo tokālik’ [Katak im Bujen Ko 59:23].”
Wōnm̧anļo̧k ilo kōttōpar ko aō ilo Jetōb ej kakeememej eō kōn wōn n̄a: juon ajri ekwojarjar nejin jinō im jema ilan̄. Pedped in ej letok n̄an eō peran n̄an jelmae ikum̧kūm̧ im m̧ojņo ko aō ilo Jisōs Kraist (lale Ether 12:27).
Būreejtōn Russell M. Nelson eaar katakin ke “Irooj ejjab kōtmāne wāppen jān kōj ilo wāween in im jejeddōkļo̧k n̄an indeeo. Ak E ej kōtmāne bwe en ļapļo̧k ad erreoļo̧k.” Innem n̄aij kajjieon̄ jon̄an wōt aō maron̄ pād epaake Jisōs Kraist im keememej etke iaar kāālet n̄an ļo̧o̧r E.